م.ع.فرزانه
عزيزيم ، باغري قره،
بيرقوش وار باغري قره .
لاله كيمي گول اولماز،
اونون دا بتغري قره،
اشاره :
تبريزلي ميرزا باغير حاج زاده، 1304-1308 نجي ايللرينده، تفليسدن و باكيدان دوغما يوردو تبريزه قاييداندان سونرا، او ايللرده تازاجا تيكيلميش تبريزين شيرخورشيد صحنه سينده اونون اؤزوكيمي تبريزه قاييدان و يا يئرلي آكتورلارلا صحنه يه چيخديلار و آزمدت ايچرسينده بو ايشده شهرت و آد- سان كسب ائتديلر. اونلارين بو سالوندا گوسترديكلري نمايشنامه لر هفته لر و آيلار دوام ائديردي. بونو اوگونلردن قالان تياتر آفيشلري آچيقدان آچيغا گوسترمكده دير.
1308-نجي ايلده، تبريزده تئاترين آذربايجان، ديلينده وئريلديگي ياساق ائديلينجه، حاج زاده چاره سيزصحنه دن چكيلير. اونون چكيلمه سي اونا گؤره ايدي كي، حاج زاده درام آكتوروايدي وصحنه ده، جدي نقشلرده ظاهر اولوردو. او، فارسيني لهجه ايله دانيشاندا، اولا او اؤزو دئميشكن درام قاييديب كمدي يه چئوريلردي. ثانيا تماشاچيلارين چوخوسو فارسي بيلمه ديكلريندن هئچ نه باشا دوشموردولر. حاج زاده اوبيري آكتورلارا دئميشدي: بيليرسيز من نه ايستيرم اؤزوم اؤزومه گولم، و نه ده ايستيرم جماعتي اؤزومه گولدورم. حاج زاده چاره سيز صحنه دن آيريلير و بو آيريليق هاميدان چوخ اونون اؤزروحيه سينده اثر قويور. او بو آيريليغا قاتلاشا بيلسه ده، خلق آكتورلوغوندان ال گؤتوره بيلمير و بوياسيز- دكورسوز كوچه ده، بازاردا خلق آكتورونا چئوريلير و تماشاچيلارين اؤز دوغما ديللرينده اونلاري هم گولدورو، هم آغلادير، هم آييلدير. اوصحنه ني دالدا قويورسادا، ملي- دموكراتيك روحيه سيني ايتيرمير. او، الي هر يئردن اوزولنده ايراندا باش وئرن بوتون سياسي- مدني دورقونلوقلاري و چاتيشمازليقلاري انگلستان حكومتي نين گؤزوندن گؤرور و عصبيله شيب اؤزوندن چيخاندا، آغزيندان ال چكير و انگليس شاهيندان و ملكه سيندن توتموش تا ايران دربارينا قدر هاميسيني سؤيوش ساپينا دوزور.
هر دفعه خفيه لر بونلاري گزارش ائديرلر. حاجي زاه ني كوچه ده، كافه ده، ياشاديغي دا خمالاردا ياخالاييب كلانتري يه يا نظميه اطلاعاتينا آپاريرلار و اؤزو دئديگي كيمي، گاه بچه يانا،گاه مردانا باتوندان، گاه ايكي ديللي شاللاقدان، گاه هئيوا آغاجي شويكه لريندن، تپيكدن، يومروقدان و سيللي دن اونا ديوان توتورلار .
او اطرافيندا گئچن حادثه لري ياخيندان ايزله يير. كيشيلرين پاپاغيني گؤتوروب يئرينه پهلوي بورك و سونرا لبه دار وكپي قويدوقلاريني، قادينلارين باش اورتويو وچاديرا – چرشاب لاريني آچديقلاريني، جوانلاري (( اجباري )) ( بو اصطلاح او واختلار خلق ديلينه و فرهنگينه گئچميشدي ) آپارديقلاريني عنوان ائديب، شاهد اولدوغو ماجرالاري بير نمايشنامه كيمي اجرايا قؤيور ونئجه دئيه رلر بيلديگيندن ال گؤتورمور. و ايندي او ماجرا و ايكيسيني دينله يين:
دلي علي آقا
دلي علي آقا گرك يادينيزا اولموش اولا. او تبريزين اعيانلار يئرله شن ششگيلان محله سي نين بي آزار دليلريندن ايدي. ششگيلان تبريزين اعيان- اشراف محلله لريندن اولدوغوندان و تبريز اداره رئيسلري نين اورايا گليب گئتديكلريندن و گيريب چيخديغيندان تميز ساخلانيليردي و اورا دا گزيشنلرين گئييم وظاهري گورونو شو اولدوقجا مرتب وسليقه لي ايدي. بورادا تكجه بير نفرين دورومو خوشا گليم دگيلدي، اودا دلي علي آقا ايدي. او هميشه كئچه بؤركونو قاشي نين اوستونه يانقيليجي قويوب، هئچ كيمدن، حتي توپورجه يي گولله يئرينه ايشله ين-كلانتري رئيسي، اسدخان كلانتري دن بئله چكينمزدي. اونو هر يئره آپاريب بوراخسايديلار، آزديريلميش پيشيك كيمي قايديب گلردي.
كلانتري رئيسي بير گون آجانلاررينا دئيير: آي جانيم، بو دلي آدام اؤز پاتلئتي ايله ( يعني ليجيم سيزليگي ايله ) هاميميزي آبريدان سالدي. دئييرلر سيز نه قدر بي عرضه سنيز كي، بير آوارا دلي ايله باشارا بيلميرسيز. سيز چاليشين بونو ديله توتون، بويونا اوخشايين، چلوكباب بويون اولون ، بلكه باشاراسيز او ياغلي پاپاغي باشيندان گؤتوروب، تازا پهلوي بؤرك باشينا قوياسيز .
آجانلار بو ايشي گؤرورلر. سونرا دا آيناني قانشارينا توتوب دئييرلر: علي آقا ! باخ گؤر نه جاوانلاشدين، گؤر نه ده ياراشير؟ لاپ محمد خان قاراداغلييه اوخشادين! ( محمدخان حاج عليلو، ارسبارانين مالكلريندن ايدي اولدوقجا تميز داوراناردي ) علي آقا هئچ بير سؤز دئمه دن آجانلاردان آيريلير، كلانتريله اوزبه اور اولان سلماني دكانينا گيرير و دقتله آينادا اؤزونه باخير . اوزونو تورشاديب دكاندان چيخا- چيخا دوداق آلتي دئيير : علي آقا، سن اول، لاپ قورومساغا اوخشادين! سونرا را محكم آدديملارلا كلانتري نين قاپسينا قاييدير، باشين حيته اوزاديب، اوجا سسله دئير: اسدخان، ناكيشي، گل بو بؤركو آپار قوي رحمتليك دده وين باشينا! منيم بؤركومو دگيشماغينان نه اولور؟ اگر كيشي سن منيم بئينيمي دگيش ! )) . . .
حاج زاده سايسيز- حسابسيز جك و لطيفه بيلردي، كوچه ده، پاساژ قاباغيندا و اؤزو دئميشكن روسلارتبريزه گلديكدن سونرا ارك باغيندا، منه راست گلنده، جوكلاريندان بيرين، ايكيسين، حتي شنگول اولاندا و يئري گلسه نئچه سيني خرجلردي و چوخ واختلار ايسته ردي من ده اوخودوغوم كتابلاردان ( او واختلارمن يامان كتاب اوخوردوم ) اونا (( ائشيتمه لي )) صحنه لر سئويله ييم. بير دفعه ده اليمده كتاب ارك باغيندا ( معروف بالا باغدا ) اونا راست گلديم. خوش بئشدن سونرا سوروشدو اليزده كي كتاب نه دي؟ اونوگؤرمك اولار؟ دئديم : بو فرانسه نين بؤيوك يازيچيلاريندان آناتول فرانسين اثري دير، كتابي اونا وئرديم. چوخ ماراقلا كتابي ورقله دي و دئدي گرك بويوك ياريچي اولموش اولا؟ دئديم، بلي اونا فرانسه نين نثر پادشاهي لقبي وئرييلر. اونون چوخ گوجلو طنزي و اولدوقجا شيوا قلمي وار. او بير عؤمور فرانسه آكادمي سينين اويه سي اولوب، بيليرسيزكي، اوروپادا آكادمي عضولري (( اؤلمز )) عنواني قازانيرلار او بيرنيمكته چوكدي و مندن ده ايسته دي كي، اگر واجب ايشيم يوخدورسا ، اونا آناتول فرانسين آكادميك سيماسيندان دانيشيم. منيم ياديما آناتول فرانسين اؤز ديليندن نقل اولونموش بيرماجرا دوشدو. اونو حاج زاده يه بئله نقل ائتديم :
بير دفعه، بير مصاحبه چي آناتول فرانسدان سوروشور: اوستاد ! سيز نئچه ايلدير فرانسه آكادميسينه باغلي سينيز؟ او جاواب وئرير: قيرخ ايل ، بلكه ده چوخ . طرف سوروشور بو قيرخ ايلده آكادمي نين دائمي اويه سي ( عضو ) اولماق هئچ سيزين دردنيزه دييب؟ آناتول فرانس قاشلارين چاتيپ نئچه لحظه دن سونرا دئيير: نييه بير دفعه و يالنيز بير دفعه ! مصاحبه چي سوروشوراونو لطفا بيزه سؤيليه بيلرسنيز؟ – بلي، اولورو بئله باشلايير: بيليرسيز منيم چوخ جاوان ياشلاريمدان گئجه لر پاريسده گزيشمك ياداها دوغروسو سويروشمك عادتيم وار. بو عادت اوزون ايللردن سونرا يئنه منده دورو. بير گئجه بو سويروشمه لرين بيرينده، بير گؤزل قادينا راست گلديم، اونا اؤجشمه يه باشلاديم، سؤز آتديم، ياواش – ياواش اونلا مطلب آچماق ايسته ديم، قادين سايمازيانا اؤزيوليله گئديردي. لاكين نئجه اولدوكي، بيردن بيره قايتدي و نفرتله دئدي :
نييه او ساچ- ساققلايندان اوتانيب قيزارميسان؟ من سن دئيه نلردن دگيلم، گئت آداميني تاپ، بورا دا كشيك پوليس نفري ده ايكي قدمليكده داياندي و قاديندان سوروشدو: يوخسا بو ولگرد سنه اؤجه شير وقادين مندن شكايتچي اولدوغونو بيلديردي. پليس الينده كي باتونو هلله ده، هلله ده دئدي: دوش قاباغا تا سنه خلقين ناموسينا اوجشمه يين داديني قانديريم! آناتول فرانس ائله قورخوب يا اوتانميش ايدي كي، آغزيني آچيب بير كلمه سؤز دئمگه ده قادير اولمور . اونلار كلانترييه چاتيرلار. پليس ماجراني گزارش وئرير و افسر بير هرزه وولگرد آداما باخان گؤزله آناتول فرانسي سوزوب و آجيقلي حالدا (( تفتيش بدني )) دستورو وئرير. آناتول فرانسين جيبلريني گزيرلر، بير دسته آچار، دستمال، كبريت، عينك و قولوندان ساعاتي، بئليندن كمري آچديراندان سونرا، اونو هولوفدونيا بوراخماق امري صادر ائدير. پوليس نفري آناتول فرانسين ياخاسيندان توتوب هولوفدو نيا چكديگي زامان صاحبمنصب يئنه قاديندان سوروشور : خانم سيزشكايتچي سيزمي؟ خانم دئيير: بلي، بئله لري گرك جزالانديرسينلار، بيرده بلكه قورخالا يا اوتانالا و بو چركين ايشلردن ال گؤتوره لر! افسر بير ورق كاغاذ چيخاريب دئيير: سيز شكايتيزي بورادا يازين و كاغاذا قول چكين! و بير ورق كاغاذ دا آناتول فرانسين جيبيندن چيخان شئيلرين سياهه سيني توتماق اوچون چيخاردير. او هاميدان اول پول كيفيني گؤتورور، اونو آچير، اورا دا هاميدان اول، بير كارت اونون دقتيني چكير. كارتا نظر سالاندا همين جولومبور آدامين عكسي آلتيندا بو سؤزلري اوخويور: آناتول فرانس، فرانسه نين گوركملي يازيچيسي و فرا نسه آكادمي سينين دائمي اويه سي! افسرين گؤزلري آچيلا قالير و بوغوق سسله پوليسه باغيرير، بوراخ اونو، عذر ديله، قايتار بورايا . آناتول فرانس گئجه ني هولوفدونودا ياتماقدان قورتولور. افسر اوندان عذر ديله يير و دئيير بورادا بير آنلاشيلمازليق اولوبدور. سونرا گؤزو قادينا و كاغاذا ساتاشير. قادين شكايتيني يازيب بيتيرمك اوچون سؤز دالينجا گزيردي. صاحب منصب كاغاذي اونون اليندن دارتيب آلير، اونو دوغرايير و ميزين اوسته سپه له يير وسونرا دئيير: خانم، سيزده قارا ياخماغا آدام تاپمادينيز؟ بابا آكادمي عضوودور. قادي نين گؤزلري كلله سينه چيخدي. چؤنوب آناتول فرانسا باخير و دئيير – من دونيالارجا سيزدن عذر ايسته ييرم. لطفا بو افتخاري منه وئرين كي ائوينيزه قدر سيزله آياقلاشيم !. .
چوخ اتفاق دوشموشدو. حاج زاده بوجور ماجرالاري دينله يندن سونرا، گؤزلري يول چكردي ، بير سؤز دانيشمادان فكره دالاري، آمما من اونون نيه فيكرلشديگيني قاشلاري نين چاتيلماسيندان دويارديم. او ائشيتديگي ماجراني جانلي صورتده صحنه يه چيخارماغي دوشونردي. آمما يازيقلار اولسون او بو ايشه نائل اولمازدي …
م.ع-فرزانه نين خاطره لر دفتريندن