علی سليمانی
مغانین ساری گبه لی کندینده (ایندی بو کند فیروزآباد آدلانیرو پرس آبادین قصبه لریندندیر) منیم آنامین قوهوملاری یاشیردیلار. بوکند 1350 اینجی ایل لردن قاباق بیگدیلی طایفاسینین قشلاق لاریندان بیریدی و سویت آذربایجانین دوز سرحدینده یرلشمیشدیر. صونرالار بو طایفانین آداملاری کوچری حیاتیندان ال چکیب و قشلاقین 5 کیلومترلیگینده کند سالیب و آدینی فیروزآباد قویدیلار و اما طایفا آراسیندا هله ده ساری گبه لی آدیلا مشهوردی و شمالی آذربایجان سرحدیله 6 کیلومتره یاخین کندین آراسی وار چوخ مهربان و قوناق پرورکندین اهالیسی وار. دوزدی نیجه ایلدیر شاهسونچلیک حیاتی سورمیلر اما هله ده اونین عادت و عنعنه سی بو طایفانین آداملارنین آراسیندا حاکیمدیر. بو کندین 90 فایزی بیربیریله چوخ یاخین قوهوملیقلاری وار و منیم دایی لاریم و خالالاریم بو کتده یاشیلارو من چوخ تزتز بو کنده گیدردیم. بو کتده منیم اسماعیل آدلی دایی اوغلوم واردی، کنده یتیشن همی یانیمدا حاضیراولاردی و اودا بیلیردیکی منیم ان سئوملی گزمک یریم هارادی. قوهوم قبیله کی توپلاشیردیلارکی منی گورسینلر بهانیله آرادان چخیب و تزلیکله 10 نفره یاخین اوشاقی توپلیاردیق و ماشین یا تراختورلا سرحده گیدردیک. اوشاقلار سرحده باش وئرن اوز خاطره لرینی یول اوزونی دانیشاردیلار. سرحدین اوتایندا فعله لرین نیجه ایشله مگیندن و قادینلارین پامبوق یغمالاریندن و کتدیلرین قویونلارنین سرحدی پوزماسیندان و چر علی نین روس سالداتلارنین قرارگاهیندان اوغورلیقیندان و… اما ان شیرین خاطره خالام اوغلو رسولین قویونلارنین سرحدی کچمگینی چوخ یاغلی دوزلی اوشاقلار گوله گوله دیردیلر. گویا بیرگون رسولین قویونلاری کچر سویت آذربایجان طرفینه و روس عسکرلرده سرحد بویو دوزلوب قارول وئریرمیشلر قورخوسوندان سرحده دایانار، اوزون توتوب سالداتلارا طرف دیرکی آی مشهدی اوروس هی، سن ابوالفضل او قویونلاری قایتار بویانا. روس عسکرلرینی چاغیرسیدیندا قایدیب باخمازدیلار، اوزلرینی توتاردیلار سویت آذربایجانی طرفینه و آرخالاری قالاردی بیزه طرف، داش آتاسیدیندا قایدیب باخمازدیلار.
بیزین ان سئوملی و سئوینجلی گونلریمیز او واخت اولوردیکی سویت آذربایجانی طرفینده فعله لرگلیب او تایدا ایشلیردی. بیزه اسماعیل، نیجه سرحده داورانماغی اورگدیردی، بیله چاغیرین، بیله دانیشین، قورخمیون، بیله ایله سنیز روس سالداتلاری سیزه رئاکسیا وئرجکلر. بیزده آنجاق ایستیردیکی نه اولور اولسون اولار بیزین حرکت لریمیزه رئاکسیا وئرسینلراما اولارایله بیلکی بیر جانسیز هیکلیدیلرکی اورا قویمیشدیلار حتی بیربیریله ده دانیشمیردیلار.اسماعیل بیزه بیر شعر اورگتمیشدی کی هاملیغا بیردن اخویاق او شعری اسماعیل هاردان اورگنمیشدی هله ده بیلمیریک او چوخ دویغولو و کورک بیر انسانیدی اونین سیاسی ساوادی اولماسادا او زامان چوخ گوزل بیر دوشونجه سی واریدی ایلینه و دیلینه باغلی بیر شخصیدی هامیمیز آغیز اغیزا وریب اخویاردیق
اولدوزلاری سایا سایا
انسان ایاق قویور آیا
نیه بو تایدان او تایا
کچمیرم سندن آراز
هله ده بیلمیرم بو شعرکیمدندی امابیز حتی مضمونین بیلمدن 10 یاخین اوشاق بیر مارش کیمی تکرار تکراراخویوردیق هیچ بیر سیاسی دوشونجه صاحبیده دیلدیک آخی هله بیزین 10 یاشیمیز یوخیدیر اما ایندیده منه تعجب دوغران بودورکی بو دویغو بو دوشونجه بیزه هاردان الهام اولموشدی. نیچه دقیقه کچمدن گوریردیک اوتایدان فعله لرین ایچیندن قاراگیله ماهنی سیلا جواب ویردیلر. بونون معناسینی او زامانلار دویا بیلمیردیکی بو ماهنی هانسی مفهوملار داشیر بلکه ده بو ماهنینی اخویاندا بیزین کیمی بیلمیردی؟ نه بیلیم کی؟
دوغروسی بیلمک اولمورکی طالع انسانین آلنینا نه یازیر. گونلر، آیلار، ایل لر اوتدی بویا باشا چاتدیم، آغلیما گلمین بیله باشیما گلدی. طالع بیله گتیردیکی من اوزیم اوتایا گتدیم. ایلده نیجه دفعه باکیدن ایمیشلی شهرینه گیدیردیم همان سرحده دوروب ، وطنین عطرینی دویام . بو دفعه ده اوتایدان دوروب بو تایا باخیردیم اما بو دفعه هر ایکی طرفدن گورسنیردیکی نیجه قالین قایم مفتیل لری کچمیشدنده محکم سرحدلرده بر پا ایدیبلر سرحدده قو ویریردین قولاق توتیلیردی، همین شعری ینه اوز اوزومه زومزومه ایدیردیم اما نه اوتایدا اوشاقلار واریدی نه بو تایدا فعله لر نه منیم سسیمه قارا گیله نی اوخویان؟