اوستاد ميرهدايت حصاری نين بو آخشام شنليک مراسيمی کئچيريلير.

ميرموسی هاشمی

آنا يوردوم آذربايجان

ای آنا تورپاغيم! ای آذربايجان!

قوی آرتسين گون به گون شووکه تين سنين

اصلان لار بئجه ره ن ايگيت لر دوغان،

ياييلسين عالمه شوهره تين سنين.

ميرهدايت حصاری

حؤرمتلی خانيملار، بيگلر، عزيز قوناقلار، آخشامينيز خير!

آذربايجان سماسی نين ايشيقلی اولدوزلاريندان بيری ساييلان اوستاد ميرهدايت حصاری نين بو آخشام شنليک مراسيمی کئچيريلير.

وارليغين سسی درگیسينده چاليشان، قلمداشلاريمين طرفيندن هامينيزی صميم قلبدن سالاملاييرام. و آوروپانين آيری- آيری اؤلکه لريندن، هابئله ايسوچين باشقا شهرلريندن اوزاق يوللار گليب، بو محتشم مراسمده اشتراکينيزا گؤره، مينتداريق.

دوغوردان داکی، بو آخشام بيز خارجده ياشايان آذربايجانليلار اوچون اونودولماز و ياد دا قالان گئجه لردن بيری دير.

بونا گؤره کی، اوستاد ميرهدايت حصاری نين 75- جی ايل دؤنومو و عؤمور بويو ميللی و مدنی چاليشمالاری مناسبتينه گؤره بير آرايا توپلانميشيق. ياخيندان- اوزاقدان گلن عزيز قوناقلاريميزين اوستاد حصاری نين احاطه سينه توپلاشمالاريندان و اودلار يوردونون بير پارچاسينی بو گئجه يه گتيرن سويداشلاريميزدان، اؤزوموزده غرور دويوروق.

اوستاديميزا گؤستريلن بو قايغی وقيمت بير داها ثبوت ائديرکی، خالقيميز، ائل- اوباسينا باغلی اولان عاليم لرينه سايغی ايله ياناشير و بيز بونونلا فخر ائديريک.

صبيرسيزليکله يولونو گؤزلدييميز، هاميميزين سويمليميز، گؤرکملی عاليم اوستاد حصاری بو گون بيزيم قوناغيميزدير. «آ»

اوستاد حصاری! هاميميز بيليريک کی، گنج ياشلارينيزدان، بوگونه قدر، يوکسک انرژی و اراده نيزی ايتيرمه دن خالقينيز اوغرونداچاليشمالارينيزا دوام ائديرسينيز. 60 جيلد کتاب مؤلفی سينيز. چئشيتلی ساحه لرده 2250 مقاله يازميسينيز چوخلو مونوگرافيلار يازيب، اؤز يئرينده چوخلارينی آيدينلاشديريب و شبهه لی کتابلاری تنقيد ائديب و اؤز علمی نظرلرينيزی وئرميسينيز! سيز! قديمی لر ايچينده نادر عاليملردن سينيز کی، چاغداش فيکيرله، يئنی نسيل ايله آياقلاشيرسينيز. بو ساحه ده، آرتيق معلوماتی عزيز و قوجامان آغ ساققاليميز، اوستاد فرزانه دن ائشيدمه گيميز داها ماراقلی اولاجاق.

آذربايجان ميللتی حق شناس بير ميللت دير. و بوگون بورادا گؤستريلن، تبريک و آلقيشلار دا تصادفی دئييل.

اوستاد حصاری چوخ خوشبخت بير اينسان دير. چونکی نادر بير اينسانا نصيب اولور، بو خوشبختليک کی، سرحدلردن ائشيکده اونون بو قدر ايستکلی دوستو و باجی و قارداشی اولسون. اوستادا داها، نئچه بئله گؤزل يوبلئی ايللری آرزيلاييريق.

ايندی اجازه ايسترديم، اوستادی هاميميزين آلقيشلاری ايله اؤز يئرينه دعوت ائديب و بو گونکو طنطنه لی يوبلئی مراسمينی آچيق اعلان ائديم. «آ» ساغ اولون

وارليغين سسی درگی سی نين مدير مسئولو، ميرموسی هاشمی

ايسوچ – مالمو 10-9-2005