ميرموسی هاشمی
ای اؤلکه می ظولم ايله قويان دهرده ويران،
محکوم اولابيلمز سنه بوندان سونرا اينسان،
اينسان ازليندن يارانييب اشرف خلقت،
لاييق دئييل اصلا، اونا زنجير اسارت.
محمد بی ريا
مقدمه:
… سؤزومه يوخاريدا سيتات (سند)کيمی قلمه آلديغيم،داهی شاعيريميز مرحوم محمدبی ريا- نين«ارتجاعه خطاب» شعريندن بير بيتی ايله باشلاديم. صحبت بيرداها آذربايجان و اودلار دياری نين قايغی کش اينسانلاريندان گئدير. بوتون اينسانلاری (دونيانين آيری- آيری جغرافی بؤلگه لرينده ياشامالاريندان، هانسی ميللته منصوب اولمالاريندان آسيلی اولماياراق) سئويرم و هامييا آزادليق و سعادت آرزيلاييرام. آمما طبيعی کی، آذربايجان و بو تورپاغين اولادلارينا اولان سئوگيم سونسوزدور.
آذربايجانين تانينميش ضيياليلری، گؤرکملی قلم اوستالاری بو اؤلکه ده باش وئرن حادثه لری، بوتون حقيقت لری اوزه چيخارماق اوچون ايللرديرکی، کسرلی قلم لری ايله يازيب- يارادير و بو حقيقت لرين گئنيش کوتله يه ياييلماسی اوغروندا فداکارجاسينا مبارزه لرينی داوام ائديرلر. آنجاق زنگين موسيقيميز، موغام، عاشيق ماهنيلاريميز، اينجه صنعت خادملريميزين فعالييت گؤسترمه لری نتيجه سينده، بوتون دونيادا آذربايجان موسيقی سينين داهی ليينه قيمت وئرن لرين قلب لرينده ارزونه مخصوص يئر توتوب. آرتيق دييه بيله ريک کی، ميللی- مدنی فعاللاريميزين دوزگون مبارزه لری نتيجه سينده، آذربايجانين ميللی- دموکراتيک حرکتی نين فعاليتی گئتديکجه آرتماقدادير. طبيعی کی، بو ديرچليش، خالقيميزی سئوينديرديگی قدر، ميللتی ظولمات ايچينده ساخلاماغا جهد گؤسترن مستعمره چی لری دريندن کدرلنديرير. آذربايجان ضدينه آتيلان آدديملار بونا باريز ثبوت دير.
جاری ايل، مای آيی نين دؤردونده «راديو فردا» انترنت سايتيندا، ميرحسين موسوی- نين: «ايرانين هئچ يئرينده، تجزيه طلب لرين يئری يوخدوز» باشليغی ايله، بير يازينی اوخودوم و آنلاديم کی، بو يازيدا باشقا مقاملارا (مسئله لره) ايشاره اولونسادا، يازينين متنينده کی، «تجزيه طلب» سؤزو هئچ ده تصادفی دئييل دير.
البته کی، بئله بير باشليغی سئچمک، بو آغالار اوچون (اؤزلليکله ايرانين بئله بير دوروموندا) تصادفی حال اولا بيلمز. چونکی، گونئی آذربايجاندا اويانيش و ديرچليش پروسسلری دونيانين باشقا اينکشافدا اولان اؤلکه لری کيمی سرعتله ايره لی له يير. بعضی اؤلکه لرده، ميللی مسئله اؤز حللينی آرتيق تاپيب، يادا، تاپماقدادير. بو سون اون ايلليکلرده اسکی سويت، يوگسلاويا، چکسلاواکيانين پارچالانماسی و آلمانيا، يمن، ويتنام و سايره … اؤلکه لرين بيرلشمه سی گؤز اؤنونده دير.
آيدين گؤرونورکی، آغا ميرحسين موسوی- نين، ميللی مسئله يه منفی باخماسی دا تصادفی حال دئييل. بئله کی، او، و هم فيکيرلری، ايرانين سياسی خريطه سينده يئرله شن غيرفارس ميللتلرين آزاد اولماسيندان تشويشه دوشوبلر. خصوصيله گونئی آذربايجاندا ميللی- دموکراتيک حرکتين خالق طرفيندن دستکلنمه سی، بوتون مستعمره چی پان ايرانيست لرين يوخولارينی قاچيريب.
تجزيه طلب ندير؟
هربيراينسان بيليرکی، «تجزيه طلب» سؤزو تورپاق اوچون علمی آنلام داشيمير. يعنی هر کند، شهر، ايالت، اؤلکه نين تکجه جغرافی باخيمی ايله يوخ همده، اؤز تاريخی و ائتنيک آدلاری ايله تانينميشدير. مرحوم ميرجعفر پيشه وری دئييب: «تجزيه يالنيز کيميا علمينده استفاده اولونا بيلر»
آچيغينی دئسک، تجزيه طلب سؤزو پهلويلرحاکيميتی دؤورونده، خالقيميزين ميللی ايستکلری نين قارشيسينی آلماق بهانه سیله اورتايا آتيليب. پهلوی رژيمی گه ره کسيز اتهاملار ايله 1945- جی ايلده خارجی دؤولتلرين حمايه سينه سؤيکه نه ره ک، اؤز قددار اوردوسو ايله تورپاقلاريميزا سوخولدو و برابر گوجه مالک اولمايان ساواشدا آذربايجانين ميللی حکومتينی قان ايچينده بوغدو و بونونلادا خالقيميزا ديوان توتدو. بو دهشتلی يوروش نتيجه سينده يوزلرله آذربايجانين صادق اولادلاری شهيد اولدو و مينلرجه سويداشيميز آنا ديارلارينی ترک ائتمک محبوريتينده قالدی …
يازيقلار اولسون کی، ميللی مسئله قارشيسيندا عاجز قالان پان ايرانيستلر، هله ده تجزيه طلب سؤزوندن سلاح کيمی استفاده ائديرلر. منه بئله گلير کی، بو «حضرت لر» پهلوی دؤورونده يازانان معروف، بئش فراماسونری: «کوروش 1960- آريا 1960- خيام 1962- صفا 1963- اصفهان 1968، لژلارين، وارث لری دير. بودا اونو گؤستريرکی، غيردموکراتيک مفکوره يه مالک اولانلاردان دموکراتييا معجزه سی گؤزله مک ساده جه ساده لوحلوقدور.
ارتجاعی قووه لر، هر زامان بوتون قووه لری ايله غيرفارس ميللتلرين ميللی وارليقلارينی محو ائتمک اوچون اللريندن گه له نی اديبلر. 21- جی عصرين آرتيق 10- جو ايلينی ياشاماغيميزا باخماياراق، بو آغالار، چئشيتلی اتهاملاری ايله و سؤزون اصل معناسيندا، آسيب- کسمه لری ايله آسيميلاسييا (اريتمه) سياستلرينی رياکارجاسينا داوام ائتديرمکده ديرلر.
بوگون «ياشيل حرکت» آدی داشايان جريانين باشيندا دوران آغا مهندس ميرحسين موسوی، بير طرفدن ايراندا اساسلی قانونون اجراسی نين لابدليينی (ضرورتينی) وورغولايير، و باشقا طرفدن غيرفارس ميللتلرين ميللی آزادليقلارينين غيرممکونلويونو اشاره ائده ره ک، تجزيه طلب سؤزوندن استفاده ائدير. بير- بيری ايله ضيد خاراکتر داشايان، غير منطيقلی اتهاملارا نه قدر دؤزمک اولار؟! تاسفله دئمک لازيم ديرکی، هردفعه اولدوغو کيمی، بو دفعه ده بيزه آتيلان داش اؤز ميللتيميزدن اولان «مانقورت» لاردير (اصلينی دانان).
ياشيل حرکتيندن بيزه نه؟!
آتالاريميز دئييب: «آيی نين مين بير اويونو وار، هاميسی آرمود باشيندا». بو سؤزون نه قدر يئرينه دوشدويونو بوگون ده بيرداها شاهدی اولوروق. آرتيق 32 ايلديرکی، ايرانين اصلاحاتچی قووه لری، غيرفارس خالقلاری نين اينسان حقوقلارينی کبود (خشن) صورتده پوزورلار. يئنه، اقتداری الده ائتمک اوچون «ياشيل حرکت» شعاری ايله بار- بار باغيران حضرتلری، بوگون آنا ياسانين (اساسی قانونون) حياتا کئچمه سينی طلب ائديرلر. يئری گلميشکن دئمه لييک: … اؤزونوزسونوز!!!
هاميميزا آيدين ديرکی، ايراندا، اساس قانونون حياتا کئچمه سی غيرممکوندور. چونکی، ايرانين توتاليتر رژيملری نين تملی غيردموکراتيک اساسيندا قورولوب و ميللی ماهييت داشيمير. دئملی بئله بير شرايطده تربيه اولان موهومدان آزادليق گؤزله مک عبث دير. بوگون، دموکراتييا ادعاسينی اللرينده سلاح ائدن حضرتلر، يالنيز و يالنيز خالقلارين اعتبارينی قازانماق اوچون اؤزلرينی دموکرات کيمی قلمه وئريرلر.
1381- جی گونش ايلی، 70 نفر گونئی آذربايجان ضيياليلری و پارلمنت تمثيچیلرينين امضاسی ايله آذربايجانلا باغلی 8 ماده دن عبارت اولان طلب لر ايران پرزيدنتی آغا محمد خاتمی- يه گؤندريلميشدی. بو مکتوب ايستر داخيلده و ايسترسه ده خاريجده ماراقلا قارشيلانسادا، نتيجه ده جوابسيز قالدی. گؤره سن، يوزلرله بئله مکتوبلارين يا شفاهی موراجعتلرين جوابسيز قالماسينی، ياشيل حرکتچيلر نئجه معنالانديرير؟ گؤره سن، آذربايجاندا باش وئرن حقيقت لرين ايشيقلانديرماغا چاليشان نشريتلارين (شمس تبريز- نويد آذربايجان- اميد زنحان- اورمو سسی، اروين خوی و سايره … ) اصلاحاتچيلار دورانيندا اوزلشديکلری ياساقلاری، و وطن پرور يازارلارين قلم لری نين دوندورولماسينی، نهايت ميللی- مدنی فعاللاريميزين زندانلاردا ايشکنجه لره معروض قالماسينی و اؤلدورولمه لرينی، خالقيميز اونودا بيلرمی؟
1385- جی گونش ايلين خرداد (مای) آييندا، ايران دؤولت روزنامه سينده تورکلره قارشی سؤيله ديکلری شرلردن سونرا، آذربايجان ايچينده باش وئرن چاخناشمانی يوخاريدا اوتورانلار ياخشی گؤردی. کوچه لرده، خياوانلاردا، اعتراض دالغالاری نتيجه سينده اونلارلا سويداشيميز ايسلام رژيمی طرفيندن قتله يئتيريلدی، يوزلرله اينسان حبس ائديلدی و ايشکنجه لره معروض قالدی، چوخلاری يارالاندی يادا، آنا يوردونو ترک ائتمک مجبوريتينده قالدی. ياشيل حرکتين تمثيلچيلرينين او زامان بوتون بو گئديشاتی سوساراق کناردان ايزلمه سی و ايقتدارين تؤرتديگی بو جنايت لره گؤز يومماسينی نئحه قيمتلنديرمک اولار؟ تبريزدن بيرنئجه اصلاحاتچی حضراتين، تهراندا آغا ميرحسين موسوی ايله گؤروشلری بيزيم اوچون تعجب دوغورمور. چونکی، بئله بير آداملار، پهلويلر دؤوروندن تا ايسلام حاکميتی دؤورونه قدر آذربايجانين، تورپاغيندان، سويوندان، هاواسيندان و بوتون نعمت لريندن فايدالانمالارينا باخماياراق، اؤز يارارلارينی آذربايجان خالقی نين يارارلاريندان داها اوستون توتوبلار. باشدا اوتورانلارسا اونلاردان اويونجاق کيمی استفاده ائديبلر. تاريخ بو حقيقتی ده ثبوت ائدير.
يئری گلميشکن، رحمتليک ميرزه علی اکبر صابرين شعيريندن ايکی سطر آشاغيدا قيد ائتمک ايسته ييرم:
«ميللت نئجه تاراج اولور- اولسون، نه ايشين وار؟!
دوشمنلره محتاج اولور- اولسون، نه ايشين وار؟!»
سئوينديريجی حال ديرکی، غيرفارس ميللت لر، تاريخين آجی صحيفه لريندن درس آلاراق، آلداديجی شعارلاری دوياراق ياشيل حرکته قاتيلماقدان امتناء ائتديلر. اؤزلليکله آذربايجان تورکلری نين بو مسئله ده کسکين قرارلاری اولدوقجا يوکسک خاراکتر داشيير.
سون سؤز:
بوگون انترنت عصری دير، قلوباللاشما دؤورودور، آرتيق مظلوم ميللتلر آييليب، امپريالار ديزه چؤکور، مستعمره چيليک آنلاملارينا سون قويولور. بوگون، اهاليسی بيرميليوندان آز اولان دونيانين 40 اؤلکه سی، بيرلشميش ميللتلرين عضوی دير و سرعتله اينکشاف ائدير.
تاريخين حؤکمو ايله، بوتون تمامييتچيلر (ايرانين بوتؤولوگون ايستينلر)، گونئی آذربايجاندا معنوی بير انقلاب و اخلاقی بير دئيشيکليک ايستقامتينده يؤنه لن آذربايجان ميللی حرکتين مطلق تانيماق مجبوريتينده ديرلر. عکس تقديرده خالقيميز، پان تورکيزم، تجزيه طلب و سايره… دامغالارينی قبول ائتميه جک و ميللی مبارزه يولوندا بيرآدديم بئله گئری چکيلمه يه جکدير. بونو هرکس ائشيديب و ياخشی بيلسين!
کئچميش يوگسلاوييادا ميلوسئويچ و اونون مسلکداشلاری نين يالنيز شونيزم پرنسيپ لرينه آرخالاناراق صربلردن باشقا ميللت لره قارشی توتدوغو ميللتچيليک موقعی سوندا بو اؤلکه نين سقوطونا گتيريب چيخارتدی. بو حادثه فارش شوونيزمينه باريز اؤرنک اولماليدير!
بوگون ايرانين سياسی جغرافياسيندا غيرفارس ميللتلرينی، «تجزيه طلب» اتهامی ايله هده له مک، ان آزی انصافسيزليق دير. بيز، بو آغالارا اوز توتوب دئييريک: آزادليق و استقلال ايسته ين ميللت لر اوچون قولاقلارينيز ائشيدسين و گؤزلرينيز گؤرسون. گونو- گوندن اينکشاف ائدن مدرن دونياسينا باخين! گلين بو اؤنملی مسئله نی دانماق يئرينه، بشر حقوقلاری و آزاد سئچيملر اساسيندا، بونا دوزگون چيخيش يولو آختاريب- تاپاق!
بوگون، ايران وطنداشليغيندان صحبت گئتمير. بوگون، حتی اينسان حقوقلاريندان دا صحبت گئتمير. بوگون، آنا ياسانين حياتا کئچيب- کئچمه سيندن ده سؤز آچميريق. آرتيق ايسلام انقلابيندان 32 ايل کئچيب. آمما هله ده دونيا ايجتماعيتی نين گؤزو اؤنونده بوتون غيرفارس ميللت لر اؤز آنا ديليندن محروم قاليبلار. بس بو، بير اينسان فاجعه سيله سونوجلانان تاريخی بير جنايت و اينسانا قارشی خيانت دئييل می؟ بئله ليکله، بوگون بيز آذربايجان تورکونون، مدنی، ايجتماعی، ايقتصادی و سياسی حقوقلارينين غيردموکراتيک شکيلده پوزولماسيندان دانيشيريق. ميللی وارليغين يوخا چيخماسيندان سؤز آچيريق. مگر ميللی وارليغی محو اولان بير ميللتين ياشاماغا حاقی وارمی؟
ائله بوناگؤره ده، آذربايجانين مغرور و قورخماز خالقی، خصوصيله چوخلوغو تشکيل ائدن گنج نسيل، ميللی فاجعه نی دريندن حيس ائدير و اؤزو- اؤز طالعين الده ائتمک اوغروندا، مدنی مبارزه سينی داوام ائتديرير. اينانيرام کی، آذربايجانين غيرتلی اوغول و قيزلاری يادلار طرفيندن تاپدالانان ميللی وارليغينی و کيمليگينی تئزليکله برپا ائده جک و آزادليغينی الده ائتمک اوچون قارشسيندا دوران مانع لری مغرورجاسينا يوخ ائده جکدير. او گونه چوخ آز قالييب. بو قوتسال (مقدس) لاکين داشلی- چينقيللی يوللاردان متانت و دؤزومله کئچمه يی باجارمالييق!!!
ميرموسی هاشمی
مالمو- ايسوچ
20 مای 2010