Close Menu
    Facebook Instagram X (Twitter) Telegram YouTube WhatsApp RSS
    جمعه, دسامبر 1, 2023
    Facebook X (Twitter) Instagram YouTube Telegram WhatsApp RSS
    وارلیغین سسی
    • آنا صحیفه
    • حاققیمیزدا
    • مقاله‌لر
      • گوندلیک
      • مصاحبه
      • ادبیات
      • تاریخ
      • شعر
    • علاقه
    وارلیغین سسی
    سیز بورداسینیزHome»گوندلیک»دیلده عیرقچیلیک و میلیتاریزم
    گوندلیک

    دیلده عیرقچیلیک و میلیتاریزم

    اکتبر 5, 2011
    پایلاش
    Facebook Twitter LinkedIn Pinterest Email Tumblr Reddit VKontakte Telegram WhatsApp

    گونتای گنجالپ

    آچیق توپلومدا بیرئیلرین 1 و اؤبکلرین 2 اعتیراض و الشدیری3 حاقلاری وار. آچیق توپلومدا قوللانیلان دیلله قاپالی توپلومدا قوللانیلان دیلین ایچه ریک4 و آماج اولاراق آیریشدیقلاری5 یئرلر وار. قاپالی توپلوملاردا سیاسی ایقتیدارلار بیرئی دوزئیینده6 عیرقچیلیک و توپلومسال دوزئیده ایسه، میلیتاریزمی یایقینلاشدیرارلار. عیرقچیلیک و میلیتاریزم آماجلارینا گؤره سؤیله م7 گلیشدیریلر. سؤیله م دیل ایچینده دیل اولدوغوندان دولایی زامانلا عیرقچی و میلیتاریست سؤیله ملر دیلی خوشونت و آقرئسسیولیکله دولدورار. عیرقچی و میلیتاریست قاوراملار دیلین ایچینده یئرلشدیکچه او توپلومدا یاشایان بیرئیلرین پسیکولوژیسی ده عیرقچیلییه و میلیتاریزمه یاتقینلاشیب اویوملو دوروما گلر. بو دورومدا بئیینده وار اولان قاوراملار، یالنیز شیددت و آقرئسسیولیک چاغریشدیرار. قاوراملار دونیاگؤروشونو بیچیملندیردیگیندن دولایی، سالدیرقان دوشونجه لر بیرئیلرین قافاسیندان و داورانیشلاریندان توپلومسال ساحه یه یانسیماغا باشلار. عیرقچی و میلیتاریست ایدئولوژی اوچون گه رَکَن ده آقرئسسیو بیرئی و توپلومسال داورانیش پوزوقلوقلاریدیر. حاکیم ایدئولوژی عیرقچی و میلیتاریست سؤیله ملری ایله، یالنیز آقرئسسیولییه اولاناق ساغلایان قاوراملار اوره ته ر. توپلوم بو قاوراملاری اؤز بللگینده8 یئرلشدیریب و داورانیشلاریندا سرگیله دیکچه عیرقچی و میلیتاریست ایدئولوژی اؤز آماجینا چاتمیش اولار. چونکو بیرئی و توپلوم، آنجاق دیلین ایچینده کی قاوراملارلا ایله تیشیم9 قورا بیلیر. بیرئیین اؤز ذهنینده کینی آنلاتماسی، باشقا ذهنلرله ایلیشکییه10 گیرمه سی، چئوره نی آنلاماسی، آنجاق قاوراملار دولاییسییلا اولدوغوندان، یالنیز بیر یؤنده ائییتیلیر: عیرقچیلیک و میلیتاریزم. قاپالیلیق و دئسپوتیزمین ایلکه لری ایله یؤنه تیلن11 اؤلکه لرده موخالیفت ده عیرقچی و میلیتاریست سؤیله ملرین دیشینا چیخا بیلمیر. چونکو موخالیفت اوچون طرفدار لازیمدیر. طرفداری بو توپلومون ایچیندن تاپمالیدیر. بو توپلومون دا آلیشدیغی و قولایجا تپکی12 گؤستره بیله جگی قاوراملار وار. بو قاوراملاردان ایستیفاده ائدیلمزسه، توپلوم ایچینده یانداش تاپماق مومکون اولماز. عیرقچی و میلیتاریست سؤیله م سورکلی بیر دوشمنین وار اولدوغونو تلقین ائدر. بو دوشمن گئرچک حیاتدا اولماسا دا اونو «جین»لر، «شئیطان»لار شکلینده خیال دونیاسیندا اویدورار. بؤیله جه قاپالی رئژیملرده هر بیرئی ازبرله دیگی بیلگیلره و عاغلینداکی قاوراملارا گؤره داوراندیغی اوچون سورکلی دوشمن قورخوسو ایله یاشار. سینیرلارین اؤته سینده کی13 بوتون اؤلکه لر دوشمندیر و گئجه-گوندوز فیتنه ایله مشغولدورلار. دیوار قونشو دوشمندیر، کیچیک بیر غفلت سونوجوندا ضربه سینی ووراجاق. من ده قونشومون دوشمنییم، چونکو اونو دوشمن گؤرورم. اؤنومدن کئچن آرابانین سوروجوسو تام اولاراق بیر دوشمن.

    دیلده عیرقچیلیک و میلیتاریست سؤیله ملر گلیشدیرن رئژیملر اؤزلری ده هر بیر وطنداشی بیر دوشمن اولاراق گؤرَر. چونکو ایناناراق بو قاوراملاری اورَتمیشلر.14 ایناندیقلارینا ایناندیرماق ایسته میشلر. قاپالی رئژیملر تاریخ بویونجا بیرئی دوزئیینده عیرقچیلیک و توپلوم دوزئیینده میلیتاریست بیلگیلر اورَتمکده چوخ باشاریلی اولموشلار. چونکو قآپالی توپلوملاردا رئژیملرین الینده بؤیوک سرمایه لر اولور. بو سرمایه نین میقداری، نئجه بیریکیب15 تکه للشدیگی16 ایله ایلگیلی توپلوم بیلگیسیز قالمالیدیر. توپلومون بیلگیسیز قالماسی اوچون، اونا باشقا بیلگیلر سونماق گره کیر. آچیق توپلوملاردا بیرئیلرین، اؤبکلرین دوشونمه و الشدیرمه حاققی اولدوغوندان دولایی، عیرقچی و میلیتاریست سؤیله ملره احتییاج قالماز. بو اوزدن ده قاپالی رئژیملرده اینسان حاقلاری، تمل حاق و اؤزگورلوکلر کیمی سؤیله ملره یئر اولماز.

    1 Birey-fərd.

    2 Öbək- qrup, dəstə.

    3 Ələşdiri- tənqid.

    4 İçərik- məzmun.

    5 Ayrışdıqları- fərqləndikləri.

    6 Düzey- səviyyə.

    7 سؤیله م- گقتمان

    8 Bəllək- zehn.

    9 İlətişim- irtibat.

    10 İlişki-əlaqə.

    11 Yönətilən- idarə edilən.

    12 Təpki- əks-ül əməl.

    13 اؤته- فرا

    14 Ürətmək- تولید ائتمک

    15 Birikmək- جمع شدن

    16 Təkəl- inhisar, təkəlləşmək- inhisarlaşmaq.

    Share. Facebook Twitter Pinterest LinkedIn Tumblr Email Reddit VKontakte Telegram WhatsApp

    یازی ایله باغلی

    دوقتور ضياء صدر الاشرافی نين طنطنه لی 77 ايلليک ياش يوبيلئيی مناسبتينه اؤن سؤز

    نوامبر 20, 2023

    دوقتور ضياء صدر الاشرافی نين اؤتوبیوقرافيياسی

    نوامبر 20, 2023

    دوقتور ضياء صدر الاشرافی نين چيخيشی

    نوامبر 20, 2023
    Facebook X (Twitter) Instagram Telegram WhatsApp YouTube RSS
    وارلیغین سسی ۱۹۹۹-۲۰۲۳ موعلف حقوقلاری گورونور. معلوماتدان ایستفاده ادرکن لینکدن ایستیناد اولونمالیدیر. © 2023

    Type above and press Enter to search. Press Esc to cancel.

    Go to mobile version