قوزئی آذربایجانا مذهب ترانسفئری – رافیق تاغی تراژدیسی

گونای تبریزی

دین، هربیر توپلومون تمل ساییلا بیله­جک عنصرلریندن بیریدیر. اگر آتئییستلر، بعضی آشیری (افراطی) ایدئولوژیلر و یا مالیخولیایی دوشونجه لر منسوبلارینی سایماساق ، کیمسه بو عنصرو اؤنجه دن و هر زامان توپلومدا نئگاتیو بیر ائیلم و یا گئری قالما ندنی اولاراق حئساب ائتمیر. نئجه کی دین رولونو توپلومدا هر زامان و هر دورومدا پوزیتیو حئساب ائتمکده یانلیشدیر.

توپلومسال آراشدیرمالاردا دین عنصرونون (و اوندان تؤره دیلن مذهبلرین) داخیل اولماسی یئنی بیر شئی دئییل و بیر چوخ آراشدیرمالاردا بونا راست گلمک اولار. اونلو “ماکس وئبر”ین پروتستان یورومو بیر چوخوموزا ایلک یادا دوشن اؤرنکدیر.

قوزئی آذربایجانیمیزدا، گونئیدن بیرآز فرقلی اولاراق، مذهب (بورادا شیعه) او قدر گوجلو دئییل. دین (بورادا اسلام) واردیر. کیمسه نین بونا اعتراضی دا یوخ ، توپلوم دا بوندان راحاتسیز دئییل ، حتی اونو قوروماغا نییتلی ده گؤرونور. آنجاق اونلاردا دا ، دینین ضعیفلنمه سی و مذهبین گوجلنمه سی احتمالی هر زامان یوکسکدیر. ندن؟ چونکو اونلاردان اؤنجه بو یولا آددیم باسان گونئی توپلومو ، هله ده بیر دوروم ده­یرلندیرمه سی یاپماقدان ، قازاندیغینی و ایتیردی یینی آنلاماق و دونیایا (یادا ان آزیندان آیری دوشموش قارداش توپلوملارینا) آختارماقدان عاجیزدیر ، نه یازیق کی.

اگر بیر توپلوم دیندن (و هر نه ییندن) نه آختاردیغینی و نه ایسته دی یینی بیلمزسه ، و بو قونودا یئنی باخیشلار و یئنی دوشونجه لری آلدیرمازسا ، او زامان گلر مذهب و باشقا ایدئولوژیلر تورونا دوشر و ایللر بویو سؤمورگلنمه­یه محکوم اولار. بونلاری دوشونمک و تاشینماق زامانی بیزلرده چوخدان گلیب ده کئچیب ، آنجاق دونیانی ساده جه اؤز دار سیاسی ایدئولوژیلرینده خلاصه ائدنلرین بو قونودا نه قدر محافظه کار یاناشمالارینی اینسان گؤرونجه ، سیاستین ماکیاولیستی اوزوندن اوره یی بولانیر.

بو سانال و دوزه­لتیلمیش اؤلکه ده (ایران) ، یئنه دوزه­لتیلمیش بیر مذهبین المینی داشیماغی سویداشلارینا فخر ساییب ، بو دورومون بیرآز اولسون ده­ییشمه­سینه ایلک تپکی گؤسترن ، و اوسته لیک میللت سؤزوده آغیزلاریندان دوشمه­ین اینسانلار وار. بو ، “میللت”له “امت”ین فرقینی بیلمه­مک دئییل­ده نه­دیر؟

***

“تزه­پیر ده اخلاق ریاکار بیر رول ایدی. دیللر “شاه حسین ، واه ، حسین!” قیشقیریر ، باشلار سا دقتی آیری یئره چکیر. بوردا حقیقتله یالان چارپیشیردی. حقیقت طرفدارلاری اکثریتدی. بو مقدس حزن گونونده تفکرلر ماکسیمم ایکی­لشیر ، هر شئی شیطانی­لشیردی. قتل گونو شیطان دا تزه­پیره گلیر. شیطان اؤزونه بوندان صرفه­لی یئر تاپابیلمز. اصلینده گلینلر جانلارینی امام حسین یولوندا احسان دئییر…” (رافیق تاغی – عاشورا کریمینال دورومو – آلاتوران – 2004 – نو.4)

ملا­میرهاشم آغانین عاشوراسی ، ائو تیکمه سئوداسی ، فاطمه­ی زهرانین طالعی ، میرحبیب کیمی اؤولادلار و…

بونلار شخصی حیکایه لر دئییل ، بیزه چوخ تانیدیق گلن و نئرده­ایسه یاشادیغیمیز توپلوم داورانیشلاری و خصلت­لریدیرلر.

ترانسفئر ائدیلن مذهب ، رافیق تاغی کیمی یازیچی­لاردان خوشلانمیر. اوسته­لیک بیرآز دا میللی حیس داشی­سا…

***

هر شئی 2006.نجی ایلده باشلادی. صنعت قزئتینه “آوروپا و بیز” یازیسینی یایینلاماق اوچون وئرنده ، رافیق تاغی باشینا نه­لر گله­جه­یینی آز-چوخ بیلیردی (نئجه کی یازیسینین ایچینده ده اونا اشاره ائدیر).

من او یازینی اوخودوغومدا ، ایکی مسئله منه داها اؤنملی گلدی. بیرینجیسی یانلیش بیر تصورون دوزه­لتیلمه­سی ، بعضی لری ظن ائدیرلر کی باتی (غرب) مادیات مرکزی اولدوغو اوچون ، دوغو (شرق) دا معنویات مرکزیدیر. منجه رافیق تاغی او یازیسیندا ، آوروپا و خیریستیانلیغی اسلام ایله قارشیلاشدیردیغیندا بئله بیر ظنین یانلیش اولدوغونو اورتایا قویماق ایسته میش. آنجاق مذهبلرینین های-کویونه یئم آختارانلار “محمد”پئیغمبره توهین اولموشدور دئیه ائله اورتالیغی داغیتدیلار کی بونلاری دوشونمک اولمادی.

ایکینجیسی او یازیدا گونئی آذربایجانی اونوتمایاراق ، ایرانین فارس و مذهبی رژیمینی اولدوقجا اینجیتدی. رافیقین گونئی باره سینده دوشوندوکلری چوخ اؤنملی­دیر.

بئله بیر دورومدا ، هم رافیق تاغی و اونون کیمیلری سوسدورماق اوچون ، همده قوزئی­دکی مذهب ترانسفئری ایله مشغول اولان مزدورلارین گوجونو سیناماق اوچون ، اوپئراسیون باشلاتیلدی…

***

“حضور محترم مرجع عاليقدر جهان شيعه آيت الله العظمي حاج شيخ محمد فاضل لنكراني (دام عزه)

با سلام اخيرا يكي از روزنامه هاي جمهوري آذربايجان به نام ” صنعت ” مقاله ي رافيق تقي روزنامه نگار مرتد آذري را در صفحات خود درج نموده است كه مورد خشم و غضب مسلمانان منطقه قرار گرفته است . (همين مقاله همراه با ترجمه خدمتتان تقديم مي گردد.) نويسنده مقاله با تحليلي مي كوشد اروپا و دين آن را كه مسيحيت است از هر لحاظ برتر خاورميانه و دين آن را كه اسلام است از هر جهت پست و بي ارزش نشان بدهد. او در قسمتي از مقاله ساحت مقدس حضرت رسول اكرم (ص) را با كلمات ناپسند و نالايق توهين كرده تمامي مقدسات اسلام را به تمسخر گرفته و در پايان مقاله اعلام كرده است كه همه اين مطالب را آگاهانه از روي عمد نوشته است و باز هم خواهد نوشت.

ضمنا همين روزنامه بارها مقدسات اسلام را مورد هجوم و تحقير قرار داده حتي در چند شماره خود كتاب منفور “آيات شيطاني” سلمان رشدي را منتشر كرده است.

سئوال:

وظيفه مسلمانان در قبال اين امر غيرقابل تحمل چيست؟

مقلدين حضرتعالي از آذربايجان

بسمه تعالي

چنين شخصي چنانچه مسلمان زاده باشد با اعترافات مذكور مرتد است و چنانچه كافر بوده از مصاديق ساب النبي است و در هر صورت برفرض چنين اعترافاتي قتل او بر هر كسي كه دسترسي داشته باشد لازم است و مسئول روزنامه مذكور كه چنين افكار و عقائدي را با علم و توجه منتشر مي كند همين حكم را دارد. خداوند اسلام و مسلمين را از شر دشمنان حفظ فرمايد يريدون ليطفوا نورالله بافواهم والله متم نوره ولوكره الكافرون.

محمد فاضل لنکراني

4/9/85″

(بو اؤلوم حکمو ایرانین جمهوری اسلامی قزئتینده یایینلاندی و ایندیلرده بو حکمو وئرن شخصین رسمی سیته­سینده واردیر. باخ:

www.lankarani.net/far/new/view.php?ntx=104033)

محمد موحدی کی ایراندا “فاضل لنکرانی” آدی ایله تانینیر، آیت اله خمینی نین اؤزل طلبه لریندن و خمینی دن سونرا ایران حکومتی طرفیندن آچیقلانان 7 بؤیوک مجتهد دن بیری ایدی. اونون بو حکمو امضالادیقدان 7 آی سونرا اؤلدوغونو بیلیریک. مزاری قوم شهرینده دیر.

او اؤلمه­دن اؤنجه شیعه مذهبینین قانونلارینی و گله­نکلرینی قوللاناراق بؤیوک بیر ثیروت ییغمیشدیر. او پوللاری قوروماق اوچون اؤز اوغلونو مجتهد اعلان ائتدی و بوتون پوللارین اداره سینی اونا تاپیشیردی. بو قونودا اونون وصیتینده بعضی اشاره­لر واردیر. او اوغلونا تاپیشیردی کی او بؤیوک پولدان ،لندن شهرینده بیر بینا تیکیلسین و…

…میل دارم که در لندن که دروازه دنیا و خانه دوم همه کشورها است مؤسسه‌ای برای ترویج مکتب اهل بیت علیهم السلام و نشر معارف شیعه اثنی عشریه تاسیس گردد…” (بو وصیتنامه نین متنی “مرکز اسناد انقلاب اسلامی”نین سیته سینده دورور:

http://www.irdc.ir/fa/content/1764/default.aspx)

***

رافیق تاغی سون یازیسینی 10 نوامبر 2011 ده “کولیس” سیته سینه یازدی. یازی یئنه­ده ایران باره­سینده­دیر. “ایران و گلوباللاشما قاچیلمازلیغی” باشلیغینی داشییان یازی ، اولدوقجا آغیر تنقیدلری ایرانین توپلوم و حکومتینه قارشی یؤنلتمیشدیر. بو یازیدان بعضی قیسا بؤلوملر:

“…ایران آدلی بیر دؤولت آرتیق بشریت اوچون دؤزولمز اولموشدور…تورکلویون ماهیتینی آنلامامیش ، گؤزوموزه سوخدوقلاری فردوسی بئله اینسانلیق اوچون ایده­آل اولابیلمز…معاصر ایران ، آسانلیق­لا داغیلاسی میفدیر…اؤز میللتلرینین بئله یازیب-اوخوماق حاقینی تاپدالایان دینی اؤلکه رهبرلرینه قطعیا عاغیل صاحیبی دئمک اولماز…تئوکراتییایا اینسانلیق چوخدان یوخ دئییب…چاغداش دونیادا تئوکراتیک دؤولت عئیبه­جر و قورخونجدور و…” (بو یازینین تمامینی بو آدرسده اوخویا بیلیرسینیز:

http://kulis.az/xeber_%C4%B0ran_v%C9%99_qloballa%C5%9Fma_qa%C3%A7%C4%B1lmazl%C4%B1%C4%9F%C4%B1_2595.html)

و بو یازی یایینلاندیقدان 9 گون سونرا ، 19 نوامبر 2011 ده ، فاضل لنکرانی نین اؤلوم فتواسی ، باکی دا اجرا اولدو. رافیق تاغی پیچاقلاندی. الینده کیتاب اولماسایدی پیچاق اونو چوخدان دوغرامیشدی ، آنجاق کیتابین دا قالخان اولماسی بیر یئره قدر ایمیش ، رافیق خسته­خانادا…

***

گؤرونن او کی 2006 دان 2011 ایلینه قدر ، مذهب ترانسفئری داها گوجلنمیش ، مزدور و جاهیل ساییسی آرتمیشدیر. آرتیق بیر چوخ سیته و تشکیلات بو دوغرولتودا چالیشیرلار و گئنیش ماددی دستکلرله ، قوزئی ده تهلوکه لی دالغالار یاییلیر. محرم آیی یاخینلاشیر و بو سیته­لر تهدید کیمی سؤزلره آغیرلیق وئریرلر. ان کیچیک تهدیدلری “یوروویژن” موسیقی یاریشلارینین آذربایجاندا کئچیریلمه­سینه ایذین وئرمه­یه­جکلریدیر!

طبیعی­دیر کی بو تهلوکه­لرین قارشیسیندا ، ساده جه توپلومدا یئنی دوشونجه­لرین یاییلماسی ایمکانلارینی یاراتماق دایانا بیلر. اونلاری بیر گمی­یه توپلاییب دنیزده باتیرماق کیمی سؤزلرله مشغول اولانلار نه زامان اؤزلرینه گله­جکلر چوخ دوشونورم.

ایندیکی دوروم دوام ائدرسه ، گون گلر دئموکراسی­یه زورلانان حاکمیت ، یوغون بیر مذهبی باسقی ایله قارشیلاشار و دئموکراسی ایشلرسه (کی گئج-تئز ایشله­مک زوروندادیر) شریعت حکومتی بوتون (آز-چوخ قالان) آزادلیقلارا دا سون وئرر.

دئموکراسی­نین بئله بیر اوزو­ده وار…

گونای تبریزی

3/9/90