بیر میللّتین گله‌جه‌یی
بیر میللّتین گله‌جه‌یی، اؤز ميللی و دئموکراتیک دؤولتینه باغلیدیر. بئله بیر دؤولتین یارانماسی دا، اؤز ميللتی نین
ایراده‌سینه و اۇزمان کادرلاری‌نین وارلیغیندان آسیلیدیر. گۆنئی آذربایجان ميللی حرکاتی بیر دؤولت قۇرما
مۆجادیله‌سی اوْلاراق حرکاتینا داوام ائتمکده‌دیر. آذربایجان ميللی حرکاتی، سیاسی حیاتیندا گنج حرکات دیر و بو
سببدن آتیلماسی گره‌کن چوخ ساییدا آددیملارین واجیب اوْلدوغونا اینانیرام. بو آددیملارین ان اؤنملی‌سی ده
کادرولاشماقدان عیبارتدیر. بو دۇرومدا وار اوْلان دؤولت آنلاییشینا مالیک اوْلان صادق قۆّه‌لری تانی‌ییب تانیتماق،
اؤزونه مخصوص اهمیته مالیکدیر.
سوْن گۆنلرده ایستانبول شهرینده بو ایستیقامتده چوخ اؤنملی بیر یيغینجاق گرچکلشدیریلدی. بو تشبّوث، سایین دوْقتور
ضياء صدر الاشرافی جنابلاری‌نین ۷۷- جی آد گۆنو مۆناسیبتیله آکادمیک و کۆلتورل آتموسفئر ایچری‌سینده یاشاندی.
میللّته صادق و شفّاف عمل ائدن سیاسی قۆّه‌لرین قدرینی بیلمک، یئنی و مۆتخصّیص کادرلاریندا عرصه‌یه گلمه‌سینه
یاخشی شرایط یارادا بیلر. گؤرکملی عاليم دوْقتور ضياء صدر الاشرافی جنابلاری ایله بیر آرادا اوْلماق، چوخ بیلگین،
صمیمی، دۆزگون و آذربایجان سئور بیر شخصیت دن عیبارت اوْلدوغونو یاخیندان بیزه گؤسترمیش اوْلدو.
بو تشبّوث ده اَمَگی گئچن هر کسه، اؤزه للیکله ده «وارلیغین سسی» درگی‌سی‌نین ایداره هئیأتینه اؤز درین
میننتدارلیغیمی بیلدیریرم.
سایین دوْقتور ضياء صدر الاشرافی جنابلاری‌نین، ۷۷- جی آد گۆنونو بو وسیله ایله تکراردان تبریک ائدیرم و
اؤزونه، حؤرمتلی عائله‌سینه اۇزون عؤمور و مؤحکم جان ساغلیغی آرزولاییرام. سوْن اوْلاراق دا اۇمود ائدیرم کی،
یاخیندا، قوْجامان تبریز ده و اؤز دؤولت بایراغیمیزین آلتیندا داها دا طنطنه لی یۇبیلئیلرده بیرلیکده ایشتیراک ائدَک!
گۆنئی آذربایجان سسی یایین یؤنتمه‌نی
کۆرشاد آغدره‌لی
ایستانبول،
۲۱ اکتیابر ۲۰۲۳