ميرهدايت حصاري
بعضي لري دوققوز اوغوز ائلي نين 9 طايفا (تيره) اولدوغونو نظره آلاراق اوغوز كلمه سيني طايفا معناسيندا بيلميشلر. دئديگيميز اوغوز طايفاسي دا ائله بوطايفالاردان آيريليب غربه ساري كؤچوب علاقه سيني بونلاردان كسميشدي.
مجار توركولوگو نئمئت (Nemet) بئله نظر وئريركي دوققوز اوغوزحقيقتده ((دوققوز- اوق-اوز) دور و ((اوز)) كلمه سي جمع علامتي دير.
(اوزو ايزقديم توركلرده جمع علامتي ايميش) بئله ليكله اونون معناسي دوققوز اوخلار يعني دوققوز طايفالار معناسينادير.
نئجه كي كئچميشده اوغوز ائلي ايكي بؤيوك ((بوز اوق)) و ((اوچ اوق)) آدلانان بؤلگويا تيره لره بؤلونورموش. وهرتيره دن 12 طايفا آرايا چيخديقدا اوغوز ائلي 24- طايفادان تشكيل اولورموش.
بو 22يا24 طايفادان تشكيل تاپان ائلين ايسه هرطايفاسي نين آيريجادا معناسي (مهري) وهرآلتي قبيله نين ايسه بير اونقون يا توتمي وارايميش. عرب تاريخچيلري بو اوغوزلاري غزياالغزغز آدلانديريب واونو تاج العروس معنا ائتميشديرلر. نئجه كي عرب قاموسوندا دئيلير- ((الغزغز كهدهد جنس من التروك)) بواوغوزلار ميلادي 11-نجي عصرده مسلمان اولدوقدان سونرا تركمان آدي ايله تانينيلميش وغزكلمه سي تدريج ايله اونودولموشدور. بئله ليكله تاريخده گلن تركمان كلمه سي نين چوخ وقت اينديكي تركمان خلقي- ايله باغليليغي يوخدور. نئجه كي بيهقي اؤز اثري ((تاريخ بيهقي)) ده هريئرده اوغوزلولاري تركمان وسلجوقيلري (تركمانان سلجوقي) آدلانديرير.
دوققوز اوغوز عبارتي ايسه اوندان قاباق دا واريميش. اورخون داكي داش كتيبه لرده بو آد چكيلميش حتا اورادا بوعبارتي تؤرك كلمه سي يئرينه ايشله تميشديلر. بوداش كتيبه لر ميلادي 8-نجي عصرده گؤي تؤركلر طرفيندن يازيليب، يادگار قويولموشدور. (1)
خواجه رشيدالدين فضل اله جامع التواريخ ده يازيركي: اويغوزاتحاديه سي اون طايفادان عبارت ((اونون اويغور)) و 9 طايفادان عبارت ((دوققوز اوغوز)) ائللريندن تشكيل تاپميشدير. اوغوزطايفالارينين آدلاري چئشيتلي منبع لرده چئشيتلي شكيلرده گتيريلميشدير. محمود كاشغري ديوان لغات الترك آدلي اثرينده اونلاري 22طايفا سانميشدير. جامع التواريخده ايسه 24طايفانين آدي چكيلميشدير. بوز اوخلار 12 طايفا ايميش: قايي، بايات (بيات) آلقرا ائولي، قارا ائولي،يازير، دؤگر، دوردوغاياپرلي، افشار (آوشار) قيزيق- بئگديلي، قارين.
اوچ اوقلاردا 12 طايفادير: بايندور، بچنه، چاوولدور، چيني، سالور، ايمور، آلايونقلي- اوره گير، بيگدير، بوغدور، ييوا، قينيق.
افسانه لره گؤره اوغوز تؤركلري اوغوزخان آدلي بيركيشي نين ائولادلاريديرلار. اونون 6 اوغلو وارييميش ((گون خان، آي خان، اولدوزخان، گؤي خان، داغ خان، دنيزخان)) هربيريندن دؤرد طايفا آرايا چيخميشدير.
2-نجي بؤيوك تورك امپراتولوغو قوران، غربي توركلردن ساييلان اوغوزلارين ايران وآذربايجان وتركيه تاريخينده بؤيوك رول لاري اولموشدور. اونلار ايراندا سلجوقي امپراتورلوغو وتركيه ده سلجوقي حكومتي وعثمانلي امپراتورلوغونو قورموشدولار. اونلار ايراندا، تركيه ده، عراق (عرب) ده، تركمنستاندا اولان توركلرين(توركمنلرين) بؤيوك بابالاري ايميشلر. اونلارين سلجوقي لرين غربه ساري گئتمه لرينده بؤيوك نقشلري اولموشدور.
بوكتيبه لركي شاهلارين وسردارلارين قبرلري نين داشلاري دير، ايكي قسمت دير. بيري ميلادي 6-نجي عصرده گؤي تورك امپراتولوغونون ايلك قورولوشونون يادگاريدير. اونلارين سايي دؤرت دور ويئني سئي ساحلينده تاپيلديغينا گؤره يئني سئي كتيبه لري آدلانير. ايكينجي لر ايسه اورخون چايي كناريندا تاپيليب واورخون كتيبه لري آدلانيب. 8-نجي عصرده كي گؤي توركلره مربوط دور اونلارين مهم لري نين سايي 9 دور.
11-نجي عصرده اوغوزلارين بيرعده سي خزرين شماليندان وقره دنيزدن كئچرك بالكاندا ساكن اولموشدولار. 12-نجي عصرده اوغوزلارين بيردسته سي قره قوش آدلي بيرسردارين باشچيليغي- ايله مصره وآفريقانين شماليندا گئتميشديلر. بعضي تحقيقاتلارا گؤره اوصلاح الدين ايوبي نين وزيري وآدي ايسه بهاءالدين ايميش (1) امام سيوطي ((الفا شوش في حكم قراقوش)) آدلي بير رساله سينده ومحمد بن تغزي الناصري آدلي بيرشخص ((نجوم الزاهره في ولاة القاهره)) آدلي اثرينده قرانقوش آدينا بيرپارا گولمه لي ومسخره حكم لر اونا نسبت وئرميشديلر.گؤرونوركي بونلار غرض اوزو ايله اولموش بيرحالداكي اوشخص انسان پروروخلقين دادينا چاتان وخيرات وئره ن بير آدام ايميش.
ايران تاريخينده بؤيوك رول اوينايان اوغوزلار ((اوچ اوق)) تيره سيندن ايميشلر. نئجه كي سلجوقي لر ((قينيق)) طايفاسيندان، كرماندا حكومت قورانلار (1213 ميلادي) سالور وآق- قويونلولار ((بايندر)) وفارس (شيراز) دا اتابكان زنگي دؤولتيني قورانلاردا ((سالور)) طايفاسيندان ايميشلر. دئمك اولاركي يايراندا توركلرين گئتمه ديگي بيرنقطه اولماميشدير. سيستان، خراسان، فارس، اراك، ساوه، گرگان، همدان، قزوين، اصفهان (فريدن) خصوصي ايله آذربايجان واونون اطرافينداكي، يئرلرده توركلرين ايزلري ونسل لري هريئرده قالماقدادير. بئله ليكله سلجوقي امپراتورلوغو بوتوركلرين آردينجا واونلارايله بيرليكده،روم، آفريقا، آروپايا ده ك گئتميشدير. آوروپادا مجارستاندا، فنلانديادا، يوگوسلاويادا، آلباني، بلغارستان وسايره لرده بوگون تورك سويلاري ياشاماقدادير. آمريكا قيرميزي دريلي لري واسكيمولارايله توركلر آراسيندا اولان چوخلو مشابه لغتلر، عادتلر وعنعنه لرده بو بابتدن تحقيق اولونماليدير.
تاريخده معمولا اوغوزلارين 24 طايفالاري نين هربيري نين يئرينه ده غالبا اوغوز (غز) كلمه سي ايشلديلمشدير. اونلار هرطايفادان اولورلارسا بو آدايله آدلانيرميشلار.
آناطوليا گئدن اوغوزلارين بيرعده سي ده عراق عربه كئچيب اورادا ((اوغوز)) آدلانيلان منطقه ده ساكن اولموشدولار. اونلاردان چوخ قاباق دا عباسي خليفه لري زماني معتصم بالله(218-242 هجري قمري) دؤرونده توركلر بغداد دا قدرت تاپميش وخليفه لري اؤزلرينه ال آلتي ائده ره ك هركيمي ايسته سه يديلر خلافته قويور ياگؤتورور ياالدوروردولر.
رشاد، گنجينه لطائف، استانبول 1315 (قمري) ص 85
(2) يوگوسلاويا 1990-نجي ايلدن بوطرفه آلتي كيچيك مملكته بؤلونموشدور.
عبدالحسين زرين كوب تاريخ بعدازاسلام آدلي اثرينده (ص608) يازير:
((طاهرين عبداله به سال 248 هجري قمري وفات يافت پسرش محمد ابن طاهر راخليفه ((مستعين)) امارت خراسان داد. باشروع امارت او دولت طاهر درخراسان روبه ضعف وتجزيه گرائيد. دراين زمان
بغداد وخليفه اش دستخوش بندگان ترك شده بود. تركان هرخليفه اي را مي خواستند مي كشتند وهركس رامي خواستند به خلافت برمي داشتند))
آناطوليا گئدن اوغوزلارين بيرعده سي ده سوريه يه كئچديلر. اونلاربيت المقدسي، شامي فتح ائده ره ك اورادا حكومت قوردولار.