منوچهر عزیزی
عین زامانداکی پارلاق خیالاریلا منیم، ایسوچه تخریباتلی! سفریمه مانع اولدولار وبوایشدن آرخایین اولماق اوچون پاسپورتومودا آلدیلار، منده دوشمن سئویندیره ن ان خطرلی بؤیوک بیر توطئه نین قارشیسینی آلان زیرنگ آیدینلارین آجیغینا، خیالی بیر سفرین فیکیرینه دوشدوم کی، پاسپورتسوز وویزاسیز وپولسوز، اوره ییم ایسته دیگی یئره گئده بیلم.
ان راحات سفردن اؤتری، خارجی بیر طیاره نی سئچدیم. درحال کراواتیمی تاخدیم. طیاره نین پنجره طرفینده اگله شرکن، اصلاحاتچیلیغین، قانونچولوغون ویالان وعده لرین یانماسیندان تؤرنمیش تهرانین توستولو هاواسینا تاماشا ائدیردیم. ایسته دیم کی، سووقت اوچون وطن توستوسیله آغزیمی واووردلاریمی ووطن هاواسی، عشقیله خارجده یاشایان قاچغین وطنداشلاریمین ائو- عاییله سینه پوفله یم کی، هئچ اولماسا گتیردییم وطن هاواسیندان فایدالانیب، لذت آپارسینلار! آنجاق میکرب یایماق اتهامیله پولیس طرفیندن یاخالانماغیمدان قورخدوم کی دییه لر: هله « سارس» خسته لیگیندن یاخا قورتارمیش، سن ایسته ییرسن « فارس» میکروبونون خسته لیگینی بورادا یایاسان؟ بئله بیر سووقت آپارماغین خئیریندن واز کئچدیم.
طیاره ده اوتوران آندان، هامی نین باخیشی نین منه جلب اولماسیندان هئچ نه باشا دوشمه دیم. نه قده ر ایین- باشیمی یوخلادیم اؤزومده خالقین نظرینی جلب ائدن غیرعادی بیرشئیی گؤرمه دیم. لاکین اکثریتی خارخی اولان مسافرلرین دقت مرکزیندن یایینمادیم! طیاره نین تووالتینه گئتدیم. کیفایت قده ر آینادا اؤزومه- ایین- باشیما دقتله تاماشا ائتدیم لاکین اؤزومده غیرعادی وجلب ائدیجی بیر شئی گؤرمه دیم. آمما یئنه بوتون مسافرلرین گؤزلری منه دیکیلمیشدی. یئنه تووالته مراجعت ائتدیم یئنه دقتله اؤزومه تاماشا ائتدیم ال- اوزومو یودوم باشیمی دارادیم. هرشئیین اؤز قایداسیندان آرخایین اولاراق، یئریمده اوتوردوم! آمما یئنه ده بو لعنته گلمیش باخیشلار، منیم یاخامدان ال چکمه دی. بلکه اوسته لیک باخیشلار منه دوغرو بره لمکده ایدی. یاواش- یاواش اؤزومدن شبهه لنمکده ایدیم کی، طیاره نین خدمتچی قیزین چاغیردیم!! ناشی انگیلیس دیلی ایله خدمتچی دن سوروشدوم: خانیم قیز! مومکندورکی منه بویوراسینیز منده هانسی غیرعادی حال مشاهده ائدیرسینیزکی، بوتون مسافرلر منه باخیرلار؟ خدمتچی قیزمنه جواب وئرمه دن دئدی : لطفا پاسپورتونوزو وئرین اؤز- اؤزومه دئدیم : من اوندان نه سوروشدوم، او مندن نه ایسته دی؟! هئچ دخلی وار؟! ائله کی، پاسپورتومو خدمتچی قیزا وئردیم او بیرآن پاسپورتو گؤره ن کیمی- اول قاشلاری آنلینا ساری اوجالدی، آلنی قیریشدی، سونرا آلا گؤزلزی بره لدی، سونرا پاسپورتومو اؤزومه قایتاردی. او قیز بیرحالداکی چالیشیردی شبهه لی باخیشلارینی مندن گیزلتسین دئدی : اوکی! تنکی یو، قیز گئتندن بیر نئچه دقیقه سونرا بیر اورتا یاشلی ، هوندور بوی بیرآدام گلیب مندن سوروشدو : سیزده سیلاح وار؟ درحال دئدیم خئیر. من عؤمرومده ایندیه قده ر الیمه سیلاح آلمامیشام. سوروشدو : بس نییه صفتین عصبی دیر وتقدیم اولونان ایچمه لی لردن ایچمیرسینیز؟ اولمایا ساختا ایرانلی پاسپورتلا سفره چیخمیش القاعده تشکیلاتی نین تخریباتچیلاریندان بیری سینیز؟! دئدیم یوخ جانیم استغفراله منیم صفتیم آنادان دوغولما بئله دیر. اؤزومده اولا تمیز آذربایجانلی یام، همده تروریزم دن نیفرتیم وار. منه بئله گلیرکی، بوتون آذربایجانلی لارین ترورزمیدن تنفرلری واردیر. اؤزلری ده چوخ دویغوسال ومهربان قوناق سئور انسانلاردیرلار. اگر مندن چوخ شبهه لی سینیزسه، بوتون بدنیمی، اشیالاریمی وچمدانلاریمی یوخلویوب آختارا بیلرسینیز!!
دئدی : یوخ ! لازیم دئییل. هرحالدا منی باغیشلایین کی طیاره سرنشین لری سیزه شبهه لی باخیرلار. بو داها منه عایید اولان بیر شئی دئییل! من سیزین خطرینیزه گؤره بوتون طیاره سرنشین لری نین گؤزلرینی دستمال لا باغلایا بیله ره م ؟!! ویا کیمسه یه امر ائده بیله ره م کی سنه باخماسین؟!
دئدیم : خئیر- خئیر بو ممکون اولان بیر ایش دئییل. آمما من باشا دوشه بیلمیره م سرنشین لر، نییه او قارا دریلی سرنیشینه باخمیرلار آنجاق، یالنیز ویالنیز گؤزلرینی منه دیکیبدیرلر؟! مگر من اوندان چیرکینم؟! خدمتچی دئدی البته کی سیزاوندان چوخ گؤزل سینیز اؤزوده چوخ یاراشیقلی گئییب سینیز. لاکین بیر مسئله واردیرکی، خارجی لر اونلارا عادت ائدیبدیرلر و اونلاردان آرخایین دیرلار و ذره جه اونلارا شبهه ائتمیرلر. آنجاق کی، چوخ تاسفلر اولسون کی، سنین گؤزلرین حیرص وانتقاملا دولودور!!
من یئنه ده اؤزومه شبهه لنه ره ک، بیرباشا توالته گئتدیم. بو دفعه اؤزومه آینادا دقتله تاماشا ائتدیم یواش- یواش گؤزلریمه هوپان درین دهشتدن قورخدوم. دئمک سرنشینلرین، خدمتچی لرین وحتی او اورتا یاشلی کیشی نین حاقی واریمیش منی القاعده تشکیلاتی نین بیر عضوو کیمی تصور ائده لر.
گؤزلریمه دقت ائتدیکجه، اؤلکه میزه حؤکم سوره ن یارامازلارین خالقا داییر ائتدیکلری اهانتلردن، تحقیرلردن، حاقسیزلیقلاردان یالانچیلیقلاردان، غدارلیقدان ، ناموس سوزلوقدان، دانیشدیقلاری جفنگیاتدان، قانونسوزلوقلاردان، ناکیشی لیکلردن صداقت سیزلیکدن، یالانچی عبادتکارلیقلاردان، سیر صیفتیمده تؤرنمیش قیریشلارین ، گؤزلریمده یارانمیش دهشتلی قورخولارین، دوداقلاریمدان ایللر بویو گولوشلرین ویداعلاشماسینین سببلری منیم اوچون آیدین اولدو .