قالخيب کؤچ ائيله دي آوشار ائللري،
آغير- آغير گئدن ائللر بيزيم دير.
عرب آتلار ياخين ائيلر آياغي،
اوجا داغدان آشان يوللار بيزيم دير.
«دادال اوغلو»
ميرموسي هاشمي
گيريش:
بو قلم صاحيبي نين 55 يازي (باهاري)خزان اولسادا، آنجاق اوشاق چاغلاريندان گؤنئي آذربايجاندا ياشايان بوتون وطنداشلار کيمي، ميللي حقوقلاريمدان مطلق محروم قالميشام. و بو آغيردرد هر زامان، اؤرگيمي سيخميشدير. نه ايسه! بو دهشتلي درده معروض قالانلارين سايي آز دگيل. آتالار دئميشکن: دردلي. دردلي نين درديني ياخشيي بيلر! ائله بو درده درمان ائتمک اوچون نئچه ايلديرکي سارسيلماز اراده ايله آنا ديليم آذربايجان تورکجه سيني ايسوچ اؤلکه سينده اؤيرنمه يه چاليشميشام. هله نثر يازماقدا يوکسک سويه يه ده چاتماميشام، آمما شادام کي، بوگون آنا ديلينده فيکيرلشييب و آنا ديلينده يازيرام. بو تشبوث منليگيمي وکيمليگيمي اينکار ائدن لر اوچون بير اتهام نامه دير! بو تشبوث ده اولان وطنداشلاريم چوخدور. وبو اونو بيرداها ثبوت ائديرکي، بيرميللتين ديليني اليندن آلماق اولماز! بيرميللتين ميللي وارليغيني يوخ ائتمک اولماز!
مقاله نين اوچونجو، يعني سون بؤلومو عزيزاوخوجولارين الينده دير. بو بؤلوم چوخ ييغجام صورتده يازيليب دير.
ياشاديغيميز21-نجي عصرده انسان آزادليغي و انسان حقوقلاري، صنعت وتکنولوژونون انکيشافي ايله ياناشي ايره لي له مکده دير. بوتون بشرحقوقلاريندان اوزاقدا قالميش ميللت لر گئتديکجه آزادليقلارين الده ائتمگه نايل اولوب و اولماقداديرلار. دئمک اولارکي، بو آزادليقلاري الده ائتمگين معين اوستونلوکلري وار. وبو قيمت لر بيرميللتين اؤز چيخاريندان آسيلي ديرکي، باجارابيلسين ميللي حرکتلرين اؤز خالقينين کولتورو، تاريخي، مدنيتي وسياسي پسيکولوژي و دونيا سياستي ايله اويغون شکيلده پلانلاسين. و اويغون چيخيش يوللاري ايله آزادليغا چاتماقدااوغورلار قازانسين. ائله جه ده آذربايجانليلارين، بوگون ده مدني وسويل يوللارلا اؤز ميللي حرکتلريني دوام ائتمه لري تصادفي دگيل.
ايران حاکميتي نين سيماسي ؟
بوتون دونيادا ميللتلرآراسيندا دموکراتياني اوستون توتوب و بشرحقوقلارينا حؤرمتله ياناشيلسادا، تاسفله گونئي آذربايجان تورکلري هابئله ايرانين باشقا بؤلگه لرينده ياشايان سويداشلاريميز هله ده کيمليک سيزليک بحراني ايله قارشي– قارشييا ديرلار. بوناگؤره ده آذربايجان ميللي حرکتي طبيعي (دوغال) پروسس لرله اؤز انکيشافينا دوام ائتمکده دير. خصوصيله ( اؤزلليکله) گنج نسيلين، ميللي وارليق لارينا اينام و سئوگي ايله ياناشماسي ايشيقلي گله جکدن خبر وئربر. گور سسلرايله بابک قالاسي نين زيروه لرينده هابئله ايجتماعيت آراسيندا ترنم ائدن شعارلارين نمونه لريندن بئله خاطيرلاماق اولار: آذربايجان منيم ائليم آذربايجان منيم ديليم دوغراساندا ديليم- ديليم منيم ديليم اؤلن دئييل اؤزگه ديله دؤنن دئييل بوگؤزل آنلام داشييان شعارلار بوتون طبيعت ده، داغلاري، دره لري و دريالاري مين لر کيلومتر آشييب ودونيانين هرطرفينده ياشايان آذربايجان اولادلاري نين قولاغينا چاتير. و بو غيرتلي وطنداشلارين خالقيميزا لاييق مدني حرکتلريني اوزاقلاردان آلقيشلاييب و غرور دويوروق.
آمما تاسف اولسون کي بعضي خارجي سوپر دؤولتلرين مادي يارارلاري اوزريندن آذربايجانليلار اوچون چيرکين سياستلر پلانا چکيلير. وبشر حقوقلاري گؤز اؤنونده اينکار ائديلير. ومظلوم ميللتلرين حاق سسلريني دينله ينلر آزدير. وغرب (باتي) دموکراتياسي ائله باتي جغرافياسيندا باتيب، قاليبدير و بورادا ياشايان انسانلارا محدودلاشير. اوچونجو دونيا دؤولتلري ده غيرانساني سياسته سؤيکه نه ره ک، قدارجاسينا عدالتسيزليگ متودلارينا دوام ائتمک ده ديرلر.
بوساحه لرده چوخلو فاکتلارا اشاره ا ئتمک اولار. يالنيز آنا ديلي حاققيندا بيراوفاق و لاکين اؤنملي حادثه ني عزيز اوخوجولارا خاطيرلاماق ايسترديم: آذربايجان جمهوريتي نين پارلمنت تمثيلچي سي و آوروپا شوراسينداکي عضوي رافايل حسينوف کئچن ايل آوروپا شوراسينا اعتراض مکتوبو وئرميشدير، مکتوبدا بئله يازيلير:
« گونوموزده آذربايجان جمهوريتينده 8 ميليون اهالي ياشايير. ايراندا بيتيشيک شکيلده ياشايان آذربايجانليلارين سايي سي ايسه 30ميليونا ياخيندير. تاسفله ايراندا ياشايان آذربايجانليلارين اؤلکه ده آنا ديللرينده تحصيل آلما ايمکانلاري يوخدور. وايران آوروپا اؤلکه سي اولماسادا، آوروپا شوراسي نين عضوي اولان بير سيرا دؤولتلرين ايرانلا سيخ سياسي، ايقتصادي، علمي ومدني ايليشگي لري واردير و ايراندا ياشايان 30 ميليونا ياخين آذربايجانلي (آوروپا اؤلکه سي اولان) آذربايجان جمهوريتي يوردداشلاري ايله عيني ديل، معنوي ومدني دگرلري پايلاشير. اونلارين آنا ديلينده تحصيل آلما ايمکانلاري يارانيرسا، آذربايجان جمهوريتينده نشر ائديلن کيتابلار ومطبوعاتي اوخوما و آذربايجانين آوروپا شوراسينا عضو اولدوغو گؤز اؤنونه آلينيرسا- ميللي وآوروپا دگرلري ايله تانيش اولما، آوروپا دوشونجه وداورانيش بيچيميني داها آرتيق منيمسه مه ايمکانلاري دا تامين ائديلميش اولار.
آوروپا شوراسي پارلمنت آسيميلاسياسي ايراندا ياشايان ائتنيک آذربايجانليلار اوچون ايلک، اورتا و يوکسک مکتبلرين آچيلماسي دوغرولتوسوندا حکومت جه آتيلاجاق آدديملارين، بو اؤلکه نين لاپ بؤيوک ميللي آزليغينين ان تمل حاقلارينا گؤستريلن سايغي نين بير نشانه سي اولاجاغينا اينانير. بو ندنله آوروپا شوراسي پارلمنت آسيميلاسياسي مدنيت، بيليم، تحصيل کميته سينين بو پروبلئمي آراشديراراق، حاققيندا آيريجا معروضه حاضيرلاماسيني تؤسعه ائدير. سند. 9710 – 13 فورار 2003
بو سند، مجلسين دئپوتاتي (نماينده سي) و آوروپا شوراسي پارلمنتي عضوي اولان رافايل حسينوف طرفيندن حاضيرلانيب وآذربايجان، ايتاليا، بئلچيکا، ماجارستان، ايسپانيا، پولشا، ليتوا، تورکيه، اوکراينا وگورجوستانين (ليبرال- دئموکرات – رئفورميست، آوروپا خالقي پارتي سي، دئموکراتيک آوروپا، آوروپانين بيرلشميش سولو وسوسياليست گوروپلارينا باغلي) بيرسيرا دئپوتاتي نين ايمضاسيني داشيماقدادير.»
بوسون چاغلاردا، ايراندا امنيت قووه لري نين، آذربايجان ميللي حرکتي قارشسيندا غيردموکراتيک داورانيشلاري دوغورداندا خالقيميزين ايچرسينده، حاکميت دايره لرينه عنادحيسيني قات- قات آرتيرميشدير. بو حقيقته شاهد آذربايجان آيدينلاري نين يانارلي چيخيشلاري، مصاحبه لري و قلم لريندن تراوش ائدن يازيلار، مقاله لر و شعرلردن، گونده ليک مسئله لرده اؤرنک گتيرمک چتين دگيل!
دئمک اولار آذربايجان ميللي حرکتي نين مدني گوجلنمه سينه گؤره، گونئي آذربايجان تورکلرينه عايد اولان بوتون فعاليت لرين و اولايلارين حقيقتي ايرانين داخيلينده دوولت اورگانلاري وسايره لرين طرفيندن همچنين خارجده ايران اوپوزوسيونو طرفيندن قارا پرده چکيليب و رسمي شکيلده بايکوت اولماسي نين شاهدي ييق . وحتي ساده بيرخبري دئمک دن ده چکينيلير.
باخين! ميللي، تاريخي، علمي، مذهبي و… مراسم و شنليک لرين کئچيريلمه سي نين چئشيتلي يوللارلا (امنيت آديله) امنيت قووه لري طرفيندن قارشي سي آلينير. ميللي، تاريخي، مذهبي و… شخصيتلريميزدن آد آپارماق دا ياساق ساييلير. بابک قالاسينا زيارت قصديله گئدن وطنداشلاريميزا آغير تضييقلر اولونور. آذربايجان فعاللاري گناهسيز ياخالانير، دوستاقلانير،آلچالديريلير. 2003- نجي ايل تبريزين اماميه مزارليغيندا 21 آذرمراسمي نين قيد اولونماسي نين قارشي سي آلينارکن، ياخالانانلار ايجرسينده 7 ياشي اولان رضا نجفي آدلي بير اوشاقدا واريميش!
…تورکلره توهين ائتمک بير هنر ساييلير، او جمله ده ن (صدا وسيماي جمهوري اسلامي)، بعضي فارس ديللي نشريات و… ! بو سون چاغلاردا تهرانين فردوسي سينماماسسيندا، ماهي صفت آدلي بير اخلاقسيز آدامين غيراينساني داورانيشي نين چوخلاري شاهدي اولدو. مسئول اورگانلار بو اؤنملي مسئله يه هميشه کي کيمي گؤز يومدولار. آنجاق گناهکار يئرينه، نئچه گناهسيز و اؤز ميللي حقوقلاريندان مدافعه ائدن سويداشلاريميزي ، ياخالاييب و هده له ديرلر! سياستچي و ضياليلاريميزين خارج سفرلرينه يول وئريلمه مه سي نين شاهدييق. اؤرنک (نمونه) اولاراق، بو ياخينلاردا آذربايجان ميللي جبهه سي طرفيندن ايسوچه دعوت اولونان گونش پارتياسي نين صدري منوچهر عزيزي جنابلاري نين 2003- نجي ايل نوامبر آيي نين 15ده ساعات 0630 دقيقه ده، امنيت طرفيندن تهراندا پاسپورتونون غيرقانونو شکيلده آلينماسي و رسمي سفري نين ياساقلانماسي هامييا آيدين اولدو !
بوتون اولايلاري بو يازيدا قيد ائتمک نيتينده دگيلم. آنجاق بيرنئچه سين اؤرنک اولاراق يوخاريدا خاطيرلاديم کي، ايراندا مدنيت داشيني سينه لرينه ووران دؤولت باشچيلاري اؤز گناهلارينا اعتراف ائتسينلر. و بشرحقوقلار يني داها بوندان آرتيق آياقلار آلتينا آتماسينلار. اينسانلارين انسان کيمي ياشاماقلارينا اينسان کيمي ياناشسينلار. اينسانلارين وئرديکلري ورگي لري اونلارين وارليغين يوخ ائتمه گه قوللانماسينلار.
آذربايجان ميللي حرکتي نين فعاللاري قارشيسيندا انگللر تورنسه ده، آمما ميللي حرکت، ميللي پتانسيالا سؤيکه نه ره ک او قدر قابليت وارزشه مالک ديرکي، بو حرکتين تئوريسين لري و فعاللاري باجارا بيلييب بو مدتده چوخلو شانتاژلار قارشيسيندا داياناراق، حرکتين ساغلام وشفاف ليغين معنوي واخلاقي شيوه لرله اولدوغو کيمي قوروسونلار. وبو آييقليق وساييقليق سئوينديريجي دير.
ايران دؤولتي طرفيندن اورتايا چيخان عدالتسيزليک لر، گونو- گوندن بو اؤلکه نين سماسين قارانليق لاشديرير. ووطنداشلاريميزي چتين دوروملارا تدبيرلنديرير. يعني راديکال ايستقامتلره سوق ائدير. تاسفله بو شيوه دن شونيستلر آرتيق فايدالانيرلار. بونا گؤره کي ميللي حرکتيميزي سويه سيز تانيتديرماقدا اللري ايستديکلري کيمي آچيق اولسون. بعضي آذربايجان گنجلري نين صداقتلي، لاکين آشيري داورانيشلاري بو يانليش شيوه يه يارديم ائديب، کتله ني حرکتدن اوزاقلاشديرسادا، آنجاق باشقا طرفدن ده آيدينلاريميزين مدني وعلمي داورانيشلاري سبب اولموش کي، حرکتين ساغليم وشفاف اولماسي کوتله ني فعاليت دايره سينه چکمک ده باجاراجيقلي رولو اولسون. بو دورومدا توپلومون پسيکولوژسو، آز- چوخ ايرانين تهليکه سيزليک اورگانلاري نين مرکزي دايره لريندن اوزاقدا دگيل. و بوساحه ده اونلارين آناليز ائتمه لري ومنفي باخيشلاري گئتديکجه اورتايا چيخير. بئله يکونلاشديرماق اولارکي، عموميتله بو اورگانلار، آذربايجان ميللي حرکتينه مدني وسويل يوللارلا ياناشانلاري آرتيق اؤزلرينه تهليکه لي ساييرلار. و بونا گؤره، فعاللاري سيخيشديريب، هده له مکده گونو- گوندن تضييقلر، باسقيلار آرتماقدادير.
ايران اوپوزوسيونون سيماسي !
اسلام حاکميتي نين اپوزوسيونو، هابئله اقتدارقؤوه لري نين، ميللي حقوقلارا باغلي استراتژيسي عين دير. بونا گؤره سويداشلاريميزين اقتدار دعواسيندان اوزاقلاشييب و آذربايجان ميللي حرکتينه ياناشمالاري ميللتيميزه اوغرورلار قازانديرا بيلر. تاسفله ايران اوپوزوسيونو، يئنه کئچميش متودلارلا هله ده آذربايجانليلارين مادي و معنوي پتانسياللاريندان قوللانماقدادير. و بعضي سويداشلاريميزي بو استقامته سوق ائتميشلر.
سلطنت طلب، خالق مجاهدلري و سول تشکيلاتلاريندان اوزاقلاشييب و اؤز دوغما خالقي نين ميللي حرکتينه قوشولانلارين سايي گونو- گوندن آرتماقدا اولسادا، هله ده ياد تشکيلاتلاردا امک صرف ائدن وطنداشلاريميز واردير. يئنه ده سويداشلاريميزي ياد تشکيلاتلارا سوق ائتمگه جهد گؤسترمکده ديرلر. بوسون چاغلار، آلمانيانين برلين شهرينده کئچيريلن جمهوري خواهلار کنگره سي حاققيندا بئله سورغولارلا اؤزله شيريک: گؤرسن نييه، افغانستان، عراق و… حادثه لردن سونرا، گونئي آذربايجان ميللي حرکتينه ماراق گوسترمه ين بعضي آذربايجانلي وطنداشلاريميز، اسلام حاکميتي نين، خاريخده کي مخالف لري ايله بيرگه بيرآرايا گليب و تعجيلي حالدا امضا توپلاييب واؤزلرين معين نشريات وسايتلاردا تانيديرماقا جهد گؤسترديلر؟ گؤره سن کنگره ده اشتراک ائدن وطنداشلاريميز کهنه ايده لوژولاريلاري بيرداها جانلانديرماق نييتيله آدي چکيلن کنگره ده اشتراک ائتميشلر، يا آذربايجان خالقي نين ميللي حقوقلاري اوغروندا؟ گؤره سن بو وطنداشلار بو قدر صرف ائتديکلري امکلر دن مثبت نتيجه آلماغا نه قدر اينانيرلار و ميللي حقوقلارا گلديکده، اسلام جمهوريتي يا دموکراتيک جمهوريت و يا… بير- بيريندن نئجه و هانکي فاکتور لارلا فرق له نير؟
بوسورغولاري بئله جوابلانديرماق ايسترديم: البته جمهوريخواهلارين بو تشبوثو ايراندا سياسي شرايطي اويغون گؤره ره ک باشقا رغيبلر قارشيسيندا ديرچليب و دونيا ايجتماعيتينده خصوصيله آمريکا دا اؤزلريني بيرينجي آلتيرناتيو تانيتماقدان عبارت دير. آمما بيزيم اوچون بئله بير قوروملارين اولوب اولماماسي ماراقلي دگيل، آنجاق بيزي ماراقلانديران يالنيز وطنداشلارين توکنمز گوجوندن باشقالاري نين قوللانماسي دير. عموميتله بو آذربايجانلي وطنداشلاري فيکير اؤزرينده ايکي يئره بؤلمک اولار. بيرينجي گوروپ آذربايجانليلارين ميللي حقوقلاري ايله بيگانه ساييلانلار و ايرانين تورپاق بؤتولوگونو نئجه اولور- اولسون، قوروماقا چاليشانلاردير. تاسفله اؤتن يوز ايلده بو تفکوري داشييان سويداشلاريميز پان ايرانيست شونيستلري نين تشبوث لري ايله ان آغير ضربه لري آذربايجان خالقينا وورموشلار. ايکينجي گوروپ فرقلي دير، بو شخصلر تشکيلاتلاردا ميللي حقوقلاريندان مدافعه ائديب حتي خالقيميز دموکراتيک شکيلده اؤز طالعين الده ائتمه سينه ماراقلي اولموشلار. آمما بو وطنداشلاردان، هر زامان ايرانين مرکزي حاکميتلري آذربايجان خالقينين ضدينه فايدالانميشلار.
گوره سن، برلين قورولتاينا جنوب آذربايجاندان چاغيريلان شخص لرين ايرانا قاييداندان سونرا امنيت مسئله سيني دوشوننلر وارميش؟ خارجده کي مرکب حرکتلردن خبرسيز وطنداشلاريميزي بئله قورولتايلارا چکمکدن هدف نه ايميش؟ قورولتايدان سونرا کيمسه لرين ياخالانماسي حاققيندا آرتيق معلومات يوخومدور! آنجاق تبريزدن گلن آزاد ژورناليست، انصافعلي هدايت کيمي آذربايجان اولادلاري نين قارا زندانلارا معروض قالماسي نين سوجو (گناهي) کيمين وهانکي جريان بوينونادبر؟ بيرينجي گناهي اونلار داشاييرکي، بيله – بيله اؤز سياسي ايستکلرين اوستون توتاراق آذربايجانليلاري بئله بير قورولتايلارا چاغيريب و وطنداشلاريميزين صداقتيندن سو استفاده ائديرلر ونهايت سويداشلاريميزين گوجلريندن باشقا يئرلرده فايدالانيب و ميللي حرکتيمزي ضعيف ائتمگه چاليشيرلار! ايکينجي سوچو چاغيريلان شخصلرده گؤرمک اولار، بونا گؤره کي اؤز اطرافلارينا ديققت ائتمه دن وتانيمادان هر توپلوما قاتيلماقا جان آتيرلار.
ايران جمهوريخواهلارين، ميللي مسئله اوچون ان تهليکه لي جريان سانماق حقيقتدن اوزاق دگيل. بوناگؤره کي، بو جريان ايچرسينده اولانلاري اوزاقدان و ياخيندان تانيريق. واونلارين بو ساحه ده سياسي دوشونجه لري محض ايران اراضي بؤتولوگون قورونماسيندان عبارتدير. وبوگونکي دورومدا بوتون قووه لردن قوللانماق آماجي ايله تئوريکده بشرحقوقلارينا اشاره ائديرلر. آنجاق کئچميش تاريخ بوگونون ايشيقلي چيراغي دير. جمهوريخواهلارين بيانيه لرينه ديققتله نظر سالارکن، ميللي مسئله يه گؤره، نه قدر قارانليق نقطه لري حيس ائتمک اولور. و بوساحه ده بعض آذربايجانلي وطنداشيميز بيانيه نين اصلاحي اؤزرينده نظرلرين بيلديرميشلر.
دوغرودورکي،هرکيمسه نين فيکيري اوزوندن آسيلي دير. آمما اصلينده بو پرنسيپ او زامانديرکي، بير ميللتين دوغما دؤولتي وار! او دؤولت ميللتين ميللي وارليغين قورويور! ميللت اؤزگور ياشايير! البته کي بئله بير دورومدا هرکيمسه نين حاقي وار بوتون ساحه لرده دموکراتيک قانونلار چرچيوه سينده ايستديکلري ايجتماعي، کولتورال، سياسي و… توپلوملارين يارادسين وچئشيتلي ساحه لرده فعاليت گؤسترسين. گونئي آذربايجانليلارا گلديکده، دوروم عکس تدبيرده دير. ائله بوناگؤره ايچريمده هرزامان سورغولارلا تورشلاشميشام. و بو سورغولار بئله دير:
نيه بيز آذربايجانليلار، اينه کيمي اؤزگه ني به زه ييب و اؤزوموز … گزيريک ؟ نييه، تاريخين آجي صحيفه لريندن درس آلمادان، هله ده باشقا جريانلارا ياناشييب و امک صرف ائديريک؟ ايران حاکمييت لري نين، بو سون عصر ده آذربايجان تورکلرينه آپارديقلاري آسيميله سياستي هله يئترلي دگيل مي؟! و…
ايران اپوزوسيونونا اينانان وطنداشلار!
بو ضعيف وغيردموکراتيک اوپوزوسيون اقتدارا گلديکده، اسلام حاکميتيندن فرقلي اولاجاقديرمي؟ البته کي يوخ ! بو آرادا اقتدار دعواسي دير، کيمسه ايراندا ياشايان ميللت لرين ميللي مسئله سينه ماراق گؤسترمير. بو جريانلارين، شخصلرين ياشاديغيميز چئشيتلي جغرافيالارين، خصوصي وعمومي محوللرينده، راديو، تلويزيون، نشريات وپالتالک اوطاقلاريندا و… گؤروب ودينله ييريک! خارجده کي اپوزوسيون دا ضدميللي دوشونجه قات- قات اسلام حاکميتيندن آرتيق گؤزه چارپير.
يوخاريدا اشاره ائتديگيم حقيقتلره شاهد، بير نئچه فاکت آچيخلامالييام : معيين سياستلر داخلينده، صلح وبشر حقوقلاري اؤزرينده خانيم شيرين عبادي نين بوگون بو حساس دورومدا يوکسه لييب واورتايا چيخماسي دونيا ايجتماعييتينده هابئله ايرانين داخل وخارجينده تصادفي دگيلدي. و اونو چيخيش ائده رکن بو اؤتن آيلاردا ايسوچ تلويزيونو قارشيسيندا ديقتله گؤروب و دينله ديک. يقين کي، باشقا وطنداشلاردا بو چيخيشلاري مشاهده ائدميشلر. دانيشيقلاري کنکرت شکيلده يکونلارشديريب وخاطيرلاماق مجبوريتينده يم : ش. عبادي چيخيش ائدرکن، ساغ الين قالديريب وژست توتاراق فارسجاسينا بئله دئيير : « من ايرانيم و نواده کوروش و……………….. » بو شعاري ديله گتيرن ش – عبادي چاليشيردي بئله ليکله پان ايرانيستلرين اوستونلوگون ايرانين سياسي جغرافيسيندا ياشايان باشقا ميللتلر اؤزرينده دونيا مييلتلرينه ثبوت ائتسين.
بيرمثل وار دئييرکي: فلان کس. حضرت عباسا آند ايچمه گينه اينانيم! يا قولتوغون آلتيندا گوروکن خوروزون قويروغونا اينانيم! باخينز! پان ايرانيست لرين داورانيشلاري دا عين دير. ش . عبادي اؤزو بير تورک اينساني اولاراق وبشرحقوقلاريندان دانيشارکن، نه ضرورته گؤره خارج اؤلکده، آزاد تريبون آرخاسيندا، اؤز آنا ديلينده دانيشماقدان امتناع ائتدي؟ وبو ديلي بو گون ايراندا ياريدان چوخ ياشايان آذربايجان تورکلري دانيشيرلار! وياريم عصردن آرتيق ديرکي قيزغين شکيلده آنا ديلي اوغروندا مبارزه ايچرسينده چوخلو شهيدلر وئرميشلر. اگربوگون بو اؤلکه ده ديل آزادليغي، بشرحقوقلاري سربست اولساايدي، ش. عبادي نين هانکي ديلده دانيشماغي بيزيم اوچون اؤنملي دگيلدي. آمما بو دهشتلي دورومدا کيمسه بو مسئله دن واز کئچه بيلمز.
بيز دونيادا بوتون موسيقيلري اوجمله دن کورد موسيقي سيني ده سئويريک. گؤره سن، ش. عبادي نين پروگراميندا او موسيقي ده ن قوللانماسي کورد خالقينين ميللي حقوقلارينا حورمتله ياناشماق دئمک دير؟ البته کي يوخ! کوردلرده ياخشي بيلير، بلکه ده بو تاکتيکلرآرخاسيندا تهليکلي پلانلار چکيليب دير. وچاليشيرلار کورد خالقيني بئله آلداديجي اويونلارلا آذربايجانليلار قارشيسيندا قوللانسينلار.
خانيم ش. عبادي نين نوبل مکافاتينا نايل اولماقيندا بوتون رنگارنگ ايران اپوزوسيونونون وحتي داخيلده کي معيين قووه لرين ان يوکسک رولو اولموشدور. و بوناگؤره ده خانيم ش. عبادي محض بو غيردموکراتيک قووه لرين تاثيري دايره لريندن اوزاقدا دئييلدي. و اونون دانيشيقلاري و پروگراملاري نين نئجه گئتمه سينده مصلحت لر آلماسي آيدين دير. آتالار دئميشکن: آيي نين مين بير اويونو وار، هاميسي آرمود اوسته! بو داورانيشلار گؤسترير کي ميللي حقوقلار ايراندا، گونده ليک مسئله يه چئوريليب و اونون قارشيسيندا معين تاکتيکلر نمايش ائديلير. وبيري ده خانيم ش. عبادي ده ن بير تاکتيک کيمي قوللانماق دئمک اولار. ائله اول گوندن بومکافاتين ساختاکارليغي اؤزرينده جئشيتلي يئرلردن اعتراضلار سسلندي، و ايسوچده بعضي اورگانلار وشخصيتلرين بو اويدورما مسئله حاققيندا عکس تدبيرلرکچيريلمه سي نين شاهدي اولدوق. يازيقلار اولسون کي، بعضي سويداشلاريميزدا بئله بيرحادثه ني خانيم عبادي يه تبريک دئييب وسايتلاردا تبليقات ائتميشلر!
بو سون چاغلاردا، ايرانين تحصيل ناظيرليگي قرار وئرميش کي، اؤلکه ده اوشاقلارين درسليک کيتابلاري مکتبلرده، ياشاديقلاري اقليمي، کولتوره ل و ايجتماعي جنبه لري نظره آلاراق، يئرلي مسئوللارين طرفيندن حاضيرلانسين. لاکين، بو طبيعي(دوغال) تشبوث قارشبيسيندا، ايران ميللي جبهه سي ناراضيليغين گؤستريب و بو ساحه ده تحصيل ناظري مرتضي حاجي، پارلمنت ده کي تحصيل مسئولو احمد پور نجاتي واؤلکه پرزيدنتي محمد خاتمي يه اعتراض مکتوبو گؤندرميشلر و مکتوب قيساجا بو آنلامي داشايير: « بو ايش اؤلکه ني تجزيه ائتمه يه ايمکان يارادماقدان و وطنداشلاري بير- بيري ايله بيگانه ائتمکدن باشقا نه سببي اولا بيلر؟ بيز بو عملي چاغداش ايران تاريخينده بؤيوک خيانت آدلانديريب، هابئله يابانجي لارين پروگراملاري اؤزرينده اؤلکه نين پارچالانماسينا امکان ياراتماغا تهليکلي آدديم سانيريق». قول چه کنلر: ايران ميللي جبهه سي نين هئيتي: اديب برومند، مهندس عباس اميرانتظام، دوکتور داود هرميداس باوند، مهندس نظام الدين موحد،دوکتور پرويز ورجاوند. 1382-نجي ايل بهمن آيي نين ايگيرمي سي.
اصلاح طلب قؤوه لرده ن يارانان مشارکت جبهه سي نين ده شخصلريندن آد آپارماق اولار: حميد رضا جلايري پور بو جبهه نين مرکزي شوراسي نين عضوي، اؤز مصاحبه سينده زنجان اؤنيورسته تينده دئميش کي،«بونلارين يعني آذربايجان ميللي حرکتينين فعاللاري نين فيکيرلري ساغلام دگيل». هابئله مشارکت پارتياسينا منصوب اولان تبريز والي سي سبحان اللهي بئله دئيير: « اساسي قانون مگر قرآن آيه سي دير؟ کيمسه بو گون آناياسانين 15- نجي اصليندن دانيشيرسا خائن دير و…». ميللي مذهبي، نهضت آزادي وباشقا رنگارنگ جريانلاردان وشخصلردن آد آپاريب و اونلار اؤزرينده بوندان آرتيق اشاره ائتمگ حوصله ده ن خارج دير. آتالار دئميشکن: «گؤروکن کنده، نه بلدچي»! بيزهر چاغدا بو يالانچي پهلوانلارين يالانلارينا تانيش اولموشدوق. بو جريانلار و شخصلر ميللي حقوقلارا بيگانه اولمالاري آيدين دير. يالنيز آذربايجانليلاري بوش سؤزلرله و دموکراتيا نامنه اؤز سيرالارينا يؤنتمک نيتينده ديرلر و جمهوريخواهلاريندا چوخو بو ضد اينساني تفکورلردن اوزاق دگيللر !
آذربايجان ميللي حرکتي نين قاباريق پروبلملري:
ا «اودلار يوردو آذربايجانا اؤتري بيرباخيش». عنوانيندا يازيم، «وارليغين سسي نين» اوچونجو ساييندا، 2001- بيرينجي ايلين آگوست آيي» نشر اولوندو. يازديدان مقصد آذربايجان اوغروندا فعاليت گؤسترن جريانلاري تضعيف ائتمک دگيلدي. بلکه ده گؤنده ليک مسئله لره ديققتله ياناشماق و چتينليکري اورتادان قالديرماق و آيدينليق گتيرمکدن عبارت اولموشدور. بو مقاله وطنداشلاريميز طرفيندن آلقيشلاندي و عين حالدادا نئچه اوخوجو طرفيندن بئله اشاره اولونموشدور: «بو آتشين تنقيدلرينيزده نه اوچون جريان و ياشخصلره اشاره ائتمکدن امتناع ائديرميسينيز؟ بوگون هرشئي خالقا آيدين اولماليدير. و… عکس تقديرده يئنه گله جکده فاجعه لرله اؤزله شه بيله ريک.» البته بو ديرلي اوخوجولارا دئمه لييم کي، اشاره ائتديگيم کيمي، بعض اعتراض وتنقيدلردن، هدف کيمسه ني تضعيف ائتمک دگيلدي. و يازيلاردا هر شئي آيدينجاسينا قيد اولونور. تدقيق ائديب و دوز يولو سئچمک وطنداشلارين آييق اولمالاريندان آسيلي دير. وبيزيم کيمسه دن و هرهانکي جريان دان آد آپارماغيميزين ضرورتي يوخدور.
يوخاريدا آدي چکيلن يازي نين آردينجا، بيرداها چاليشديم «بؤيوک آرزويا گئدن يول» مقاله سينده يئنه آذربايجان ميللي حرکتي نين سرعتله انکشاف ائتمه مه سينه، هابئله چتينليکلر و گرگين دورومون معيين عامللرينه کنکرت شکيلده توخونموش اولام: حرکتين تانينميش دوشمنلري نين هرچاغدا اولدوغو کيمي بوگونده چئشيتلي باسقي وتضييقلريني آيدينجاسينا گؤروب و حيس ائديريک. وفعاللاريميز بومسئله يه اويغون تدبيرلرله ياناشيرلار. آمما سؤزوموز آذربايجانلي وطنداشلاريميزا ديرکي، بعضي بيله – بيله و بعضي بيلمه دن دوشمانين يارديمچيسي اولورلار. تنقيدلريميز آجي اولورسادا چاليشاجاغام يئنه ده بيرپارا گونده ليک مسئله لري بويازيدا آچيقلاميش اولام. قوي. بعضي لري نين خوشونا گلمه سين! آمما ضعف نقطه لري خاطيرلاماق، ميللي حرکتي شفاف شکيلده گوجلنديرمک دئمک دير.
خارجده کي داورانيشلار
تاسفله ايران حاکميتلريندن بوراخيلان سياسي فرهنگين چرکين اثري 40 ياشدان يوخاري اينسانلار ايچرسينده. يعني اينامسيزليق، من- منليک، قسقانجيليق و… خسته ليگي چاغداش نسلين حياتيندا دا آجيناجاقليدير. بوگون بؤيوک توپلوملارين کيچيک جمعيتلره بؤلونمه سي و وطنداشلار آراسيندا داغيناقليق يوخاريدا قيد اولونان عامللردن عبارتدير. ايرانين سياسي اورگانلاريندا غيردموکراتيک آتمسفرده تربيت اولموش بعضي بو شخصلر بوگون اؤز چيرکين عمللرين آذربايجان توپلوملاريندا حياتا کئچرميشلر. آدي نين چکمه سي نين هله ضرورتي ني بيلمه دييم بعضي وطنداشلاريميزدان اولان بيريسي 1990- نجي ايللرينده مالمو شهرينده بؤيوک گؤزه چارپان بير صميمي قورومون داغيلماسينا سبب اولموشدور! تاسفله بوگون ائله بو شهرده نئچه اوفاق- اوفاق جمعيتلرين يارانماسي نين شاهدييق، عين حالدا وطنداشلار آراسيندا رابطه لرده سويوق دور. بئله بير شخصلرين تخريباتچليق لاري تکجه بير يئرده يوخ بلکه باشقا جغرافيالاردا دا اؤز لري کيمي شخصلرله علاقه ياراديب همن يئرده آذربايچانليلارآراسيندا يئنه پراکنده ليگه سبب اولموشلار. تاسفله گونئي وقوزئي آذربايجاندا دا ياراماز ايشلرله مشغول اولورلار.
2003-نجي ايل نوامبرآييندا آذربايجان ميللي جبهه سي طرفيندن منوچهر عزيزي بيگ تبريزدن، ايسوچه دعوت اولونموشدور. يوخاريدا اشاره ائتديگيم شخص بو مسافرتدن خبري اولارکن، ايسوچدن، عزيزي جنابلارينا تلفون آچييب، دئييرکي: سيز ايسوچه گلرکن، بيز سيزله حتما گؤروشمک ايسترديک و…. باخينيز! عزيزي بيگ کي، گرگين آتمسفردن خبري سيزدير و صاف اورکله گليرکي، بوتون وطنداشلاريله ياخيندان گؤروش ائدسين. بئله بير پرنسيپ سيز داورانيشي گؤره رکن انساندا شبهه يارادمازمي؟ بئله شبهه لي داورانيش يئرينه ائله ايسوچده ميزبانلارلا علاقه يارانماق اويغون اولمازديرمي؟ تاسفله ياراماز ايشلر هرطرفلي منفي اثرلرين گؤنده ليک فعاليتلريميزه بوراخماقدادير!
يوخاريدا قيد اولونان شخص، بيرگون کولتوره ل فعاليتي ائدير، بيرگون مختاريت طلب ائدير، بيرگون بؤز قورد وباشقا بيرگون ايران اوچون خارجده ميللي پارلمنت يارانماسين تکليف ائدير. تاسفله بيزيم بعضي اوزاقدا اولان آيدينلاريميز بئله شخصلرين بوش سؤزلرينه ايناناراق و مالمو شهرينده آنا ديلي سميناريندا ايشتراک ائديرلر. بو سمينارا ايسوچين اوپسالا شهرينده کي انيورسيته سي نين شرق شناسليق بؤلومونده فارس ديلي کرسي سي نين رئيسي خانيم جهاني ده قاتيلميشدير. اجلاس (آذربايجان ديلي وفرهنگي) ساحه ده اولسايدي دا، آنجاق خانيم جهاني بيرينجي نؤبه ده تريبون آرخاسينا کئچيب، يئرسيز اولاراق بلوچستان و بلوچلارين ديليندن سؤزآچميش وسونرا الينده اولان خريطه ني گوستري دستگاهيندا گؤسترميشدير. وبوخريطه ده آذربايجانين غرب سرحدلرينده بؤيوک بير بؤلگه باشدان- باشا قهوه اي جيزگي ايله آيريلميشدير. آذربايجانلي ايشتراکچيلاريندان بوياراماز ايشه اعتراض عنوانيندا توضيح ايسته نير کي، بو حدود نه دير؟! خانيم جهاني جواب وئرير: بو خريطه يانليش بورايا گتيرلنيبدير! نه ايسه، سيميناردا ايشتراک ائدنلرين سايي ان آشاغي سويه ده گؤزه چارپير و موجود دوروم دوکتور هيئتي وباشقالارين چوخ کدرلنديرير.
سياسي گروپ و جريانلارين دورومو يوخاريداکي قيد اولان آتمسفردن فرقلي دگيل. بو توپلوملارين بعضيلري حاققيندا بئله دئمک ايسترديم : پرنسيپلره گؤز يوموب، دويغولار چرچيوه سينده اولچوب، بيچمه دن سياسي تشکيلات يارانير! ليدرلر اورتايا چيخير، بو وطنداشلار ياراماز داورانيشلارلا اؤز لرين سورغولارا معروض قويورلار. تاسفله بو ياراماز ايشده قوزئي ده کي معيين شخصلرين ومعين مطبوعاتين ان چيرکين رولو اولموشدور! بئله اؤزباشينا آديني ليدر قويان آدامين بيرگون استقلاليت دن، بيرگؤن مختاريتدن، بيرگون تورک دونياسيندان و بيرآيري گون ايرانيت دن دانيشماسي و باشقا بيرگون گونئي آذربايجانا بايراق چيخاريلماسي نين شاهدي اولوروق! وخالقين اعتراضينا معروض قالارکن، دئييرلرکي، بو يالنيز تشکيلات بايراقي دير! بوتون دانيشيقلاردا، يازيلاردا، سايتلاردا و… حقيقتلر يئرينه بيرپارا بوش شعارلار سسلنير!
بيرباشقالاري دا دونيا آذربايجانليلار آدي ايله چاليشيرلارکي، غيردموکراتيک داورانيشلارلا بوتون ميللتين تمثيلچي سي اولسونلار. آنجاق بئله بيرجريانلار خارجده ياشايان آذربايجانليلاري دا تمثيل ائتمک حقوقونا مالک دگيل لر. تاسف اولسون کي غيردموکراتيک جريانين قورولتايندا آذربايجان جمهورييتي نين پارلمنتيندن وباشقا دؤولت اؤرگانلاريندان و بعضي اپوزوسيون قؤوه لردن ده ايشتراک ائدنلر گناهسيز دگيل. بعضيلري خاريجده خستليک و تخريب ايچينده غرق اولموش، وکاغيذلار اوسته تئوري شکيلده عاغيلا سيغينماز رويالاردا ياشاماقداديرلار. بو نلارين بير- بيري ايله داورانيشلاري طبيعي مصيبت دگيل محض دوشمانچيليق وتخريب دير وبعض واختلار بو گروپلارين دعواسي گونئي آذربايجانادا چکيلير. بيرباشقا وطنداشلاريميز هله ده اسکي ايده ئولوژو رويالاري ايله ياشاماقداديرلار. و کهنه فکير دايره لرينده و ايده ئولوژيک باتلاقلاريندا باتيب قالميش و بو وطنداشلار آذربايجان ميللي مفکوره سينه شبهه لي باخيرلار. و بوساحه ده منفي داورانيشلاري نين هرطرفلي شاهدييق. و بو شخصلرين بعضي لري ده آذربايجان فعاللاري ايچرسينده فعاليت گؤسترمکده ديرلر. بوتون بئله داورانيشلاري اولدوقو کيمي ميللي حرکت اوچون اوغورسوز عامللردن سانيرييق. بو شخصلر چاليشيرلار اؤزلرين ميللي حرکت فعاللاري ايچرسينده پيسکولوژي خستليگي ياراتماقا سبب اولسونلار. حرکتين بوگونکو گرگين دورومو تصادفي دگيل. عموميتله بعضي ياراماز حرکتلر حاققيندا، «اودلار يوردو آذربايحانا بير باخيش» مقاله سينده آرتيق معلومات وئريلميشدي .
دونيا سياستي؟
عموميتله آذربايجان ميللي حرکتينده، چاغداش سياستلره، خصوصيله دونياداکي يئني نظام قورولماسينا وبو استقامتده خارجي قدرتلرين مداخله لرينه گؤز يومماق اولماز. باخين. بيرلشميش ميللتلرين 27-نجي ماده سينده خالقلارين مدني، سياسي حقوقلاري اؤزرينده بئله دئيير: « او اؤلکه لرده کي نژاد، مذهب و ديل آيريليقلاري واردير، موجود اقليت لره منصوب اولان شخصلري اؤز حقوقلاريندان محروم ائتمک اولماز. بونلارين توپلوملاري ايچرسينده فرهنگيندن مذهبيندن و ديللريندن فايدالانماقلاري گرکدير» بو اصل هرهانکي بير اؤلکه ده اقليت لره حاکم اولان ديل، فرهنگ و مذهب اوستونلوگونه شامل اولور. وايرانداکي دوروم بو پرنسيپلردن استثنا دگيل. همجنين بيرلشميش ميللتلرين بيرينجي ماده سي خالقلارين مدني، سياسي، ايقتصاد ي، ايجتماعي وفرهنگي حقوقلاري اؤزرينده ده بئله دئيير: 1- بوتون خالقلار اؤز طالعلرين الده ائتمگه مالک ديرلر. وبو حقوقا داياناراق اونلار اؤز سياست لري ايله ايقتصادي، ايجتماعي و فرهنگي انکشافلارينا سربست داوام ائتسينلر 2- بوتون خالقلار اؤز هدفلرينه نايل اولماق اوچون بين الخالق امکداشليق پرنسيپلرين نظرده آلاراق اؤز دوغال قايناقلارينا مالک اولماليديرلار. وهئچ عنوانلا بيرخالقي حيات وسايليندن اوزاقلاشديرماق ممکن دگيل. 3- بو آنلاشمالار داخيلينده اولان اؤلکه لر، خالقلار طالعلرين الده ائدرکن اونلارلا امک داشليق ائتمه لري و بين الخالق فرمانلارينا حورمتله ياناشمالاري مجبوريتينده ديرلر.» بو ماده ده خالقلارين طالع لري اؤز اللري ايله الده ائتمک حاققينا تاکيد اولونموشدور.
ائله بو قانون اساسيندا بيرلشميش ميللتلر کشمير خالقينين طالعلرين الده ائتمه سيني رسميتله تانيميشدير. هابئله کئچميش يوگسلاويادا توقوشمالار چاغي بيرلشميش ميللتلربو جغرافيادا ياشايان خالقلارا يارديم گؤسترمکله. و هرخالق اؤزو –اؤز طالعين الده ائتمه قانونو ايله بو خالقلارين استقلالي اوغروندا آدديملار گؤتورولدو. همچنين چک و اسلواک اؤلکه لري نين مدني شکيلده آيريلما لاري آيدين دير. و… وايرانا گلديکده اؤزل بير قانونلار يوخدور ائله بو جغرافيادادا دونيادا کئچيريلن بين الخالق قانونلاري تئز ياگئج جاري اولاجاقدير.
نهايت بؤيوک آرزويا نايل اولماقدا، ايکي اؤنملي عامل ديققت مرکزيندن اوزاقلاشماماليدير. بيرينجي خالق کوتله سينه آيدينليق وئرمک و دموکراتيک متودلارلا خالقي صحنه يه چکيب و وظيفه لري بؤلمک و بو تشبوث بوتون ميللتيميزين گوجونه سئوکنمک دئمکدير و بئله ليکله خالق آلديغي آزادليغين قوروجوسو اولا بيلر! ايکينجي سي دؤزگون استراتژي ايله بين الخالق سياستلرين ميللي حرکته جلب ائتمک! ايستر- ايستمز معين عامللره گؤره خارجي سوپر دؤولتلرين آذربايجان جغرافياسيندا آرتيق ماراقلاري واردير.
سون سوز ؟
ايراندا کي حاکميت و اوپوزوسيون قووه لري نين ميللي حقوقلاريميزا غيردموکراتيک ياناشمالاري ايگيرمي بئش ايل ايچرسينده ثبوت اولموشدور. بوندان سونرادا معجزه گؤزله مک ساده لوحلوقدان باشقا بيرشئي اولا بيلمز. ايستر- ايسترمز، بو قووه لرين داخلينده اولان آذربايجانلي وطنداشلاريميزدا زامانا اويغون شرايطده اؤز ميللي قوروملارينا قوشولاجاقلار.آزاديخواهليق مبارزه لري بوگونه ده ک ديکتاتور اؤلکه لرده غيرطبيعي انکشاف ائدره ک انقلابلا چئويريلميشدير. 1357 – نجي گونش ايلي پهلوي ديکتاتورلوغو قارشيسينداکي انقلاب گؤز اؤنونده دير. ائله بوگون ده ايراندا کي دوروم فرقلي دگيل.
دموکراتيا دوشمنلري گله جکده خالقين عصياني ايله قارشيلاشيب واينانماديقلاري حقيقته ايناناجاقلار. آمما آذربايجان آيدينلاري انقلاب يولو ايله يوخ، بلکه ده ان مدني وسويل يوللارلا ميللي حقوقلارينا چاتماغا اينانيرلار. وبو استراتژي آذربايجان فعاللاريندا متانت ودؤزوم طلب ائدير.
بوگونکي آذربايچان ميللي حرکتي نين دورومو اولدوقجا آغيردير، هله دموکراتيک ائتلافلار يارانمادان، عمومي دوشونجه يارانمادان، فيزيکي گوجه مالک اولمادان تاسفله بعضيلري دويغولار اساسيندا قورو شعارلارلا مشوغدورلار. و بوحال راديکاليزمين گوجلنمه سينه ومنليک ادعاسيندا اولان شخصلره ايمکان يارادابيلر.آذربايجانين بؤيوک پروبلمي آشيري ساغچي وآشيري سولچو و ميللي وارليغيندان اوزاق دوشموش سرمايه صاحيبلري دير. ومستقيل فيکيرلي آذربايجان خالقي نين چتينليگي يوخدور .
عموميتله بعض آيدينلار، آغ ساققاللارين، هابئله سرمايه صاحيبلري، محافظه کارليق، مصلحت و قورخو داخلينده غرق اولماقلاري آغير دورومون ان اؤنملي سببلريندن بيري دير. تاسفله عين دوروم بيرينجي دونيا ساواشي عرفه سينده ده اورمو شهرينده فاجعه لي سوي قيريملارا سبب الموشدور. بعضيلري هله ده اولايلارين گله جکده اؤز وئرمه سيني دوشونمورلر. سانکي، هرکس گله جک احتماللاري قارشيسيندا معجزه گؤزله مکده دير.
گورسن. 30 ميليوندان آرتيق ايرانين سياسي حدودلاري ايچرسينده ياشايان آذربايجان خالقي نين آزادليغي وسعادتي اوغروندا، نيه خالقا لاييق آدديملار گؤتورلنمه ييب؟ گؤرسن بوخالقين سياسي تشکيلاتلانما پروسسلري نين گئجيشمه سينده يوخاريدا آدآپاريلان عاميللر نه قده ر مسئولدورلار؟ گوره سن گله جک بو داورانيشلارا يانليشليق دئييله جک ياخيانت؟
بعضي لري بوحساس دورومدا، تکجه سنتي فرهنگي ايشلرله راضيلاشيرلار! هله ده ايرانين دموکراتلاشماسينا آيدين باخيرلار! هله ده خالقيميزا باشقالاري ايله بيرگه سعادت گتيرمه سينه اينانيرلار. فرهنگي فعاليتلرين گئنيشمه سي سئونديريجي حال دير. البته کي بو تدبيرکوتله نين آيدينلاشما و اؤز ميللي وارليقلارينا رغبت گؤسترمکده يوکسک رولو اولاجاقدير. آمما بو وطنداشلار قونشو خالقلارين رنگارنگ سياسي اورگانلارينا باخييب اؤز ميلتلرين اونودماماليديرلار.
گونئي آذربايجانداکي سياسي بوشلوق بوتون ائل- اوبا سئونلري بو تاريخي مسئوليت اؤزرينده سفربرليگه چاغيرير. وتاريخين حساس شرايطينده آذربايجان ميللي حرکتينين ضعف لرينه سون قويوب و بو شوم دوروما چيخيش يوللاري آراييب تاپماليييق. هابئله سرعتله هدفه وورماقي بو حرکاتي جانلانديرماقي هرآذربايجانلي نين قارشيسيندا ميللي وظيفه دير. و بوحساس مسئله يه سويوق قانليقلا باخانلاري خالقيميز باغيشلاماياجاق .
موجود دورومدا گونئي ده سياسي- ايجتماعي وفرهنگي شخصيت لرله سيخ علاقه لرين يارانماسي وفکيرداشليق ومناسب استراتژي اؤن پلانا چکيلمه سي ضروري دير. و بو ساحه ده چئشيتلي تاکتيک لرين و شعارلارين سئچيلمه سي وخالقيميزين پيسوکولوژوسون نظرده آلاراق سيخ ائتلافلار اؤزرينده گوجلو آلتيرناتيو ديرچلمه سي ايله، بين الخالق حمايه سيني الده ائتمک اولار. يارانان ائتلاف دا استراتژي مطلق آيدين و شفاف اولماسي نين ضرورتي وار. وبو حرکتي هئچ بيرايجتماعي، سياسي ويا مخصوص طبقه يه باغلاماقا امکان وئريلمه مه ليدير. آنجاق، عمومي دوشونجه يه داياناراق هئچ بيرشئي قارانليقدا قالماماليدير وخالق اوچون شفاف پروگرام لازم دير. و بئله ليکله خالقين اعتمادي، اينامي و روحو داها يوکسه له جکدير.
بير جبهه ده و سياسي ائتلاف دا هدفه چاتماق اوغروندا آيري- آيري تاکتيک لرده اختلاف نظر اولورسادا بير- بيره حورمتله ياناشيلماليدير. آمما سياسي استراتژي ده مطلق بير هدفه وورمالييق. سون