هيجرانلار آلوده سي اوستاد علي سليمي نين خاطره سينه وگول ساچان نغمه لرينه

هيجرانلار آلوده سي اوستاد علي سليمي نين خاطره سينه وگول ساچان نغمه لرينه

نه دنسه هر زامان هرمكاندا تبريزين تارمكتبي وغلامحسين بيگجه خانيدن سؤز دوشنده ايستر ايسته مز اوستاد علي سليمي نين آدي ومضرابي يادا دوشور. ايكي آيري- آيري يوللارلا موسيقي دونياسينا قدم قويان بو ايكي اوستاد آيري-آيري يوللارلا گليب بو مكتبين زيروه سينه چاتديقلاري حالدا، ائله بيل باشي بلاليي تبريزين فغانلاري ايله سس سسه وئرمكده تارلاريني عيني رديفده عيني ساياقدا ديلنديرميشلر.

ايندي بيز سيزلري ايراندا نشر اولان ماهور موسيقي درگيسينده اوستاد علي سليمي واونون هنري باره ده يازيلميش مقاله نين قيسامضمونو ايله تانيش ائديريك: مقاله نين فارسجا اصلي اصغر فردي نين جوشغون قلميله يازيلميشدير.

تار اوستادي وبسته كار ((علي آلود)) يعني علي سليمي نين آتاسي ظهراب ايش اوچون باكييا گئدنلردن بيري ايدي، ظهرابين آتاسي،‌ يعني علي سليمي نين ده ده باباسي سليم آدلي كيشي نين اوغلوايدي، سليم كيشي ساوالانين اتكلرينده بال پته يي بئجرماق ومالدارليقلا عؤمور سورودو. او بال پتك لري آماندا اولدوغو اوچون اونلارين اوستونه قرآن قويموشدو كي بلكه شاهسونلر آللاهدان واونون كلاميندان چكينيب پتكلرينه توخونماسينلار. لاكين آتليلار توكولور وچكيينمه دن پتكلريني تاراج ائديرلر. سليم كيشي بويغمانين ايتگيسي ايله سكته ائدير واوغلو ظهرابي وقيزي ((قيزتامامي)) يتيم قويوب گئدير. ظهراب 14ياشينداباكييا ايشچيليگه گئدن جوانلارلا اوتايا يوللانير. اورادا اول ايشچي اولوب سونرا باكييا گلير وبيرقيزلا ائوله نير.

بو وصلتدن ((علي آقا)) وقارداشي ((نادر)) دونيايا گؤز آچيرلار آتالاري ظهراب باكيدا ((آذنفت)) شركتينده نفتچي اولور وعلي اورادا مدرسه يه گئدير. 5نمره لي مدرسه ده علي نين ادبيات معلمي معروف شاعر ((مكائيل مشفق)) اولور. علي نقل ائديردي: ((بيرگون ميكائيل معلم كلاساگلنده گؤزلري آغلاماقدان قيزاريب ورم ائله ميشدي، احواليندان سوروشونجا آغلايا- آغلايا دئدي آذربايجان تئاتري نين پارلاق اولدوزوبؤيوك يازيچي ودراماتورگو ((جعفرجابارليني)) اؤلدورموشلر، مكائيل مشفق اؤزوده چوخ چكمه- دن رژيم طرفيندن تارين قدغن اولماسينا باخماياراق

((اوخو تار، اوخو تار، سني كيم اونودار)) شعريني يازديغي اوچون ميرجعفر باغيروفين ((تصفيه)) اوخونا راست گلير. كلاسدا اوشاقلار موسيقي اؤيره نيرميشلر آتاسيندان ايستر اونادا بير دانا تار آلسين. لاكين  نماز جماعتده هميشه حاضر اولان ورجبي ساييلان يعني رجب، شعبان، رمضان آيلاريني اوروج توتان ده ده سي بونونلا برك مخالفت ائدير، آمما علي نين موسيقيه علاقه سي ياواش- ياواش اونو يوموشادير وعلي نين خالاسي قيزي آلديغي تاري علييه وئريب اونو گريشا آدلي بير موسيقي معلمينه تاپشيرير. او دئيير هرگون نئچه كره تاري سيليب تميزلرديم. ساري سيملري اوخشاياندا سرخوش اولارديم. بوگون ده ائله تارين ساري سيملرينه وورغونام . . .

من اؤزوم گئتميرم او مني چكير، ائله بيل ساماني كهربا چكير.  ياخامي اليندن قورتارانميرام، زورلا اته ييمي داليدان چكير. ال- آياق چاليرام باشيما قونور، باشمي توتارسام آياقدان چكير…

اونون ديشي اوچون چؤرك اولماغا، بوغدامي درماندا دارتماغا چكير. اونا كؤلگه اولدوم آيريلانميرام دالينجا يورورم هارا ايستر چكير.

سليمي دئيير: ارمني كيشي نين يانيندا ساز اؤيره نيرديم. بيرگون ائوده تكليكده مشق ائدنده او گليب چيخدي ومنيم تاريمين سسيني ائشيديينجه اوتوردو ودرس وئرمك ايستمه دي. قيسقانج (حسود) ايدي وهرنه اصرار ائله ديم دئدي: سن مندن ياخشي چاليرسان ومنيم سنه درس وئرمه لي داها مطلبيم يوخدو. گئتدي وبيرده قاييتمادي))

سليمي سونرا آتاسي نين يارديمي ايله احمد باكيخانوفون تار مكتبينه تاپشيريلير.اونون دئديگيندن آيدين اولوركي باكيخانوف سولاخاي ايميش وتاري چوخ اينجه وملاحتلي چالاردي. آذربايجان مقاملارينا هاميدان چوخ مسلط ايدي. او آذربايجان موسيقي سنين ايران موسيقي سي ايله ياخين وآيريلماز آداشليغينا بلد ايدي وبو ايكي موسيقي نين بير- بيريله ياخينليغيني گؤستريردي.

سليمي 17ياشيندا رديفي باكيخانوف مكتبينده اؤيرندي وباكيخانوف آدينا 26لارآدينا)) گروهدا تارچاليردي. اوبيرگئجه ائوه گلنده گؤرور سالداتلار ائوه سوخولوب وهر شئيي آلت- اوست ائديبلر وآناسيني  آغلار گؤرور. او ايللر باكيدا وباشقا شهرلرده ايراندان اورايا ايش اوچون گئدنلري اگرروسيه تابع ليگينه گئچمه سه ايديلر. ايرانا قايتاريرديلار. سليمي نين آتاسي توتولور وآناسي ايكي آي سونرا اؤلومجول حالدا يئرآلماسي آنباريندا تاپيليربيرگون باكي اسكله سينده بيرعده- ني گمييه يوكله ييب ايرانا گؤنده ريرلر. سليمي اؤزيله فقط بيردانا تار گتيره بيلير. ايكينجي تاري اليندن آليرلار. 1317-نجي ايلده بهمن آيي نين گؤنلريندن بيرينده اونلاري انزليده  گميدن يئنديريرلر. علي كوچه ده يورغان- دوشك باغليسي اوستونده اوتوروب تار چاليردي. آناسي دا آغليردي. عائله اوردان رشته، سونرا اردبيله، اوردان سونرا شاهي يه گئديرلر وسونرادا تهرانا گليب چيخيرلار.

سليمي تهراندا تاردان چؤرك چيخارتماغا مجبور قالير. او قافقاز تاري نين هاواسيني دگيشمگله باشليرفارسي موسيقي چالماغا. او دئيه- ردي: من تهراندا توركو تارايله فارسي   چاليرديم وبيكجه- خان تبريزده ده فارسي تاريله توركو چاليردي.

بوايش سليمي يه خوش باغيشلادي، چونكي اونا آياق دوشدو او گؤنلرين سس ايلاهه سي وموسيقي دونياسي نين خوش الحان نغمه كاري، قمرالملوك وزيري يه تارچالدي واوندان علاوه رجب رشتي يه كي سليمي اونو اعجاز موسيقي بيليردي ودئييردي كي او حتي تاردان بير پرده ده اوسته اوخويوردو، تاريله همراهليق ائتدي وسونرا بديع زاده، قمر، روح انگيز كيمي اوستاد اوخويانلارا تار چالدي وابوالحسن صبا، مشيرهمايون شهردار، محجوبيلر (رضا ومرتضي) كلنل وزيري واحمد عبادي كيمي بؤيوك موسيقي اوستادلاريله اوتوروب- دوردو واونلاردان بسته كارليغين فوت فنلريني اؤيرندي وان سوندا 1337-نجي ايلده راديويا گئتدي. راديودا مشير همايون اوندان امتحان آلدي. روح اوللاه خالقي چوخلو سئواللار سوروشدو. ملاح دا هارموني واركستراسيون باره ده اونا سئواللار وئردي وايسته ديرلركي بير ((راست)) چاليم، چالديم مدهوش اولدولار و دئديلر ايران موسيقي سي نين ايتيب باتميش گوشه لريندن چاليرسان.

شوراي موسيقي راديو اونو حسابي تحويل آلير وخالقي يازيركي اونو ايشه گؤتورسونلر ومنه اركستر رهبرليگي وئرسينلر. اونو ايشه آلديلار، چالديرديلار، لاكين پول وئرمه ديلر وحتي بعضا راديويادا آذري نواز اولدوغو اوچون پول وئرمه ديلر، او دئيير: ((گئديرديم مجاني چالام. لاكين مفته چالماغادا اجازه وئرمه ديلر وقاپيدان قووووردولار و دئديلر گئنه ده كي گلدين. گئت هروقت ايراني چالا بيلدين گل!))

او واختلار تبريزده و اردبيلده فارسي اوخويوردولار ومعناسيني باشا دوشموردولر. بيز بونون معناسيني سونرالار باشا دوشدوك. آخرده مجلس شورا تصويب ائله دي كي آذربايجان موسيقي سينه راديودا اجازه وئريلير وحقوقلاريني آلا بيلمه ينلرين حقوقو وئريلسين. ناهار اذانيندان قاباق او ايلده گونده بير ربع وسونرالار ياريم ساعات راديودان سليمي نين تاري ائشيديلردي. سونرالار اركستر آذزبايجاني، ترانه لر تصنيفلر ومقامات وداها سونرا مصطفي پايان وسليميدن علاوه دادستان پور، عادل آخوندزاده، صفرعلي جاويد، مش سيفي، جاباراوف اسرافيل، آوانس، وارطان وآيريلاريندان آد چكمك اولار.

قيرخ اينجي ايللرين سونوندان تا 50-نجي ايلين سونلاريناجاق سليمي يوزدن چوخ آهنگ بسته له يير. اواغلب رحمتليك ميرمهدي اعتمادين غزللرينه آهنگ دوزه لديردي وجوان شاعرلردن ده شعرلريني اونا وئرنلر اولوردو. بيرگون اونون حيات يولداشي فاطمه خانيم قناديان(وارتوش) اونا بير پارچا شعر گتيرير ودئييركي، جوان مشتري لريمدن بيري خياط خاناما گتيريب كي اونون سئوديگي  بيرقيزي اؤزگه سينه وئرديگي اوچون ايكي شعر((آيريليق)) و ((آغلاما)) ني اونا وئرير واوستادسليمي اونو اوخويونجا نغمه يازماغا باشلايير: فكيريندن گئجه لر ياتا بيلميرم بوفكري باشيمدان آتا بيلميرم . . .

علي سليمي، آيريليغين دونيا شهرتي قازاناندان سونرا شهريارين ((حيدربابا)) سينادا بيرآهنگ يازير. اوآهنگده قاناد آچير ودونيايا ياييلير. اونو اول هوشنگ آوج (آذراوغلو) اوخوموشدو. بو آرا تهراندا بوخبر ائشيديليركي شهريار يئنه تهرانا قاييدير. سليمي بير كنسرت يولا سالير وبيرسلام پيامي ايله سرود وكلام اوستادي نين حضورونا گئدير. ((واله)) هين ((سيزه سوغات گتيرميشمي)) شهريارين الينه چاتير واوندا ((سوغاتي)) سلام لا دگيشير.

تبريزده اوگونكوشورا آذربايجانينا راديوبرنامه- سي سؤزو آراياگلير. البته تبريزده علي آقا داستان- پور آدلي تار سحركاري واساطور سفريانين دا اركستر گروپو وار ايدي. آمما سليمي بونلاردان باشقا ايدي. او 57-نجي ايلدن قاباق دفعه لرتبريزه گلميشدي، لاكين اونون قطعي گليشي 1358ده باش توتور. بوسفرينده اوآذربايجان اركستر گروپونو تشكيل ائتمكله  يوزلرله سرود، ماهني وفيلم موسيقيسي يارادير. اواولده تبريزده اجاره- نشين اولور وبيرمدت تبريزين معروف تارزنلريندن محمود شاطريانين ائوينده دالدالاناندان سونرا بير خيرداجا سازماني ائوه كؤچور لاكين اورادادا ياشاماق امكاني اولمايينجا مدتلر تبريزده ائوي دالينداگزيشير وبواونون آخساق اوره گيني بيرداها دريندن دؤيونمه يه سبب اولدو وبو دؤيونتولر نغمه- لري ناله يه چئويردي.

قوجامان تارزن بير قوجامان اوشاق كيمي- ايدي. هميشه گولر اوزلو ايدي وهئچوقت گولوش غنچه سي دوداغيندان دوشموردو. بايراملاردا هاميني قاباخليردي، زنگ ووروب تبريك دئييردي. اوره- ييمده بئله بير آرزي گول آچميشدي: كاش بير طوي ائدئيديم وبيكجه خانيني، فرنامي وسليمي ني چاغيرئيديم. قوجا هاردانسا بونيسكيلي دويموشدو. بونيتله گاهدان بيرمشترك دوستلاري بيزه چاغيريردي  وسحره جن چاليردي. هئچ كيمين اوره ييني سينديرماق ايسته مزدي. هركس اونوهر يئره چاغيرسايدي گئدردي. نقل ائديردي: ((آلماندا بيرشهره چاتديق. اورادا دوستلاردان بيري ياشيردي. ائوينه گئتديك. ولي ائو صاحبي ائوده دگيلدي. قاپيدا اوتوردوق بلكه گلسين، گليب چيخمادي. گئجه گئچميشدي قونشونون گليش- گئديشيندن باشا دوشدوك كي اسلاويان ديرلار. تاري كؤينه ييندن چيخارتديم وبالكان خلقلرينين نغمه لريندن چالماغا باشلاديم. مجار اويناماق هاواسيني چالاندا قاپي آچيلدي. ائو صاحبي مجار- ايدي. بيزي ائوينه آپاردي، دوستلاريندان دا چاغيردي. قونشو مجارلارا بير كنسرت يولا سالديق)).

تاري اولدوقجا لطيف ومهارتلي چاليردي. دئييردين آللاه اونو دوغرولدوب ويئره گؤنده ريب كي گئت تار چال! هم ده رومانتيك و رومانسلي چال. تاري سحرلي ورويائيردن. بيلميردين هارادان چالير يعني هانكي ميلتين ديليندن چالير وهانكي تاريخين اوزاق افقلرينده ياشايان قبيله لرين لهجه سينه اوخشايير. او بتهوونين سمفونيسيني پاستورال هاواسي ايله بوياييردي. روسي رقصلريني لزگيلرين آياق قيرديلارين، چچنلرين كدرلرين وقيشقيريقلارين، اسپانيا كوليلري نين گيتاري، بايات تهراني نين كوچه باغي تصنيفلريني، عثماني موسيقي سي نين ايلمله ريني وكليسانين ايلاهي پيچيلتيلاري . . . خلاصه او تارين عادي وتكرارلانان گوشه لرينده فيرلانان بير هنرمند دگيلدي. او قديمي بير نغمه ني تازا روايته  جالاييردي شهابي آهنگيندن ((آري يوواسي)) شورالدشت دن فورته پيانو چيخاريردي. مضرابسيز، بارماقلارين ساري سيم لرين اوستونده گزيشمه سيني وساري سيملري تارين اوزو قدر سئويردي، تاري قوجاقلاريندا ساعاتينا دوشموش بير مرهم كيمي انسان چييين لرينده يئر آچميش غريبلك وايش سيزليك ودربه درليك يارالارينا سورتوردو. مضرابي تارلا عشق بازليغا چاغيراندا چناغي ائله باغرينا باسير ونوازش ائدير دئيه سن اؤز بالاسيني سينه سينه باسير ونوازش ائدير. سون زامانلاردا تار چالاندا درين وآمانسيزدرد سينه سينه قاپسانبردي. دئييرلر تارچالما، آمما مگراولاسييدي ؟ يئنه چاليردي خسته خانادان باش چيخاريردي. بير واختلار اونون اؤرك درماني آز تاپيليردي، اوقلب درمانيني اؤرك خسته لريله پايلاشيردي ياداها دوغروسو اونو اونلارا وئريردي واؤزو درمانسيز قاليردي.

بيرگون، اللي يئدي ايلدن سونرا بيرليكده باكييا اونون دوغدوغو شهره  گئتديك تابلكه قديم عهدلري تازالاياق. اونون ((آيريليغي)) افسانه اولموشدو. بعضلري اونو ((آپاردي سئللر ساراني)) كيمي شها بيليرديلر. اينانا بيلميرديلركي اونو بوگونكو نامرد زمانه نين بير مرداوغلو ياراتميشدير. باكي نين كنسرواتوري رئيسي، فلارمونيا رئيسي، بسته كارلار (آهنگ قوشانلار) هامي گلميشديلر بلكه اونا بير دگرلمه مجليسي قورسونلار. لاكين او مندن ايسته دي كي، اونو معركه دن قيراغا چكيم. او دئييري: بو منيم ايشيم دگيل كي صحنه ده اوتوروب دانيشيم. منيم ايشيم ساز چالماقق دي.

آمما بالاخره بيرمجلس قوردولار گئتديك آتا ائوينه يا واقع ده آنا ائوينه. چوخ غم دوغوران صحنه لر يارانميشدي. خالا اوغلانلاري كوچه ني گسترديكده او گؤزو باغلي گئديب ائوي تاپدي. زار- زار آغلادي، اوشاق كيمي آغلادي، يتيمانه  آ‎غلادي.

هركسي سراغلاشديم اؤلوم خبريني وئرديلر وقالانلاردا حسرتين اوسته له ديلر. فقط اؤزونو بيرآغ ساققال قوجانين قوجاغينا آتدي و ((كمال)) دئيه زار- زار آغلادي. اوشاقليق ايللري دوستو ايدي. اوشاقليقدا هر ايكيسي آسيد يوكلنميش كاميونون داليندان آسلانيرلار. آسيد بوشقاسي ترپه نير آسيد تؤكولورو كمالين اوزونو يانديرير. او كمالين اؤز ياراسيني گؤرمكله اونو تانيدي. گئجه  سحره جن يوخوسو آپارمادي. مهمانخانادا گؤزونو بيرگوشه يه تيكدي وياتمادي. خالا اوغلانلاري او گون آتا ائوي نين كيليديني اونا وئريرديلر او آلمادي باخماياراق كي اؤزو ايللر ائوسيز ياشادي وائو اسبابيندان بير تختخواب، بير ميز، نئچه صندلي لهستاني، بير اسقاط ضبط وبير اووج خيرت پيرت. شهريارين دونيادان كؤچمه سي نين بيرينجي ايليني  گئچيرديرديك. شاعردن ايكي – اوچ قطعه شعر اوخومالي ايديم. فارسي شعريني رضا رضوي نين پيانوسو وتوركو شعريني اوستادين تاري ايله ((آيريليق)) وشهريارين يالان دونياسيني دكلمه ائله ديم. جماعت آغلاشيرديلار. سليمي شعري دينله يير واونا  موزيكال دون بيچيردي. سونوندا داها ائله بيل هئچ نه ائشيتميردي، گؤزلريني يومموشدو ونغمه ياغديريردي. گؤزياشلاري تارين چنلغينا داميردي. بيرده بيره جماعتين ال چالماسي وهلهله سي اونو اؤزونه گتيردي و اؤز هوشلولوغوندان اوتانير وعذر ديله يير كيمي صحنه دن جماعتين باشي اوسدن سويروشدو وبير گوشه ده اوتوردو. يئرلي ايدي مجلسي بو رؤيا ايله باغلاياق. مجلس ناقص دگيلدي سليمي اونو تاماملاميشدي.

گلر بيرده يوخودا گؤرك

سس سيز- سميرسيز آراميزدان كؤچندن سونرا پاريس ده، يونسكو عمارتينده هئيكليني قويدولار وآلتيندا يازديلار ((شرقين بؤيوك بسته كاري))…