سهند راديوسو ايسوچين يوتوبوري شهرينده رحمتليك پروفئسور علي مينائي تبريزي نين سوگ نامه سين ياياندان سونرا، اوستادفرزانه ايله تلفني باغلانتيدا اولاراق، اوستادا او رحمتليگين تورپاغا تاپشيرما غي حقينده سوورغو وئرير. اوستادفرزانه سورغونوبيله جوابلانديرير: بوگون ديشده(خارجده) آذربايجان مسئله سي اؤزره بير پارا مباحثه لي پرنسيب سيز حركت لرين اولدوغونا اشاره ائتمكله، دئيير كي بوپرنسيب سيزليك چشيتلي شكيلرده اؤزون گؤسترير وحتي رحمتليك مينائي نين تورپاغا تاپشيريلماسيندا دا اؤزون گوستردي. بيز ايندي وارليغين سسي، تلفن باغلانتي سي ايله اولان مصاحبه ني اوخوجولاريميزا آشاغيدا قئيد ائديريك:
عزيز دينله ينلره سلاملار وسايغيلارلا. نه قدريئرلي اولدوكي، سيزتلفون باغلانتيسي آچديز وبو سورغونو وئرديز. اجازه وئرين اونجيب وگوركملي انسانين تورپاغا تاپشيريلماسينا قيسا اولسادا اشاره دن اونجه،نئچه كلمه بوگون گونئي آذربايجاندان وايران توركولوگوندن قيراخ سورن اولايلار ودوروملارا اشاره ائديم. ياخشي بيليرسيزكي. سياسي وملي دموكراتيك قورتولوشدا ايكي جورمسئله اورتادا حكم سورور. بومسئله لردن بيري حركتين اصول واستراتژيسينده اؤزونو گوسترن باخيشلار وحركتلرديركي،اونلارين اوزه رينده هئچ جورمصالحه يامساليمه يول وئريلمز، بونلاردان ايكينجي سي تاكتيكلر وشيوه لريا نئجه دئيه ر سليقه لرده تؤره نن اويوشمازليقلار وشيلتاقليقلارديركي اونلارا بير درجه مسامحه ايله ياناشماقلا اونلارين هرحالدا گونده ليك گئديشاتدا تئزيا كئج دوز- دوغرو يوللارا وقانونا اويغولوقلارا يؤنلمه سيله مسئله حل ائديلير.
بوسون ايللرده وخصوصيله من اضطراري حالدا سوئده قالديغيم اوچ ايلده بيرسيرا استراتژيك. واصولو پوزان حركتلر وگئديشات اؤزونو گؤسترمكده دير. بونلارين سيراسيندا وبيرواختلي- واختسيز صلاحيتسيزكنگره- لروكنفدراسيونلارخلق آدينا لاكين ساييلي بيرعده نين ييغيلماسي وخلق آديندان دانيشماسي وحتي بيرسيرا مبارزه نين شرايطي ايله اويوشمايان تشبثلره ال آتمالاريدير. بيرگون اولكه ده گئدن درين انتباه واؤز كيمليگينه قايتماغي آماج تعيين ائدن حركتين مفهومونو آنمادان وقانمادان اونون آخينينا قوشولوب وامكان الده ائدينجه اوندا رخنه سالماق وياانحرافا چكمك وگويا اؤزلرينه وصي قيوملوغا يئر آچماقدير. بونمونه لربيردانا، ايكي دانا يوخ بلكه هرفرصتده اوزونو بيرتازا شكل شمايلده گؤسترمكده دير. بيرچوخ ياراماز خصلته بعضي آداملاردا توخونماق اولوركي بونلار ايشيني- گوجونو بوراخيب وتكجه نه بيليم هانكي تانيلماز گروپون توصيه سي ايله رهبرو ليدر يونتانيرلار. بونلار حتي يورد وائل اوغروندا زحمتلره قاتلاشانلاري مختلف يوللارلا جلب ائتمگه چاليشيرلار واونلارين پاك آدلاري نين لكه لنمه سي اونلاري قيپچانديرير من بوتون بو ياراماز تشبثلرين وخلقين مبارزه ودوشونجه خط حركتي ايله اويوشمايان اوپورتونيزمين ذهنيتني آيدينلاتماقدا آشاغي ايكي نكته يه بورادا اشاره ائتمگي چوخ يئرلي سانيرام:
1-بوگون آذربايجاندا وايران توركلري آراسيندا گئدن وآيري- آيري خلقلرين سسينه سس وئرن حركت هئچ وجهله تانيماديغي واونا گؤره ده طبيعي اولاراق اينانماديغي كيمسه يه ياهانسي قوروما باغلانماياجاق. بونو من اوحركتين بيرتمثيلچيسي كيمي چوخ عيان بيان دئييرم.
2-بوگونكواويانيش فدراليسمه دايانان ملي- دموكراتيك حركتين اون- اون ايكي ايل اول تملي قويولاندا حركتده تك رهبرليك ياتك ليدرليق كيمي يوللارلا يوخ. بلكه دسته جمعي رهبرليك بوتون شرايطده اونون گئده جه يي يولو ايشيقلانديراجاق. بونا گؤره ده خام خيالليلار اللريني اوركلرينه محكم قويمالي واؤزلرينه باشقا تدبير آراماليديلار. هله ليك بوقدر يئته ر…
آمما، سيزمندن گؤركملي رسام وعالم علي مينائي نين تورپاغا تاپشيريلما سيندا ياراديلان بومباحثه لري اورتايا آتماقدا همين قانونا اويغونسوزلوقلارين واوندان ممكن اولورسا سياسي بهره آلماغين ايزي گؤرونور. بونونلا بئله، من بومسئله ده ن خبردار اولونجا ايكي صلاحيتلي شخصله تلفون باغليليغي ياراتديم. اونلارين بيري اوستاد مينائي نين قهرمان قيزي آفاق خانيم و اوبرسي اوستادين ايراندا قزوين شهرينده ياشايان قارداشي اسرافيل ايدي.
بو ياخين اقربالردن هئچ بيري رحمتليك مينائي دن هئچ جوركتبي وياشفاهي وصيتنامه آرادا اولدوغونو تائيد ائتمه ديلر. اوستاد علي مينائييه بونلاردان سونرا ان ياخين آدام من ايديم. منده اولان آرشيوده او بوتون آرزيلاريني ديله گتيرديگي حالدا وصيت نامه دن وياجنازه سي نين تبريز ده دفن ائديلمه سيندن صحبت آچماميشدير.
آفاق خانيم منه گيلئيلندي كي بو مسئله ني اورتايا آتماقلا او عائله يه تكليفسيزليكياراديبلار. خصوصيله وطنداشلاردان بيرسي آفاي مالك آديندا، رحمتليك مينائي ايله قونوشاندا گويا اؤزونو تبريزده تورپاغا تاپشيريلديغيندان صحبت آپاريب.
لاكين مرحومون قارداشي مسئله يه بيرداها آچيق گؤزلولوك ومنطقله ياناشدي ودئدي: رحمتليك داداشين (منظورو علي مينائي ايدي) منده بومسئله يه عايد هئچ بيركتبي ياقول- قراري يوخدو. اگربئله بير وصيت نامه وارسا. من اونون مفاديني هرقيمته اولور اولسون ائويمي ساتسام دا حياتا كئچيرمه لييه م. بو منه بيرتكليف شرعي وعائله وي حساب اولونور. لاكين ، دئديگيم كيمي، وصيت نامه نين اولماماسي قاييدير بوراكي، او وصيت ياآرزونو داداشين ديليندن ائشيدن آدام عرفي واخلاقي جهتدن لازمديرجنازه ني تحويل آلسين، اونو ائل جاري، هر جوركي صلاحدير اونو تبريززه قدريوللانديرسين، تورپاغاتاپشيرما مراسيمينده شركت ائتسين، سونرا جنازه نين دفن ائديلديگي قبرستانين و اورادا داداشين قبرينين ساييسيني قبرستانين تصديقينه يئتيرسين واوندان بير كپي منه، بيركوپي آفاقا وبيركوپيي ده سيزين حضوروزاگتيرسين. بوصورتده بيز اونون بوعرفي، اخلاقي وديني وظيفه سينه عارف اولدوغونا اينانير واوندان ممنون قالاجاغيق. وئرديگيز سورغويا جواب هله ليك بوقدر. ممكن صورتده منيم جوابيمي سورغوز ايله بيرليكده آذربايجان آنلاينا وئرين سيزه چاليشمالاريزدا اوغورلار وموفقيتلر آرزو ائديرم.