ميرموسی هاشمی
mosahashemi@yahoo.com
هر چاغدا اولدوغو کيمی، بو گون ده ايرانين گرگين دوروموندان قورخويا دوشموش و گله جکلرين تهليکلی حيس ائدن پان ايرانيست لر آيری- آيری سياسی و فلسفی گؤروشلرينه باخماياراق بيرليکده يئنی پلان جيزماقداديرلار.
يئنی پلان، ايراندا «آزاد سئچکيلردن» عبارت دير. مقصدلرينه نايل اولماق اؤزرينده چئشيتلی مطبوعات دا، سايتلاردا، تريبونلاردا و… هر طرفلی تبليقات کمپانيالاری قوروب، امضاء توپلاماغا بين الخالق حمايه سينی قازانماق استقامتينده چاليشيرلار. يازيقلار اولسون کی، بعضی آذربايجان آدينی داشييانلاردا بيلر- بيلمز بئله بير ساحه لرده زهرلی تبليقات آپارماغا جهد گؤسترمکده ديرلر. کئچنلرده آقا اصغر عبدی آدلی بيريسی نين يازيسينی اوخودوم. عبدی جنابلاری آذربايجان فعاللارين رفراندوما قاتيلمالارين و ايرانين ساير مخالف قووه لری نين بيرليگی اوغروندا خئيرلی سانيب و اؤز تبليغاتينا داوام وئرميشدير. همچنين تبليقاتلار نتيجه سينده، بو کئچن لرده آمريکا سسی راديوسو مخبری نين سورغوسو جوابيندا، اينگلتره نين باش ناظری تونی بلر بئله دئييب دير: بين الخالق ايجتماعيتی و آوروپا شوراسی ايراندا اصلاحات و دمکراتيانين برپاسين آلقيشلايير. البته کی، باتی دونياسی نين، ايران اوپوزوسيونوندان حمايه ائتمه سی تصادفی اولای دگيل.تاسفله بوگونه ده ک سوپر اؤلکه لرين امکداشليغی نتيجه سينده آذربايجاندا ميللی حرکت لر دايانديريلميشدير.
سيناقدان اوزو قارا چيخان پان ايرانيست لر، کئچميشده کی کيمی بو گون ده آغيزلاريندا بوش- بوش قوللانان دموکراتيا آديله چاليشيرلار «آزاد سئچگيلر» عنوانی ايله ايرانين سياسی جغرافياسيندا ياشايان غير فارس ميللتلرين بير داها آلداديجی شعارلارلا چاش- باش سالييب و اؤز چرکين نييت لرينه نايل اولسونلار.
ايران سنتراليزمی بير عصره ياخين دير کی، پان ايرانيزمين ان گوجلو تفکور مرکزينه چئويريلميش و بوتون غير فارس ميللت لر، او جمله ده ن آذربايجان تورکلری بو دهشتلی سيستيمين آمانسيز قايدا و قانونلاری اساسيندا باسقی و تضييقلرينه معروض قالاراق، آسيميله سياستينده يوخا چيخماقداديرلار. بو فاشيستی و ضد انسانی سيستيم هانسی آديله اولور اولسون، داوام ائتمه سینی انسان حقوقلارينا محض ميللی حقوقلارا ضد و بيگانه سانيريق.
بو تفکورون سون تمثيلچی لری اصلاحاتچيلار اولدو. « ايران برای همه » شعاری ايله محافظه کار قووه لره غلبه چالاراق اقتدارين زيروه سينده يئرلشديلر. آقای خاتمی ان چوخ سسی آذربايجانليلاردان توپلادی. آمما نتيجه نه الدو ؟! پراکتيک حالينا گلديکده يئنه فارسين ديلی، کولتورو و مدنيتی اولدوغو کيمی گوجلندی و باشقا ميللتلرين ميللی وارليقلاری کولگه يه بوراخيلدی، آذربايجانليلارين مدنی، ايجتماعی، ايقتصادی و سياسی حقوقلاری يئنه تاپدالاندی و بير داها آجی تجربه لرين شاهدی اولدوق.
شوونيزم اوجاقيندان معجزه گؤزله مک ساده لوحلوقدان باشقا بير شئی دئمک اولماز. ائله بونا گؤره ده سئچيم، رفراندام، آنا ياسا دئييشمک، حکومت دئييشمک و… بيز آذربايجانليلارا بو گونه قدر يئتر. بئله تهليکلی استراتژی اوغروندا پتانسيال و واخت صرف ائتمک عاغيلدان اوزاق دير. مرحوم ميللی شاعريميز سهند دئميشکن: « اؤزگه چيراغينا ياغ اولماق بسدير ، دوغما ائللريميز قارانليقدادير»
البته کی بيز ايراندا گئدن ديکتاتورلوغو قيناراق، بو اؤلکه ده و دونيانين هر يئرينده دموکراتيا طرفدارييق، لاکين آماجيميز بوگون گونئی آذربايجان دير. آذربايجانليلار بو تاريخی فرصتدن فايدالاناراق، معنوی و مادی گوجلرين توپلاييب و اؤنجه اؤزلرين قارانليق ايچيندن و ظلمت قوينوندان قورتارماق مجبوريتينده ديرلر. ايران اسلام جمهوريتی و اونون اوپوزوسيونو آراسيندا اقتدار ساواشينا قاتيلماق ميللی حرکتيميزی تضعيف ائتمک دئمک دير و بوناگؤره هر آديله اولور- اولسون بو اويونلارا مطلق و مطلق قاتيلمامالييق.
سؤزومو بئله يکونلاشديرماغا قناعت ائديرم: بو گون آغ و قارا کسکين شکيلده آيدين اولماليدير. بو ساحه ده آيدينلاريميزين، خالقيميزا خصوصی ايله گنج نسيله آيدينليق وئرمک لری ضروری خاراکتر داشايير.
کئچنلرده، وارليغين سسی درگی سينده ،« بؤيوک آرزويا گئدن يول » آدلی يازی دا جدی مسئله لره توخونسام دا، بير داها خاطيرلامالييام کی، آذربايجان ميللی حرکتی اؤز ميللی پتانسيالينا سؤيکه نه ره ک، مستقيل اولماليدير، بو حرکتين تهليکه لرده ن قورونوب و انکشاف ائتمه سی بوتون آذربايجان تورکلری نين ميللی بورجودور. بير سؤزله توکنمز گوج و پولاد اراده ايله اؤز يولوموزو داوام ائتمه لييک!! سون
***
