حؤرمتلي ميرموسي هاشمي جنابلاري و «وارليغين سسي» درگي سنين امکداشلاري
سيزه سالاملار وسايغيلار. «وارليغين سسي» درگي سينين 5- نجي ساييندان سونرا، اوزاقدا اولدوغوم وواختيمين چاتيشماليغي اوزرينده درگي نين مندرجه ورداکتيندا گرکلي نظارتيم اولماديغيندان درگيده«باش يازار» عنواني نين قئيد اولماسي ايله راضيلاشانميرام. ايسترديم لطفا بو عنواني درگيدن مطلق سيله سينيز
البتده بو«باش يازار» ليقدان چکينمک، هئچده درگي ايله امکداشليقدان چکينمک آنلاميندا اولماياجاق. يالنيز، درگييه گؤندرديگيم يازي- پوزولارين اوستونده آدييم اولدوقلاري نين مسئوليتيني داشيياجاغام. هامينيزا ايشلريزده باشاريلار آرزوسيله.
5/ دي/1382 م.ع. فرزانه
گورکملي اوستاد محمد علي فرزانه دن تشکور!
الينيزده اولان «وارليغين سسي» درگيسي، ايللک يايين اولاراق بيرينجي سايي 1999-نجي ايلين مارت آييندا اون بئش صحيفه ده آذربايجان ايسوچ دوستلوق جمعيتي وارليق آدينا مالموشهرينده ميرموسي هاشمي ويعقوب شامخي نين تشبوثو وامکداشليغي ايله آذربايجان تورکجه سينده گون اوزو گؤردو.
بو ايشين چتين وآغير مسئوليتينه گؤره، ايکينجي ساييندان بري اوستاد م.ع.فرزانه يه اؤز توتاراق يارديم تمناسيندا اولدوق. دوکتور فرزانه او چاغلار آغير اورک خسته ليگينه باخماياراق آچيق اورک وصميميت ايله سسيميزه، سس وئردي! باش يازار عنوانيندا درگي نين رداکتيا وسايره تدبيرلرين اولدوقجا بو چتين وظيفه ني بوينونا آلدي. ايکينجي ساييندان بري اوستادين تکليفي ايله درگيميزه «وارليغين سسي» آدي سئچديک. واوچونجو سايدان داها دولغون و اورگانيزه فورماسينا چئويريلمه سينه گؤره ديرلي وطنداشلاريم وقلم صاحبلري پروفئسور جميل حسنلي، دوکتور نعمت رحمتي، اسماعيل اولکر، گلناره خانيم ممداووا امکداشليق اوچون درگيميزين يازيچيلار هئيتينه دعوت اولوندولار. بو دعوتيميزه آدلاري چکيلن وطنداشلاريميز طرفيندن صميميتله قارشيلاندي.
گئديکجه «وارليغين سسي» اؤز کيچيک ولاکين گور سسي ايله آذربايجان نشرياتي سيرالاريندا اؤزونه يئر آچدي. و دؤردونجو ساييندان بري ايلده بير دفعه نشر اولان درگي، فصلي بير درگييه يعني اوج آيدان بير دفعه نشر اولماغا چئويريلدي. وبو باشاري بوتون يازيچيلار هئيتي ودرگيميزه يازي گؤندرن وطنداشلاريميزن حسن ورغبتيندن آسيلي اولدو. خصوصيله بو پروسسلرده اوستاد فرزانه نين ان آرتيق رولو اولموشدور.
6/12/2003تاريخينده اوستاد فرزانه ايله تلفوندا دانيشارکن، اوستاد بئله دئديلر: «اوزاق شهرده اولدوغوم بيرطرفدن وساير ايشلرين حجمي نين چوخلوقو باشقا طرفدن سبب اولموش بوسون چاغلار«وارليغين سسي» ايله اوزاقلاشام. وبوناگؤره رداکتيا ونظارت ايشلرينه امکانيم اولمور. وآديمين اوردا اولماسي داها دوزگون نظريمه گلمير. ياخشي ديرکي بو وظيفه دن اوزاقلاشام»
اوستاددان بوگونه ده ک درگيميزده صرف ائتديگي امکلره گؤره وائله جه ده درگيميزين بو امکلر نتيجه سينده يولا دوشمه سينه گؤره تشکور ائديريک. آيدين ديرکي، اوستادين آدي هرچاغدا درگيميزين تاريخي وآديله داشيناجاقدير. آمما فرصت دن فايدالانييب، اؤزوموزه بوج ساناراق، ايستديک بيرداها کئچميشه قاييديب اوستاد دوکتور محمد علي فرزانه يه بو نشريه نين تملين قويماقدا وگوجلنمه سينده آرتيق رولو اولدوغو اوچون درين مينتدارليغيميزي بيلديرييب واونا جان ساغليغي ويازيب ياراديجيليغيندا بؤيوک باشاريلار ديله ييريک.
درين حؤرمتله «وارليغين سي» نين يازيچيلار هئيت
