باهار فصلی داغلار لاله آچاندا
گول،سنبول آختارسان يكاناتدادير
يال، ياماجلار آل ياشيلا باتاندا
سوسن،گول آختارسان يكاناتدادير
احسن اوردان چيخان قهرمانلارا
آزادليق بايراقين اوجالدانلارا
تاريخه افتخار يارادانلارا
اصيل ائل آختارسان يكاناتدادير
قاچاق كرم گئچدی بوردان بير زامان
باش اگدی بو يئرده دئدی الامان
ايگيت لر يوردو دير بو يئر بی گمان
مرد اوغول آختارسان يكاناتدا دير
اون سككيزكندی وار دوشوب يان يانا
كهريز يكان شمع دير اونلار پروانا
اوردا اوغوزلاردان واردير نشانا
شيرين ديل آختارسان يكاناتدا دير
داغلاری داشلاری آهو بره سی
كهليك لر اؤتوشور دالدا فره سی
«قيزوولو»،گؤی تپه،«بهشت دره سی»
«چنلی بئل» آختارسان يكاناتدادير
سحر- سحر كهريز اوسته گؤزللر
شينليك ساليب دانيشارلار گولرلر
آل ياناقلار، آغ بيله كلر، گول اللر
اينجه بئل آختارسان يكاناتدادير
(هدايتم) سالديم آدين دستانا
قوی قالسين تاريخده مندن نشانا
شهره تين داغيتديم ايندی هر يانا
اهل دل آختارسان يكاناتدادير.
ال گؤتورمه بينوالردن
کؤنول يئرسيز وفا اومما، جهاندا دلربالردن
نه دوستلاردان! صفا گؤردوک، نه قووم و اقربالردن
اگر حاق سؤز دئسن ای دل، تعجب قيلما داش ياغسا
بو يولدا گر قدم وورسان، امين اولما بلالردن
رقيبيم گرچه مين تؤهمت، منه وورموشسا قوی وورسون
سئچر عاغيل اولان کس لر، سزانی نا سزالردن
اؤ شهرت دوشگونون گؤرسن صبا سن بير سوروش اوندان
نه بهره بولموش اول غافيل، بو يئرسيز افترالردن
دئيه ر لر هر نه بار آرتار، آغاجلاردا وقار آرتار
يئتيشمز کيمسه بيريانه، بو کاذب ادعالردن
وطن سئوداسی باشيمدا، ائلين خولياسی قلبيمده
نه واردير اؤزگه بير ياريم ، نه کيمسم آشينالردن
نه لر گؤردوم، نه لر چکديم، سئويملی خلقين اوغروندا
وفا ائتديم، جفا گؤردوم، بو يولدا بيوفا لردن
گئچيب عؤمروم منيم آنجاق، قلم – کاغذله دونيادا
و لاکين بی ريا يازديم، نه يازديم بی ريالردن
(هدايت) خسته دير ياريم، ترحم قيل، قيزيرقانما
حمايت قيل سن آنجاق ال، گؤتورمه بينوالردن
ميرهدايت حصاری
اولماز
کؤنلوم قوشو دارتينمادا دير، دار قفسينده
بير عؤمرودور حسرت چکير اوچماق هوسينده
آرزيم، ديله گيم تکجه بير آزاد ياشاماقدير
بير داردا قالان قوش نه ديلر سون نفسينده
سينميش قاناديم اوچماغا ايمکان داها يوخدور
باغريم يارادير درديمه درمان داها يوخدور
آنجاق بيليرم کی بئله ده قالماياجاقدير
دونيا آييليب ظاليما دؤوران داها يوخدور
هئچ يئر آداما اؤز يئری تک سازگار اولماز
جان قويماسا اينسان وطنی پايدار اولماز
آزاد ياشاماق موفته، موسللم اله گلمز
هر منفعتين خرجی وار، اونسوز بازار اولماز
السيز يا آياقسيز ياشييا بيلسه ده اينسان
ديلسيز بو جهاندا ياشاماقليق دئييل آسان
هر يوخلوغا تاب ائتمک «هدايت» اولار آمما
ديلسيز يقين ائت، دونيادا چوخ قالميياجاقسان
تهران 1350 مير هدايت حصاری
اولسون
جمالين شمعينی ياندير، جهان قوی غرق نور اولسون
اوجالت اول قامت سروين، قيامت قوی ظهور اولسون
گونش قوی صورتين گؤرسون، نهان اولسون خجالتدن
فزون ائت، عشوه، نازين تا، متاعين جنسی جور اولسون
شکايت ائتمه ای دل گر جفادن ال گؤتورمز يار
هر اول کيم عشقه اوز قويسا، گرکدير کيم صبور اولسون
وفالی دلبر اوغروندا روادير جان فدا ائتسن
نه فايدا بی وفا ياردان، اگر چه رشک حور اولسون
گتير ساقی مئيی- نابی اولوم فارغ بو دونيادن
گؤروم کيم جسم نازيندان بلا هر يئرده دور اولسون
غنيمت بيل بو ايامی، جوانليق پايدار اولماز
جوانلاردا گرک دير بير نشاط و شر و شور اولسون
گئچن عؤمرون، گئری دؤنمز، آخيب گئتميش بولاقلار تک
گرک هر لحظه سی عؤمرون، سنه فخرو غرور اولسون
من اؤلسم يانديرين جسميم، وئرين خاکستريم باده
روا بيلمين تنيم آخير نصيب مار و مور اولسون
منی آز قورخود ای زاهد، عذاب نار دوزخدن
بو دونيام قوی کی خوش گئچسين، او دونيام هر نولور اولسون
خرابات ايچره گر گئتسن (هدايت) دن ده بير ياد ائت
خوش اول مجلسده کيم اوندا اولان اهل سرور اولسون.
ميرهدايت حصاری