وارليغين سسي:گوركملي بيلگين وخلق خادمي اوستاد محمدعلي فرزانه ايله بير مصاحبه فرصتي قازانا بيلميشيك!
اوستاد فرزانه آذربايجان ديلي، گرامري و فلكلوري زمينه سينده يئنيلمز آراشديريجي ونظريه چي اولدوغو حالدا، گونئي آذربايجانين مساله لري وگوندليك اجتماعي- فرهنگي دوروموندا اللي ، آتميش ايل عرضينده صاحب نظر سيمالاردان بيريدير. بيز قازانديغيميز فرصتدن فايدالانماقلا اوستادا بوگون گونده ليك مساله لر سيراسيندا اولان آذربايجان دمكرات فرقه سي نين يئني دن وبوگونكو شرايطه اويغون فعاليته باشلاماسي باره ده ديالوق آچاق:
وارليغين سسي:اوستاد فرزانه، سيزه سلاملار و سايغلارلا، سيز قطعا بو سون واختلاردا باكيدا نشراولان 21 آذر درگيسيني گؤرمو سينيز، بو درگي قوجامان مطبوعاتچي اسماعيل شمس جنابلاري نين باش يازارليغي آلتيندا چيخير. درگي احتياطلا يئني دن فعاليته باشلاياجاق سياسي فرقه- نين جانلانماسيينا ساري سويروشور.لطفا بو خصوصدا نظرينيزي آچيق بيان ائدينيز؟
اوستادفرزانه: من اسماعيل شمس ايله 1322-1325 ايللريندن تانيشام، او اولدوقجا شريف و بيلگيلي بير انساندير، اؤ 1325 ده بيرچوخلاري ايله بيرليكده اوتايا گئچدي، لاكين تبليغاتچليق ايشينده اوتايا قاچانلارين بير چوخوندان اوستون اولدوغو حالدا ، اؤ اوز يوردداشلارينا پاپيش تيكمكده غلام يحيانين خبرچين لرينه قاريشمادي، بير معلم و مدرس كيمي ياشادي، اونيورسيته ده وآكادمي ده حؤرمت قازاندي و خلاصه بو اللي نئچه ايلي چتينليك آمما باش اوجاليقلا گئچيردي، لاكين شمس چوخ قوجالميشدير واوندا تشكيلاتي ايش آپارماغا طاقت يوخدو،شمس دن باشقا بيرنئچه اونونلا ياشيد كيمسه لرده وار،لاكين اونلاردا شمس كيمي قوجاليب وعصاسي اليندن دوشنلرديرلر، باشقالارينا گلينجه، اولابيلسين اونلارين آراسينداسئچگين عاليم و ائله اوبايا قايغي بسله ينلر فرقه نين ديرچلمه- سينده مسئوليت داشييا بيلسينلر، لاكين بو دعا اجابت اولماقدان اوول،بونلاردان سوروشولماليدير، اساسا سيز 1325ده نه اوچون خالقي و اولكه ني بوراخيب قاچدينيز؟ اگر بو سورغواونلاردان سوروشولماسا و اگر اونلار بوضعف لري اوچون منطقي دليللر تاپابيلمه سه لر خالق اونلارا اعتماد بسله مز. بوگونكو آذربايجان و اونون انتباه پروسسي، 6. ايل بوندان اوولكي آذربايجانلا كؤكدن فرقله نير.اوندا سيد جعفر پيشه وري اون بئش نفر تاپيپ ايشين بير اوجونو اونلارا تاپشيرماقدا درين بوشلوق حس ائدير و حتي بونو نوبتي اجلاسلاردا تكرار- تكراردئمكدن چكينمزدي، آمما ايندي وضعيت اؤزگه دورومدادير (( بوچرخ فلك ترسينه دؤوران ائدير ايندي )) ايندي بير نسل، بو ديرچه ليشه و اؤز ملي وارليغينا اينام بسله ين بير نسل، باشي اوجاليغي و ايناملا تام لياقت، آييقليق و اينانجلا مساله ني يكونلاشديرير .
هئچ واخت ياديمدان چيخماز، بير گؤن حربي عالي مكتب طلبه لري باش فرمانده ليكدنن ايسته ييرلر اونلارين نظري درسلرينه آذربايجان ديل و ادبياتي، تاريخي، مشروطه انقلابي و آذربايجانين بو انقلابدا نقشي،ايراندا يئني بيليكلرين و دموكرات دوشونجه- لرين تاريخي گليشمه سي و بوكيمي نظري درسلره يئر آچيلسين،فرمانده ليك اونلارا بئله جاواب وئرير،سيز دئديگينيز بيليكلري امكانسيزليق اوجوندان منيمسه يه بيلمه ميشيك،آمما،سيز گله- جكده فرقه ميزين آزاد شرايط ده فعاليتي سايه سينده اونلاري اؤيره نيب و اونو سيزدن سونرا گلن نسليميزه اؤيره ده جكسينيز .
و بو گون تام ايناملا دئمك اولاركي بو نسل گوجلو منطق،آزاد دوشونجه،تاريخي و مدني كيمليگينه اينانديغي حالدا،عرصه يه گلميش وملي- مدني وارليغي نين كئشيگينده دايانميشدير.
وارليغين سسي:درين منتدارليقلا. ايندي اگر ممكونسه بو گون آذربايجاندا يارانان ملي- فرهنگي اويانيش شرايطينده آذربايجان دمكرات فرقه سي نين بو يئني شرايط ده فعاليته باشلاماسي هارادان باشلاياسي بو يئني شرايط ده نه كيمي استراتژي و تاكتيكلره سؤ يكنمه سي باره ده ييغيجام دا اولسا بيزه گؤستريش وئرين؟
اوستادفرزانه:ياخشي بيليرسينيز آذربايجان دموكرات فرقه سي دؤنن- بوگون صحبتي دگيل، آذربايجان دموكرات فرقه سي،خصوصا بو سون 6. ايلده،يعني بو فرقه نين اولكه نين سياسي – مدني حياتيندا،قدرتي الده ائدندن سونرا،بوتون مرتجعلر و امپرياليستلر طرفيندن تهمت و افترالارا معروض قالدي و اونو چكينمه دن و اوتانجيلاريندان قيزارمادان و اساسا اوتانمادان، فرقه نين بير پارا تلاشلارينا بارماق قويماقلا،اونو نه بيليم آذربايجاني ايراندان آييرماق،آذربايجاندا مسكو سوسياليزمي و كمونيزمي عنوان ائله مك كيمي اتهاملار ياغديرماغا و اؤنون رفورميست چهره سيني قارالاماغا جان آتديلار.وقتيله آذربايجاني ايكينجي دونيا محاربه سيندن سونرا ملي- دمكراتيك صلح كنفرانسيندا ان انقلابي اؤلكه آدلانديرديقلاري حالدا، 1325- اينجي ايلين آذر آييندا آذر بايجانين قان درياسينا چئوريلمه سينده و بير خلقين داها دوغرو دونيا باريشينين محرابيندا كسيلن بيرنجي قربانيسي اولاندا هئچ كيم اوف دا دئمه دي ! . . لاكين تاريخ نه قدر عادل و دادرس دير .آذربايجاني امپرياليستلرين توطئه سي ،دربارين وقوام السلطنه- نين مباشرتي ، يئرلي فئوداللارين سلاحا ساريلميش نؤكرلري و ساتغين غارتچي لومپنلرين اليله سئوال- سورغوسوز
گوله ننلرين قانلاري هدر گئتمدي و ناحق قانلار يئرده قالمادي . دموكرات فرقه سسي دونن بوگون صحبتي دگيل . بوفرقه گونئي آذربايجاندا مشروطه انقلابي عرفه سينده مركز غيبي وآذربايجان ايالتي انجمني نظارتيله قورولور . اونون تشكيل و انقلابي – دمكراتيك فعاليت گؤسترمه سينده علي مسيو حيدرخان عمواوغلو و دواچي كيمي نظريه چيلر و ستارخان ، باقرخان ، حسين باغبان و اونلارلا خلقين ايچيندن يوكسله ن فدائي باشچيلاري و مشروطه نين يئنيلمز سردارلاري دورورلار .
وارليغين سسي:اوستاد فرزانه، سيزآذربايجان دموكرات فرقه سي نين بو گونكو يئني تاريخي شرايط ده ايشه قاتيلماسيندا بيرچوخ واخت اونون بو مرحله ده استراتژي و تاكتيكلرينده يئني و گئچميش ايله فرقله نن جهتلره وبو جهتلرين هانسي يا هانسيلار اولدوغونا مختصرده اولسا ،اشاره ائده سينيز :
اوستادفرزانه:بو يئني شرايط و جهت لره مسلما گؤز يومولماياجاق ، عياني نه دنلر واردير ، اونلاردان ان اصلي سي دونيادا ملي ومثبت ناسيوناليستي حركتلرين انترناسيوناليستي حركتلري اوسته له مه سي و اونو كولگه لرده بوراخماسيدير . بيز بو ملي اويانيشي بيرچوخ اولكه لرده و اونونلا بيرليكده ايراندا دا گؤروروك .
آذربايجان دموكرات فرقه سي اگر 1324-1325 ايللرينده ملي- دموكراتيك بير حركته قاتيلديسادا، هله ايرانين مدني – اجتماعي حقوقو وملي كيمليگي تحقير ائديلن خلقلردن، آذربايجان و كرد خلقي استثنا، باشقالاريندا هله ليك لايقي يئرآچماميشدي بونا گؤره ده، حركت آذربايجاندا و كردستاندا بئله بير دورومدان آسيلي اولاراق، بو ايكي خالقا ديوان توتماغي وبو اولكه لري آزادليق ايسته ينلرين قانيله سوواريلماسينا نتيجه لندي. لاكين ايندي ملي – دموكراتيك حركات بيرچوخ توپلوملاردا و اوجمله دن ايرانين چوخ خلقلي جامعه سينده بيرگؤنده ليك پروبلئمه چئوريلميشدير. باكيدا فخري قبرستانيندا پيشه وري نين بو قيزيل سؤزلري كيشي نين هئيكلي پاياسيندا حك اولموشدور(( بيزيم آذربايجاندا باشلاديغيميز نهضت چوخ چكمه دن ايرانين بوتون تاپدالانميش و مظلوم خلقلري آراسيندا سسلنه جكدير )) بو سؤزلرين عمله چئوريلمه سي ياريم قرن زمان آپاردي ، لاكين ايندي بوشعار اؤز دوزلوك و عيانيليگيني گؤستردي .
فرقه نين بوگونكو جدي تاكتيكلريندن بيري بلكه- ده بيرنجيسي ،بو عمومي اويانيشي دستكله مك و او اساسدا باشقا ايراندا ياشايان آزليقلارلا اورتاق يوللار آراماقا و بوملي- دموكراتيك حركاتي بو آزليقلارين ان حياتي ايستكلرينه چئورمكدير.خلقلر اوز ملي وارليغلاريني ، اؤز رسم و رسوملاريني ، اؤز دوغما آنا ديللريني ، خلقي موسيقي لريني سئوير و اونون يوكسه ليشيني و رنگارنگ ليگيني طلب ائدير.خلقلر وئرديكلري وئرگيلرين نئجه و هارا خرجلنديگي نين حساب كتابيني بيلمك ايسته ير و جامعه ده دموكراتيك انسان حقلريني عمله كئچيرمك قلم آزادليغي، سؤز آزادليغي ، دوشونجه مبادله سي و باشقا حقلره پلاتفورم قورماق ايسته يير .اوملتي شعورلانماقدا بيرگه پروگراملاردا اؤنده اولماقي وجان يانديرماقي طلب ائدير.هربير انسانا دوردوغو يئرده حق قازانماق ،دوشونجه لرينه و اينانجلارينا حؤرمت بسله مك ،حكومت اورگانلاريي نين سئچيلمه سينه جدي ياناشماق ، جامعه نين بيليك و معاصر دونيا ايله آياقلاشماسسيني آرتيرماق و بوكيمي تاكتيكلر چوخ دقتله فرقه طرفيندن منيمسه نيلمه ليدير .
بومساله لري بوندان داها چوخ ساناماق اولار لاكين فرصتين آزليغيندان هله ليك يئترليدير آزادليق تاريخي- ملي حاق- حقوقلاري اؤزآردينجا گتيرير . . . يالنيز بونودا قيد ائتمك لازيمديركي بو گونكو قورتولوش چارپيشماسيندا دوغما ديل ، ملي- دموكراتيك فرهنگ و بيرسؤزايله بير كوتلوي سلاح كيمي بيرينجي يئري توتور وسياسي و اجتماعي اويانيش بو فرهنگي انقلابين گؤزگوسو اولور.يومروق و اودلو سلاحلاري خالق بير يئدكي سلاح اولاراق ،داها باشقا چاره قالماديغي تقديرده ايشله ديلير . . .
دموكرات فرقه سي ،مشروطه حركاتي شكسته اوغراديغي و بوشكست اعتداليون اجتماعيون و اعتداليون انقلابيون بزك- دوزكلري ايله اؤرتولدويو حالدا ،بيرينجي دونيا محاربه سي نين قورتارماسيله ملي- دمكراتيك سويه ده ،فرقه آزاديستان عنواني آلتيندا،روحاني شيخ محمدخياباني نين رهبرليگي ايله آذربايجاندا صحنه يه چيخير. حركاتيني بيرسيرا مدني- فرهنگي رفوملارلاباشلايان شيخ ، تهران ومركزي حكومتين فساد و ارتجانين ضد دمكراتيك و ضد خلقي حركتلريندن بئزيكه رك ،اؤز ناطق ليك و بيان قدرتيندن فايدالانماغلا خلقي آييتماغا و مدني – علمي دوشونجه يه چاغيرير .شيخين ديالوگ قدرتي تهران حكومتيني نگران ائديب قورخويا سالير . توطئه لر باشلايير و شيخين اعتماد بسله ديگي مخبرالسلطنه آذربايجانا والي سئچيلير و تولكو آلدانيشلارلا شيخي استبداد گوله سينه هدف قويدورور .
آذربايجاندا دموكرات فرقه سي نين سونراكي علني و بويوك مقياسلي فعاليتي ،ايكينجي دونيا محاربه- سي نين قورتارديغي شرايط ده گوركملي سوسيال دموكرات سيدجعفر پيشه وري نين رهبرليگي ايله جانلانير .فرقه اساس مراجعت نامه سينده بو حركاتين شهيد خياباني نين باشلاديغي مبارزه نين دوامچي سي اولدوغونو قيد ائدير .دموكرات فرقه- سينين اساسنامه ومرامنامه سينده آذربايجانين بير سيرا چوخ اهميتلي ملي – مدني حاقلاري نين آياق آلتينا سالينماسيندان ،آذربايجان خلقي نين آناديلي، ملي كيمليگي و وارليغي تحقير ائديلمه سيندن تهران فاسد دستگاهي نين ال اويونجاغينا چئويريلمه سيندن بحث آپاريلميش و بونلارين آرادان قالديرماسينا قطعي رفورملارا يوللار دوشونولموشدور .
وارليغين سسي:اوستاد فرزانه سيزي چوخ يوردوق ،لاكين مساله نين اهميتي بوگونكو شرايط ده گونئي آذربايجان و ايرانين آيري بولگه لرينده و هابئله خارج اولكه لرده ياشايان آذربايجانليلارين سيزه توكنمز و درين احترام واعتمادلاري وار و نئجه دئيرلر باشيزا آند ايچيرلر و آيدين حقيقتديركي فرقه نين يئني دن جانلانماسي و حاضير حالدا ،يئني ملي- دمكراتيك گؤستريلره يئيه لنمكده سيزين بيليك و تجربه لرينيزدن فايدالانماق وجاندان مايا قويماق آرزي سينداييق و بو سرحدلرين ايچينده و ديشينده اولان گؤجلرين ايسته ييدير!
اوستادفرزانه:البته ، بوتون بونلارلا بيرليكده و شرايطده فرقه نين آديني ساخلاماق ، يا اونو تاريخه تاپشيرماق (سؤز يوخ كي اونو آراشدريب ،قوت و ضعف جهتلري منيمسه ديكدن سونرا ) و بوگون انتباه و آييقليق شرايطينده يارانان حركته يئني بير آد تاپماق ، بونلار هاميسي بو گونكو نسيلين حاققي و وظيفه سيدير.من اينانيرام ايندكي نسيل ،بيرچوخ مسئله- لره يول آراديغي و جهت ياراتديغي كيمي ،بئله بير عنواني تاپماغي وتطبيق ا ئتمگي ده باجاراجاقدير. مغامدا اوخونان غزلدن چوخ ،اونو اوخويان ، اجرا ائدن اساسدير .
سيز ائله بيل اؤنجه دن مطلب آچماق ايسته ييرديز. من آذربايجان دموكرات فرقه سيني و اونون ضعيف جنبه لري بيرطرفده دورسون ،هرآذربايجانلي كيمي خلقيميزين درديني قانار و اودونا يانار بير ارگان كيمي تانيرام و اوندان قيراخدا هله بير آيري تشكيلات قورماغي يئرسيز و فايداسيز تشبث سانيرام .بونونلا بئله، بو ايش اگر اوچ ايل بوندان اؤنجه ،يعني منيم سالم اولدوغوم گونلرده مندن ايسته نيلسئيدي سؤز يوخ كي ،خلقيمدن منتدار دا وارايديم .لاكين ايندي ايكي كره اينفاركدان سونرا و گؤزلريمين ده ضعيف لنمه سيله ،بو ايشه بويون قويماغي آغير گؤرورم .البته بو هئچوقت اؤ دئمك دگيل كي ،فعاليتدن چكينيرم ، يوخ ! آمما ايندي شوكر آللاها او قدر بيلگين ،باجاريقلي ، دموكرات دوشونجه لي و ملي خصيصه لي جوانلاريميز واركي ،من اونلارا ان ياخين مشاور و نئجه دئيه ر دولانباج يوللاري اوسته چراغ اولانلاردانام ، بو گونه قدرده بئله اولموشدور .
وارليغين سسي:اوستا د فرزانه سيزه اوزون عومور ، ساغليق و ساغلامليق آرزيلاييريق !
آمما اجازه وئرين بو جانلي ديالوگو بيتيرمه دن سيزدن (( وارليغين سسي )) آديندان يئنيلمز خالقيميز و افتخارلي يوردوموز آديندان رجا ائدك كي ، سيز خاطره لرينيزي قلمه آلين ! سيزين قدرتلي حافظه نيز ، صراحت ، امانت وصداقتينيزه اينانيريق كي ، بو خاطره لر بيزلره بو گونكو و صاباحكي ملي دمو كراتيك حركاتيميزدا مانيفست وظيفه سي داشيياجاق . سيزين بو محكه وورولموش سؤزوز ، خلقيميزي ايشيق ليغا چيخاريب و اونلاري عصيرلرين جسمي و روحي يورغونلوغوندان قورتارسين !
اوستادفرزانه:بلي ، او نئجه دئيه ر ، قويونون سويو اؤزوندن گرك ، ال ايله سو توكميله قويونون سويو اولماز! خاطره لره گلينجه گؤزوم اوسته ، اونلاري قلمه آلماغا چاليشاجاغام !
سون.