كانادادا ون كوور شهرينده آذربايجان ديلينده ياييلان ((اودلار يوردو)) راديوسو اوستاد م.ع. فرزانه ايله آپارديغي مصاحبه بير ميلبلي- فرهنگي دانيشيقدا بير سيرا مسئله لري عنوان ائتميشديركي، بومسئله لرين سيراسيندا ايسوچده مالموشهرينده نشر اولان ((وارليغين سسي)) فصلنامه سي وبوگونكو شرايطده آذربايجان وآذربايجانليلارين هانسي دورومدا اولدوقلاري باره ده وئريلن سورغولار آچيقلانميشدير. بيز بودانيشيقدا وئريلن جوابلاري آشاغيدا عزيز اوخوجولاريميزين نظرينه چاتديرماغي اولدوقجا يئرلي واويغون سانيريق.((وارليغين سسي))
اودلار يوردو: آقاي فرزانه بيزآلديغيميز مطبوعاتي معلوماتا اساسا سيز بوسون زمانلاردا ايسوچين مالموشهرينده ((وارليغين سسي)) آدلي بير نشريه نين آذربايجان ديلينده ياييلماسينا يارديمچي يا داها دوغروسوباش يازار اولموشونوز. خواهش ائديريك بونشريه وحتي بوندان چوخ اول بلكه30-40 ايللريندن باشلاياراق كؤل آلتيندا كؤزه رن بواودو قوردوغوز واونوهمين استقامتده دوام ائتديرديگينيز باره ده عموميتله ((وارليغين سسي)) حاققيندا بيزيم دينله ييجيلره دانيشاسنيز.
اوستاد فرزانه: منيم ديليميز، فرهنگيميز، ميللي وارليغيميز وكيمليگيميزله آز چوخ تانيش اولوب واونون او ايللرده ياساقلانماسيله اوز-اوزه گلديم واختلاردان باشلاميش، ائله بوگونه قدر تانينماسي وتانيديلماسي باره ده چاليشمالاريم اولوب. سؤز يوخ كي، بوچاليشمالاري هرشئيدن اول خالقيميزين حاق طلبليگي وبوحاق طلبليگين عمله گئچيريلمه سي آرزوسوايله ياناشي اولموشدور.
من ايسوچده قالماق اجباريندا اولونجا خسته اولدوغوما باخماياراق بوحاق طلبليكدن مدافعه ائتمگي اؤزومه يئنه اساس وظيفه سانميشديم كي، بو سيرادا گؤرولن ايشلردن بيري اوچ ايله ياخين يوتوبورو شهرينده دوام ائدن ((سهند راديوسو)) نون وئريلشلري اولموشدور. بو راديوهرشئيدن اول اونون برنامه لري باشلاياندا اعلان ائتديگي كيمي ديليميزي، فرهنگيميزي وميللي وارليغيميزي تانيماق وتانيتديرماق مقصدايله اولموش و بوايشده دئمك اولاركي موفقيتلر الده ائتميشدير.
ايكينجي ميللي- فرهنگي ايش قاباقجادان ايل آشيري (ايلده بيردفعه ياييلان ((وارليغين سسي)) نشريه سيني فصلي (هرايل دؤرد سايي) سويه سينه قالديرماق واورادا امكان دايره سينده آذربايجان ميللي- تاريخي وارليغي باره ده يئني يازيلارا وآراشديرمالارا داها گئنيش يئرآچماق ونشريه ني خالقيميزين طلباتيني سؤيله مگه سفربر ائتمك اولموشدور.
البته، نشريه نين آدي يعني ((وارليغين سسي)) عنوانيندان آنلاشيلديغي كيمي ايراندا بوگون ايگرمي نئچه ايل بؤيوك چتينليكلر وچاتيشمازليقلارلا نشر اولوب وآذربايجانين ميللي- فرهنگي حياتيندا شرفلي يئر قازانان ((وارليق)) درگي سي ايله معنوي باغليليغي اولموشدور. . . .
اودلار يوردو: آقاي فرزانه، من بئله دئيه بيله- رم كي سيزين زحمتلرينيز نتيجه وئرير. بوگون جماعت نه اينكه بئش نفر- اوچ نفر بوميللي- فرهنگي ايشلرله مشغول اولان يوخ، بلكه جماعت دئمك اولاركي هاميسي صحنه ده ديرلر وبورادا سيزين كمين انسانلارين زحمتي نتيجه سيدير. من آرزو ائدرديم بو وضعيتين ساغلام قاباغا گئتمه سي اوچون فيكيرلرينيزي بيزيم دينله ييجي لريميزله اورتايا قوياسنيز.
اوستاد فرزانه: البته اشاره ائتديگينيزبوگونكو دوروم، چوخلاري نين دققتيني اؤزونه چكير وهركس اؤزباخيشي ايله بومسئله يه چيخيش يولو تاپماق اوغروندا دوشونور. البته بوخصوصدا من ده بيرچوخ آذربايجانا علاقه بسله ينلركيمي، ايستكلريميزي، آرزولاريميزي، قانوني طلباتيميزي بيرلشديرمك واونلارا پراكتيك يوللار تاپماق اوچون بيز بيرميللي- دموكراتيك جبهه ياراتماق اجبارينداييق. بوجبهه بيزيم ميللي- تاريخي ايستكلريميز وطلباتيميزا سؤيكه نيب وبونلاري اؤزونده جانلانديرميش بير ميللي- دموكراتيك پلاتفورما ياراتماغا احتياجيميز واردير. بو پلاتفورم بوتون يوردلارينا وخالقلارينا اينام بسله ينلري، اونون بوگونونون وصاباحي نين قايغيسيني چكنلرين ايش بيرليگينه دايانمالي وبيرميللي- دموكراتيك جبهه نين يارانماسينا مادي- معنوي يارديم ائتمه- ليدير. البته، بورادا هركس هر ايده ئولوژي ودونيا باخيشينا مالك اولابيلرسه اولسون، آنجاق اونون آذربايجانين ميللي- تاريخي وارليغينا اينانماسي وبونو اؤزونه مقدس وظيفه سانماسي اصلي مسئله ساييلير.