ای کؤکونو دانان آغا،
ديلينی يارغيدان آغا!
اؤز قيندان چيخان کيمی،
بئينمه دين سن هئچ کيمی.
اجداديندان قالان ديله،
دوداق بوزدون بيله- بيله.
اؤزگه ديلده قيريلداتدين،
دوغما ديلینی آلچاتدين.
وارليغينی اوجوز ساتدين،
ياشلی کؤکون بوتون آتدين.
اؤز خالقيندان قيدالاندين،
قارنين دويجاق اوزاقلاندين.
يادائللردن درسين آلدين،
هر طرفده نفاق سالدين.
اينسانليغی چوماق ائتدين،
دوز يوللاری ايری گئتدين.
ميللت آدين هی پيسلدين،
اؤزگه لره چوخ ايشله دين.
عؤمورون اؤتدو خوليالاردا،
انيش- يوخوشلو يوللاردا
دوه اتی، گئيدی باشين،
سيليندی باشدان ياداشين.
يادلارا سن ائتدين قوللوق،
ثبوت اولدو بو مانقوردلوق.
اينسان اولان وار ايتيرمز،
دوغما ديله دوداق بوزمز.
ندن اؤزه ن اينانميرسان؟
وارليغييان خور باخيرسان؟
وارليقدا وار شن- شهرتين،
خالق ايچينده اؤز حؤرمتين.
دويمادين می قول اولماقدان؟
چاليش تئز چيخ بو باتلاقدان!
شاهلار، شيخلر يئتر بيزه،
ميللتيميز چؤکدو ديزه.
بسديرداها قول اولماغين،
خالقيمی گؤزدن سالماغين.
قوی پارلاسين آذربايجان،
اوغروندا بيز وئره ريک جان.
وارليق ياشار کيمليينده،
آذربايجان تورک ديلينده.
ديل ميللتين ثروتی دير،
توکنمز بير دولتی دير.
وارليقدا وار اوغوز ايزی،
تورک ائللری سئور بيزی.
ائل دردينی يازان زامان،
گؤز ياشلاری وئرمز آمان.
قلم آغلار کاغاز اوسته،
يارا وورار يارام اوسته.
ميرموسايام، اينانيرام،
حاق سؤزومه دايانيرام.
بيرگون گلر آييلارسان،
وارليغينا قاييدارسان.
گل فرصتی وئرمه الدن،
تاريخ يازاق، بيز ازلدن!!!
ميرموسی هاشمی،
مالمو – ايسوچ،
اکتبر2004