۲۰۱۴- جی ايلين، آپريل آيی رحمتلی هم يئرليم شاعير ميرحسينقلی رياحی‌فر اوچون يازديغيم «قارا گون گئدَر!» آدلی شعيردن ايکی بندينی سيز ايله پايلاشماق ايسترديم:
قابارلی اَللَره مَلحم اولايديم،
باغلی دوداقلارا آچار، آ قارداش!
سينان قانادلارا علاج تاپايديم،
دؤزولمز دردلره درمان، آ قارداش!
تبريزده آليشار اوجاغين کؤزو،
قارانليق بوغولار، گؤره ر گؤز-گؤزو،
بونا شاهيد اولار تاريخين اؤزو،
گئده‌ر بو قارا گون، قالماز آ قارداش!
حؤرمتلی خانيملار، بيگلر، عزيز قوناقلار، هر واختينيز خير!
يئر اوزونده بوتون مخلوقاتدان اوستون ساييلان اينسانلارين حاققيندا دانيشماق و يازماق چوخدا آسان دئييل.
اينسانليغا صادق ياناشانلار بو حقيقتی دريندن بيلير. بونا گؤره، منه یئله گليرکی، اينسانلار حاققيندا اولدوغو کيمی قضاوت اولورسا، توپلومون ساغلام اولوب و قورونماسی تضمين ائديلير تصادوفو دئييل کی، آذربايجان سماسی نين ايشيقلی اولدوزلاريندان بيری ساييلان، قوجامان تبريزين مهربان اوغلو ضياء صدرالاشرافی-نين بو گون، هاميميزا دوغما ساييلان استانبول شهرينده شنليک مراسيمی کئچيريلير.وارليغين سسی درگیسينده چاليشان، قلمداشلاريمين طرفيندن هامينيزی اوره کدن سالاملاييرام. اوزاق و ياخين يوللار گليب، بو ادبی و فرهنگی مراسيمده اشتراکينيزا گؤره، مينتداريق!
هاميميز، ضياء معلمين ۷۷- جی ايل دؤنومو و عؤمور بويو ميللی و مدنی چاليشمالاری مناسبتينه گؤره بير آرايا توپلانميشيق. مختليف جغرافيالاردان گلن عزيز قوناقلاريميزين ضياء معلمين احاطه سينه توپلاشمالاريندان و اودلار يوردونون بير پارچاسينی بو آنلارا گتيرن سويداشلاريميزدان، اؤزوموزده غرور دويوروق.
ضياء معلمه گؤستريلن بو قايغی و قيمت بير داها ثبوت ائديرکی، آذربايجان ميللتی، ائل-اوباسينا باغلی اولان عاليم لرينه سايغی ايله ياناشير و بيز بونونلا فخر ائديريک.
صبيرسيزليکله يولونو گؤزلدييميز، هاميميزين سئويمليميز، گؤرکملی عاليم ضياء صدر بوگون بيزيم قوناغيميزدير.
ضياء معلليم! آذربايجان تورکونون ديلی، کولتورو، مدنيتی و بير سؤزله ميللی وارليغی اؤزَرينده فعاليت لرينيز آلقيشا لاييق‌دير. سيز، قديمی‌لر ايچينده نادر عاليملردن سينيز کی، چاغداش فيکيرله، يئنی نسيل ايله آياقلاشيرسينيز.
بو ساحه‌ده، آرتيق معلوماتی عزيز سويداشيميز ميرمحمود يکانی معلليمدن ائشيدمه ييميز داها ماراقلی اولاجاق. آذربايجان ميللتی حق شناس بير ميللت دير. و بوگون بورادا گؤستريلن، تبريک و آلقيشلار دا تصادفی دئييل. سيزه داها، نئچه بئله گؤزل يوبيليی ايللری آرزيلاييريق. ايندی اجازه ايسترديم، ضياء معلمی و اونون چوخ حؤرمتلی حيات يولداشی آلماس خانيمی هاميميزين آلقيشلاری ايله اؤز يئرينه دعوت ائديب و بو گونکو طنطنه لی يوبلئی مراسمينی آچيق اعلان ائديم. «آ» ساغ اولون
وارليغين سسی درگی‌سی‌نين مدير مسئولو، ميرموسا هاشمی
استانبول
۲ سنتیابر ۲۰۲۳
