اشاره
ايكي ايل اول، حؤرمتلي خانيم ص. عدالتي تلفون قونوشماسيندا آلماندا جامعه شناسليق ساحه سينده اؤز دوكتورا تئزيني بوگونكو ايران جامعه سينده ياشايان آزليقلارين اؤز ائتنيك حق حقوقلاريندان محروم اولدوقلاري وآغيرآسيميلاسيون پولتيكي آلتيندا ياشاديقلاري موضوعونا حصر ائتميش، لاكين ايللر بويوايران وآذربايجاندان اوزاقدا اولدوغوندان و بوساحه ده جانلي قايناقلار وفاكتلارا ال تاپا بيلمه ديگيندن بير پارا چتينليكلرله وچاتيشمازليقلارلا اوز- اوزه گلميشدير.
بير آذربايجان سويلو خانيمين غربت اؤلكه ده بوتون اوغورسوزلوقلارا قاتلاشماغينان جامعه شناسليق ساحه سينده دوكتورا درجه سينه چاتماسي واوندان قات- قات اؤنملي رساله سي اوچون بوگونكوايران جامعه سينده خلقلرين دؤزولمز آسيميلاسيون سياستي بويوندوروغو آلتيندا ايكينجي درجه لي همشهريلر كيمي ياشاديغيني رساله سينه سئچديگيني واوندان باجاريقلا مدافعه ائتديگيني عدالتي خانيما تبريك ائدير و اونا علمي- مدني چاليشمالاريندا توفيق آرزوائديريك. آشاغيدا خانيم عدالتي نين بو خصوصدا ييغجام يازيسيني آذربايجان توركجه سينده نشر ائديريك
خانيم ص. عدالتي
دونيانين دؤرد گوشه سينده چئشيتلي اؤلكه لرده ياشايان آزليقلارين حاققيني قوروماق اوچون انسان حاقلاري قوروما كميسيونلاريندا بيرچوخ قرارلار چيخاريلميش وبيرچوخ اعلاميه لريايينلانميشدير. باخماياراق كي، يايينلانان اعلاميه لرين بيرچوخو يالنيز كاغاذ اوستونده قالميش واويغولانماميشدير. يازيلان بوتئزين موضوعو اتنيك آزينليقلار واونلارين توپلومدا اوز- اوزه گلديكلري برابرسيزليكلردير.اؤزه لليكله ايراندا ياشايان آذربايجانليلارين دورومو، اونلارين ايران توپلومونداكي شرايطي و اوز- اوزه گلديكلري چتينليكلر وعدالتسيزليكلر بوچاليشمانين آنا نقطه- لريني تشكيل ائدير.
هدف. آذربايجانليلارين ائتنيك شعورونو بو برابرسيزليگين نفوذوندان نئجه قوروياجاغيني آراشديرماقدير. آذربايجان ائتنيك توپلومون بير عضووكيمي وبونونلا ياناشي يوردومدا بورايج عدالتسيزليكلره معروض قالانلاردان بيري اولاراق آذربايجانليلارين ائتنيك شعورونون اوزه رينده كي منفي تاثيريندن متاثر اولوب، بيرآذربايجانلي سوسيولوق اولاراق بوائتنيك توپلومون ايران سكنه سي آراسيندا ياشايان عدالتسيزليكلره قارشي گؤسترديگي عكس العمل وداورانيشلاري اورتايا چيخارماغي اؤزومه وظيفه سانيرام.
ايران اؤلكه سي چوخ خلقلي بيرتوپلوما صاحبدير. اورادا ياشايان انسانلارين جوربه جور قووم وديللره صاحب اولمالارينا باخماياراق ده گر وئريلن تك ائتنيك توپلوم فارسلار ورسمي تانينان تك ديل فارسجادير. ايران جامعه سي وتاريخي حاققيندا يازيلان بير چوخ ادبياتدا ايراندا((persia پرسيا )) اولاراق بحث ائديلميشدير. تاسف اولسون كي بوتاريخي حياتي قوسانلار يالنيز يابانجي يازارلار دگيل، بيرچوخ يئرلي يازارلاردا ايرانين چوخ خلقليك خصوصيتني گؤز آردي ائديب وبووسيله- ايله بوتوپلومدا ياشايان آيري ائتنيك توپلوملارا سايغيسيزليق گؤسترميشلر.
بو بؤلومده بيز چوخ قيسا اولاراق آذربايجانين تاريخي گليشمه سينه گؤز گزديره جه ييك. آپاريلان قازينتيلار وآركئولوژيك آراشديرمالارا گوره 6000 ايل ميلاددان اؤنجه دن آذربايجان بؤلگه سينده انسان يئرلشمه لري نين ايزلرينه راستلانمشدير. ديگر آراشديرمالارا گؤره نئوليتيك و چالكرليتيك(قديم داش عصري) چاغيندا بئله بو بؤلگه ده انسان ياشاماسينا داير بيلگي لر گؤرونمكده دير. آذربايجان چوخ وئريملي تورپاغا ومساعد هاوايا صاحب اولدوغو ايچين اؤز يئرلي انسانلاريندان علاوه قارا دنيزين قوزئييندن واورتا آسيادان اورايا كوچ ائدن بيرچوخ قبيله طرفيندن ده يئرلشمه بؤلگه سي اولاراق سئچيلميشدير
ايره ليكي زامانلاردا بو بؤلگه بيرچوخ بؤيوك امپراطورلوغون مركزي اولموشدور. اؤزه لليكله ساسانيلر زامانيندا آذربايجان ويا اوزامانكي آديله(( آتروپاتنه )) امپراطورلوغون ان اؤنملي بؤلگه لريندن بيري اولوب،اسلامدان اؤنجه اؤز اؤنميني بيرديني مركزاولاراق قوروموشدو.
آذربايجانليلار هرزمان ديش مجادله لره ومركزي ديكتاتولوغا قارشي اؤز دويارليقلاريني گؤسترميشدير،مثال اوچون قاجار زامانيندا ايران شاهي نين طرفيندن توتون تجارتي نين امتيازي انگليسلره وئريلميشدي، آذربايجانليلار بونو پروتستو ائديب وبوحاقين گري آلينماسيني ساخلاديلار.
1906- نجي ايلده مشروطه حركاتي ايلك دفعه تبريزده باشلانيب، بوشهر ايرانداكي بوتون دموكراتيك حركتلري نين ليدرليگيني اله آلميشدير. 1918-نجي ايلده ايلك دفعه بير دموكراتيك فرقه شيخ محمد خياباني نين وسيله سيله تبريزده قورولدو، فقط آذربايجانليلارين حريت ودموكراسي اوغروندا آپارديقلاري مجادله لر اؤنجه قاجار وسونراپهلوي رژيمي طرفيندن آرادان آپاريلدي.
اؤزلليكله رضاشاه مشروطه قانونونو وپارلماني گؤز آردي ائديب يئني قانونلار اورتايا چيخاردي. فارسي، ايرانين رسمي ديلي اعلان اولوب، اؤلكه ده كي آيري ائتنيك توپلوملارين ديللري اؤنمسيز ودگرسيز اعلان ائديلدي، بو ديللرده اوخوماق ويازماق ياساقلاندي. آذربايجانليلاردا آيري ائتنيك توپلوملاركيمي اؤز آنا ديللريني وبئله ليكله ده اؤز دوغما هويتلريني بوراخماق اجباريندا قالديلار. آذربايجانليلار تكرار اؤز دويارليقلاريني گؤستريب و1945- نجي ايلده مركزي حكومته قارشي گليب آذربايجانين مركزي تبريزده يئني بير دؤولت قوردولار.
اونلارين ان اؤنملي پروگراملاريندان آذربايجان ديلي نين تشويقي ايدي. آذري ديلينده روزنامه- لريايينلاندي ومكتبلرده آذربايجان ديلي اوخودولدو.1946-دا فارس اوردولاري تبريزي اشغال ائديب قورولان دؤولتي ييخديلار. اوندان سونرا تكرار آذربايجان ديلينده اوخوماق وهرهانكي بيركتاب، درگي و روزنامه يايينلانماق ياساقلاندي.
1978-نجي ايلده آذربايجانليلار تكرار پهلوي ديكتاتورلوغونا اعتراض ائديب ايرانداكي ضدشاه حركتلري نين رهبرليگينه گئچديلر. تاسفلرله تاريخ اؤزونو تكرار ائتميش واسلامي جمهوريتينده ده آذربايجانليلار اؤز انساني حركتلرينه صاحب اولا بيلمه ميشلر. آذربايجانين دموكراتيك حركتلري وديش اؤلكه لرين استيلاسينا قارشي ياپديغي ساواشلار بوخالقين ملي دويغولاري نين گؤستريجيسيدير.
آذربايجان ايرانين ان وئريملي و ان قالاباليق بؤلگه- لره يندن بيريدير. اوتوزميليوندان آرتيق آذربايجانلي ان باشدا آذربايجان وتهران اولاراق ايرانين آيري- آيري شهر وكندلرينده ياشاماقداديرلار. بو اؤ دئمكديركي ايران نفوسونون ياريسيندان چوخونو آذربايجان توركلري تشكيل ائديرلر. ايرانين چوخ
خالقلي اؤزلليگينه باخاراق آذربايجانليلارين حقيقتده آزينليق دگيلده بو اؤلكه ده چوخونلوق سايينا صاحب اولدوقلاري اؤزونو گؤسترميرمي؟ آذربايجان بيرچوخ سايدا دونيادا تانينميش ايش آداملاري وبيلگينلري ايران توپلومونا قازانديرميشدير.
اولوسلارآراسي تانينميش ايش آداملاري نين 80% و آدليم ايرانلي آكادميسيه ن وضياليلاري نين 60% بوائتنيك توپلومدادير. آذربايجانليلارين بوگونكو دورومونون اورتايا چيخماسي نين سببيني آراشديرماق اوچون 1920 ايللره باخمالييق. آذربايجانليلارلا فارسلارين آراسينداكي بوگونكو ايليشگي 1358 ايلي تهرانا كؤچمه سيله باشلار. بورادا بير سوسيولوژيك اصطلاحدان((يوخ)) و((پول)) فاكتورلاريندان بحث ائده جه گم. پول فاكتوروندان منظور آذربايجانليلاري بوكؤچمه گه جذب ائدن فاكتورلار و پوچ دا بوائتنيك توپلومو اؤز يئريندن ويوردوندان آزديران فاكتوردور.
تهرانين بيرپايتخت اولماسيندان بوشهرده كي صنعتي- لشمه، مدرن لشمه وبونلارين نتيجه سيندن دوغان بيرچوخ امكان وتهران سكنه سينه ساخلانان راحاتليقلار آذربايجانليلاري بوشهره جذب ائدن فاكتورلاردير. آذربايجان دا ايرانين آيري آيري بؤلگه لري كيمي بوگليشمه لردن وصنعتي لشمدن يوخسول بوراخيلدي. آذربايجانليلار داها اييي شرايطده ياشاماق وچاليشماق اوچون تهرانا كؤچدولر. تاسفله تهرانا كؤچن آذربايجانليلارين حاققيندا هئچ بيردموكرافيك بيلگي وآمارلارا راستلانيلمير. فقط توپلانيلان غيررسمي بيلگيلره گؤره تهرانا كوچ ائدن ايلك گروپ آذربايجانليلارين اوخوما يازمالاري چوخ آشاغي وياهئچ اولمايان كندلي وايشچي طبقه سيندن اولدوغو بيلينمكده دير.
بوگروپ آذربايجانليلارين چوخو تهراندا آياق اوستو ساتيجي وكارخانا لاردا ايشچي اولاراق ايشه باشلاميشلار. اونلار تهرانليلاردان فرقلي ديله و ائتنيكه صاحب اولدوقلاري اوچون فارسلارين طرفيندن داواملي تحقير اولور وآشاغي دوشورورلر. بوآرادا اونلارين آذربايجانليلارا قارشي قضاوتلرينده گئوشكليكلريني گؤروروك.فارسلار آذري لري چوخ نگاتيف عنوانلارلا آد ائديرلر. مثلا آذربايجانليلاري باشادوشمز، آخماق وچوخ دا حيرصلي اولدوقلاريني سؤيله ييرلر. آنلاديلان جوكلار وتمثيل لرين قاباريق فيگورلريني آذريلره ياراشديريرلار. فيليملرده و(لاله زاري نمايشلرده) آذري لر فيريلداقچي و حتي قاراياخاچي، حووض سويو چكن اوخوماق يازماق بيلمه ين بيرخلق اولاراق گؤستريلير.
تهرانا كؤچن ايكينجي گروپ داها ايي مالي دورومدا اولوب اؤز سرمايه سي ايله اؤز ايش يئرلريني قوران آذربايجانليلاردير. فقط تاسف اولسون كي، بوگروپون تهرانا كؤچمه سيله برابر فارسلارين توتومو آذريلره قارشي داهادا خشن- لشميش واونلارين عليهينه يئني قاباقجادان قضاوتلر وتمثيل لر ياراديلميشدير.
آذربايجان اوشاقلاري مكتبلرده ياخشي قونوشابيلمه ديكلري اوچون داواملي حالدا معلملر واوبيري شاگردلر طرفيندن آشاغي لانميش، عائله لر اوشاقلاريني بو روحي اشكنجه دن قورتارماق اوچون اونلارلا فارسجا قونوشماغا باشلاميشلار. زامان گئچديكجه يئني نسيل فارسجاني اؤز آناديلي كيمي منيمسه ميش وياواش- ياواش ديللريله برابر آنا وائتنيك هويتلريني ده ايتيرميشلر. بير ائتنيك گروپ ديل دگريني واؤنه ميني ايتيرديگي زامان او ائتنيك گروپ چؤكمگه باشلار. انوتماياليم كي بيرائتنيك گروپون او گروپون روحونو واصالتيني يانسيديرو اوگروپون بيرليگي نين سمبوليدور. بير ائتنيك گروپون گئچميشيني وگله جگيني بير- بيرينه باغلايان ان بؤيوك واسطه لردن بيريي او گروپون ديليدير وبير ائتنيك گروپون ديلي سوردوكجه او گروپ ياشار. بونودا گؤز اؤنونده توتاليم كي، آنا ديلينيي اؤرگنمه ين بير اوشاق اؤز كولتورونو و وارليغيني اؤرگنميرسه،اسكيك بير منليگه مالك اولاجاقدير.آنا ديليني اؤرگنمه ين بير اوشاق اؤز كولتورونو و وارليغيني اؤرگنميرسه ، اسكيك بير منليگه مالك اولاجاقدير. بوجهتدن ديركي،بير ائتنيك گروپو ييخماق ايسته- ينلر ايلك اؤنجه اوگروپون قونوشدوغو ديلي محو ائتمگه چاليشر. بورادا بو بؤلومده چوخ قيسا اولاراق ايراندا آذري لرين عليهينه آپاريلان قاباقدان گلرليگين سببيني علمي نظريه دن فايدالاناراق آيدينلاشماغا چاليشاجاغام.
ايرانين تاريخي گليشمه سينه باخارساق آذريلرين قرنلر بويونجا بو اؤلكه ده حكمرانليقلار ياپديقلاريني گؤروروك. اون دوققوزونجي يوز ايللرده ده يعني حكومتين تهرانا انتقاليله و اونون آردينجا پهلوي وفارس حاكميتي نين قورولماسيندان سونرا دا ايرانين بوتونلوگو يابانجي اؤلكه لرطرفيندن تهله كيه دوشدوگونده هميشه آذريلر آياغا قالخميش وايرانين برليك وبوتونلوگونو قوروماق اوچون مبارزه ائتميشلر. اؤنجه دن ده يازيلديغي كيمي آذريلرين باجاريقليغي هرساحه ده اثبات ائديلميشدير.بونلار فارسلاري اوزه ن وقيزديران فاكتورلار اولوب اونلاري هميشه پوتانسيل بير رقيب كيمي گؤروب اؤزلرينده بوباجاريقليغي گؤرمه يينجه اونلاري لكه له مگه چاليشميشلار.
باشقا عبارتله فارسلارين آذريلري تحقير ائتمك اوچون حادثه ني منطقي گؤسترمگه چاليشمالاري- ديركي اونلارا گؤره آذريلرگويا دوغرودان آخماق، يؤنده مسيز وخشن سويدان اولدوقلاريندان بو حركتلري ياراتميشلار. بورادا يازيلان بو تئزين آنا نقطه لريني خلاصه لشديرمگله، آپارديغيم آراشديرمانين نتيجه سيني آيدينلاشديرماق ايستيرم. پهلوي حاكميتي نين قورولوشوندان بويانا ايران توپلوموندا آسيميلاسيون سياستي دوام ائتميش، اسلام جمهوري سي نين اسلام ايده ئولوژيسيندن يارارلاناراق بو اؤلكه ده ياشايان آزليقلاري بوعدالتسيزليكلردن قورتارماسي گؤزله نيرديرسه، فقط بو انتظار گرچكلشمه ييب، ايراندا ياشايان آزينليقلار اؤز انساني حقوقلارينا چاتماديلار.
آذربايجانلا فارسلارين آراسينداكي ارتباط آسيميلاسيون سياستتيندن بؤيوك اؤلچوده بهره- لنميشدير. اوندان علاوه ايران توپلوموندا آذريلرين عليهينه بيرچوخ قوراشديرمالار وار.
بو قوراشديرمالار فارسلارين طرفيندن اؤز داورانيشلاريني وحاكميتلريني مشروعلاشديرماق اوچون گليشديريلميشدير. بونودا دئمه ليييك كي، بو قوراشديرمالار آسيميلاسيون پولتيكي نين ثمره- سيدير. چونكي ايران حكومتي فارس ديليندن قيراخ آيري ائتنيك گروپلارين ديللريني ياساقلانديراراق بو ائتينك گروپلاري و اونلارين اينانديغي كولتورو وقونوشدوغو ديلي رسما دگرسيز اعلان ائتميشدير.
تاريخ بويونجابيرچوخ آذربايجانلي خصوصيله فارس بؤلگه لرينده ياشايان وفارسلارلا سيخ ارتباط دا اولانلار بو قوراشديرمالارين تاثيري آلتيندا، اؤز ائتنيك وارليغيني بيله- بيله ويا بيلمه يه- بيلمه يه بوراخيب، اؤزلرينه فارس هويتي آلميشلار.
ايره ليده يازيلديغي كيمي منيم مقصديم آذربايجانليلارين آسيميلاسيون پولتيكينه واونلارين عليهيينه متداول ائديلميش قوراشديرمالارين عكس العمليني آراشديرماقدي. بوچاليشمالاردا آذربايجانليلارين داورانيشلاري، اونلارين دوغوب بؤيودويو يئردن وفارسلارا اولان ايلگيلري نين سيخليغيندان چوخ متاثر اولدوغونو گؤردوم.
گؤزتله ديگيمه گوره آذري لري بوفاكتورلاري نظره آلماقلا اوچ گروپدا طبقه لشديره بيليريك.
بيرينجي گروپ، آذربايجان بؤلگه سينده دوغوب بؤيوين و اورادا ياشاييشلاريني سوردورن آذري- لردير. بو گروپون آداملاري ائتنيكلرينه ان چوخ صادق قالان آذري لردير. اؤز آنا ديللريني قونوشوب وعموميتله اؤز ائتنيك هويتلرينه غرورلا گؤوه ننلردير.
ايكينجي گروپ آذريلر آذربايجاندا دوغوب بللي بير ياشدان سونرا تهران ويا آيري فارس بيربؤلگه يه كؤچنلردير. بونلارين عمومي گئديشي ايكي طرفلي ياشاماقدير. بيرطرفدن آذربايجاندا دوغولدوقلاري اوچون ديللريني وهويتلريني چوخ ياخشي بيلن، ديگر طرفدن ياشاديقلاري فارس اورتاميندا اولدوقلاري اوچون دواملي قوروشدورمالارا معروض قاليب و روحي چكيشمه ده ياشاماقداديرلار. بونلار چوخ فرقلي بير داورانيش گئچيرمكده ديرلر. فارسلارلابرابر اولدوقلاريندا فارسلارا طرف يؤنه ليب، ممكن اولدوقجا اؤز ائتنيكلريندن اوزاقلاشير، عموميتله فارسجا قونوشان، يالنيز اؤز ائتنيك گروپلاري نين تك- تكي ايله اوز- اوزه اولدوقدا بيرآذربايجانلي كيمي داورانيب وآذري توركجه سيله قونوشورلار. آشاغيداكي آنلاداجاغيم اوچونجو گروپ آذريلر بو گروپون چوخلوقلاري ديرلار.
اوچونجو گروپ آذريلر، تهراندا وياباشقا بيرفارس بؤلگه سينده دوغوب بؤيويه ن آذري نسليدير. بونلارين آنا- باباسي ايللر اؤنجه تهرانا كؤچموش بيرچوخ چتينليكلره معروض قالميش وآذري اولدوغو اوچون ايكينجي صنف معامله سي گؤرموشدور. بوعائله لر اوشاقلاريني بوچتينليكلر وسيتملردن قوروماق اوچون اونلارلا دوغوشدان اعتبارا فارسجا قونوشموشلار. بونلار آذري ديليني بيلمه ين و ياانكار ائدن،عموميتله اؤزلري نين آذري ائتنيك گروپلارينا منسوب اولدوقلاريني رد ائديب، يئري گلينجه اؤزلري نين ائتنيك قارداشلاريني تحقير ائدن آذري لردير. بوگروپ فارسلارين اونلارا يؤنتديكلري نفرتي منيمسه ييبب. اؤزلريني آشاغيلاديب، اؤزلرينه و ائتنيكلرينه سايقيلاريني ايتيرنلردير.
بو گروپا داخل اولانلار فارس توپلومو طرفيندن قبول ائديلمك اوچون، اؤز آنا ديللريني و ائتنيك هويتلريني بوراخيب بيرفارس اولماق خاطره لازم اولاسي ايشلره ال آتان آذريلردي. بونون اوچون آتديقلاري ايلك آديم اؤزلرينيي فارس و آنا ديللريني فارسجا تانيتديرماقدير. بوكيمي آذريلر اؤز ائتنيكلرينه تماما يابانجي اولانلاردير. بونلار ائتنيك هويتلريني وآنا ديللريني بوراخيب گويا داها دگرلي هويت قازانماقلارينا اينانماقداديرلار.
بو صنفده بئله بيردورومون نه قدر دوام ائده بيله- جگي باره ده چوخ دوشونورم. چونكي عائله لر اؤزآنا ديللريني وائتنيك كيمليكلريني اونودوب اوشاقلاريني بويولدا يئتيشديرمك يئرينه اونلاري رد ائديب وفارس هويتي منيمسه ميشلر.
اگر يئني نسيل آذربايجانلي اؤز كولتورونو، ديليني، عادت وعرفلرينيي اؤيرنمزسه اؤز ائتنيكيني نئجه قورويابيلير؟ بونسيل اونوتماماليديركي، ايلك دفعه ايراندا دموكراتيك بيرحكومت ايسته ين اونون اوچون ووروشان،ايرانين بوتون آنتي ديكتاتور حركتلريني اورگانيزه ائديب يورويه آذربايجانليلاردير.
بوقدر باشاريق،اعتبار وپارلاق گئچميشه صاحب اولان بيرخالقا بو قوراشديرمالار ياراشارمي؟ بوسورونو اؤنجه اؤزوموزدن سوروب، اؤزوموز اؤزوموزه اينانيب، سونرا بيزه بو چركين معامله يه لايق گؤرنلردن سورمالييق. يالنيز بيز اؤزوموزه اينانماديغيميز سيرادا ، آنا ديليميزده ن وائتنيك كيمليگيميزدن اوتانديغيميز سيرادا اؤزگه لريندن داها بوندان ياخشيسيني گؤزليه بيلمه ريك!!
