پروفئسور دوكتورحميد محمدزاده و ملي مدنيتميز و كتاب دونياميزين افتخارلي سيماسي دونياميزي ترك ائدندن سونرا اجتماعي وفرهنگي حياتينا لازمي دقت وئريلمدي، ايندي بيز بورادا اوعالم وخلق خادمينين حيات ماجرالارينا بيرداها قاييديريق:
پروفئسور دوكتور حميد محمد زاده نين دونيادان ابدي كؤچنلرين كروانينا قوشولماسي هاميميزي كدرلنديردي. حميد محمدزاده نين بيليك، متانت و اؤز ائل- اوباسينا بسله ديگي اينام وصداقت جارچيسي بيزي ان بحراني گونلرده، يعني يوردوموزون اؤز بابكلريني، جوانشيرلريني، ستارخانلاريني خيابانيلريني دريندن تانيماغا باشلاديغي انتباه عرفه سينده بيزي ترك ائتدي.
پروفئسور محمدزاده عؤمور بويوباش اوجاليق وشرفله ياشايان انسان بيزلري آذربايجان شناسليق، ادبيات ومتن شناسليق ساحه لرينده يالقيز بوراخيب حياتا گؤز يومدو…
حميد محمدزاده 1325- نجي ايلده آذربايجاندا باشلايان ملي حركاتين قانا بويانديغي گونلرده، شمالي آذربايجانا كؤچمه لي اولور واورادا بيرسيرا اوغورسوزلوقلارا اوغراديقدان سونرا، اورادا انيورسيته ني بيتيرير وادبيات رشته سينده اوزون چاليشمالاروآراشد يرمالاردان سونرا ادبيات ومتن شناسليق دوكتورلوغونا لايق تانينير.بو اوزون سورن آراشديريجيليق يولوندا اوخيرخواه عالم وائل قايغي كشي پروفئسوري عباس زامانف لاعلمي امكداشليق آپارير وبئله ليگله بوتانيشليق ومشترك امكداشليق ايللرينده بيرچوخ بويوك وزامانين توزو اوزونه قونموش اثرلرين رداكتورو اولورلار.
حميد محمدزاده نين پروفئسور عابباس زامانوفلا اورتاخلاشا اثرلره اوسته ليك شهريارين حيدربابا منظومه سي وآذربايجان كلاسيكلري حاققيندا سانباللي(ثمره لي) مقاله لري وباشلانيش آچيقلامالاري اولموشدور. بيز بو بؤيوك ايتگيني گؤركملي عالمين حيات يولداشينا، بيرقيزي وايكي اوغلونا،دوستلار واوناقايغي وحؤرمت بسله ينلره وبيرسوزله آذربايجان علم وادب دونياسينا تسليت دئيير واونون اونودولماز خاطره سينه گووه نيريك.
* * *
حمبد محمدزاده ايله ايلك تانيشليق ويولداشليغيم دانشسرانين(دارالمعلمين نين) درس كلاسلاريندا باشلار. ساده، خوش گولش آلچاق گؤنول 20 ياشيندا حميد، اؤز علمي، حلمي، يورولمازليغي اونونسليميزين پارلاق سيماسينا چئويرميشدير.
حميد، ائله اوچاغلاردان ، يعني 22-33 ايللرده ايلك گوندن تاسون گونه قدر ائله معلم قالدي وتوش گلديگي بحرانلاردا اؤزونو تميزوباشي اوجاآپاردي. مقام، آد ياعنوان هئچواخت اونوآزديرمادي . ايندي كي كيمي ياديمدادير: اوآذربايجان دموكرات فرقه سي قورولاندان سونرا، عالي سياسي مكتبين آچيليشي ايله اوردا ياتاقلي واحدلره مسئول تعيين ائديلديگي حالدا، نظامت مسئوليتي ده داشييردي. اوواختلارفرقه نين اساس سياستي ساده ليك، بيراوزلولوك وصداقت اوستونده قويولسادا، اللرينه جييه ردوشموش گؤرمه ميشلرين، لووغالارين، مدال تاخيب خالقا افاده ساتانلارين ودارگؤزلولرين يولويوخ، بلكه بودوشگون احوال روحيه دن چوخ ايراق وقارشي قارشييا ايدي. اوواختلار بيرگون نه ايشدن ساري، شايدده اوردا وظيفه دهاولان امكداشا باش چكمك اوچون آدين چكديگيم سياسي مكتبه گئيميش ايديم. حميد له اوز- اوزه گلديم. او ائله همان حميدآقا معلم ايدي. نه اؤزونو تاقجايا قويماق، نه اطرافيندا كيلارا يوخاريدان باخماق، نه اؤزوندن بوي دئمك – كيمي چركين خصلتلردن اوندا ذره قدرده آثارگؤرونموردو. شوخلوقلا دئديم: هاني بس سنين افاده داغارجيغين، هاني بس سنين ياراق- ياساغين؟ سؤزومو كسدي ودئدي منله باش- باشا قوشماق ايسته ييرسن؟ من((همان خاكم كه بودم))
حميد فرقه داغيلديقدان سونرا اوتايا گئچنلرين بيرنئچه سينين صاباحي سيني دوشوندوروردي . اونلاردان بيري ده حميد محمدزاده ايدي. حميد سيناقدان باشي اوجا چيخدي. اوتحصيلاتينا ادامه وئردي، متن شناسليق وادبيات رشته سينده مدافعه ائتدي وعلمي ايشچيليغا قدريوكسلدي. الي ايشده اولانلار ياخشي بيليرلر متن شناسليق، خصوصيله بيزده اولاق خط- ربط قاريشيقليغي چوخ آغير پئشه دي. حميد محمدزاده نين پروفئسورعابباس زانانف لا عؤمورسوره ايش آپارماسي وبوايكي صلاحيتلي تدقيقاتچينين بيگه چاليشمالاري حاصل اولان ((هوپ- هوپ نامه نين تكميل چاپي وجليل محمد قليزاده نين توپلوم اثرلري وبو هرايكي اثرين عرب اورفوگرافيسي ايله واونلارلا بوكيمي اثرلرين اساس امكچي لريندن بيري عباس زامانف اولورسا، ايكينجي سي حميد محمد زاده ايدي.
حميدين اوستادشهريارين ((حيدربابايا سلام)) منظومه سي ني اوتايليلارا تانيتدرملقدا سانباللي ايشلري اولموشدور. حميدين بوياساق ايشلري اوزون ايللردن سونرا ايرانا قاييتيقدا اونلارا مثبت وتقديره لايق قيمت وئرمك عوضينه ياراماز دامغالارايله دامغالاندي واونون شپه سي پروفئسور عباس زمانوفا دا توخوندي. ايراندا بيرپارا اورقانلارهانسي هانسي بدخواهليقلار اساسيندا عابباس زامانوفو . پروفئسور رستم علي يفي، حميد محمدزاده ني، حتي شاعر سهندي بونلا تهمتلنديرديلر كي گويا بونلار(( ك.گ. ب)) طرفيندن اوستادشهرياري اؤز ايده لوژيلرينه چكيب آپارسينلار وشهريارين معنوي دونياسي و((علي اوغلو)) اولدوغو بومهلكه دن قورتارير. حال بوكي، من بير بي طرف آدام كيمي ايشين ايچينده ايديم وبو ايشين نئجه باشلانديغينا ونئجه گليشمه سينه شاهدعيني ايديم( البته اگر منه- ده(ك.گ.ب)) دامغاسي وورولماميش اولسا).
واما يوخاريدا آدلاري چكيلن عالملردن بيرينجي عابباس زمانف، بوكريستال كيشي آذربايجانين جان فداسي ايدي. بيليرسيز كي ارمنيلر ايكينجي دونيامحاربه سي قورتارماقدا اولان عرفه ده نخجواني گئچميشده ارمنستان تورپاغيندان قوپاريلديغي ادعاسيله اوراني يئيه لنمك قرارينا گليب چاتير و ميكويانلارين اليله بو ادعاني يئربه يئر ائتمگه چاليشيرلار. بورادا هاميدان اول عابباس زمانف سسلندي واوجا سسله دئدي: نه خيال ائديرسيز؟ ميه نخجوان گردكاندي كي، بيز اونو بيرينه پاي وئرك، بيلمك اولمور، بلكه عباس زمانف ائله بوپروتستينه گؤره ((ك.گ.ب)) اولمالي ايميش؟!..
من باكييا ايلك سفريمده بيرغيرتلي همشهري ايله گئتميشديم. پروگراميدا بيرنجي گون گؤره جاغيم ايشلردن بيري عباس زمانوفو زيارت ائتمك ايدي. آخشام طرفي اونون آلديقيم آدرسه ائوينه يوللانديم. سن دئمه ككيشي نين حيات يولداشي آلاهين رحمتينه گئتميش وبوگون ده اورحمتليگين قيرخي ايميش. من ائوه چاتاندا باخديم بنانين اوزبه اوزونده چادير قورموشلار. بوآرا ايكي- اوچ اوتوبوس قيرخ مراسيمينده قاييدانلاراوتوبوسلاردان يئنيرديلر. سن ده كيشي اؤزوده بواتوبوسلارين بيرسينده، اؤزوده مريض احوالدي. نه ده اومني گؤرمه ميشديك. عكيسدن تانيرديق. كيشي گؤزو منه چاتيشان كيمي، قولونو يانيندا دوران بيريسيندن چكدي،اونو توتماسايديلارسويروشوب يئره ساريلاجاقدي. باكي نين چوخ بؤيوك سايدا آكادميكلري، اونيورسيته اوستادلاري، شاعرلر، يازيچيلار اوراداايديلر. اومنيم اليمدن توتوب اونلارين تك تكي ايله تانيش ائديب و دئيير. باخ بيزيم محمدعلي دي ها، ايللر يولونو گؤزلوردوم، بوگون گلدي چيخدي. سونرا قوناقلارينا باخيب دئدي: گؤرورسن بوگون باشيم چوخ قاريشيقدير، صاباحي سحرتئزدن گل قونوشاق، دردله شك داليسي گون من سفر هاماشيما(يولداشيما) دئديم. من گئديرم بيريسي نين گؤروشونه اگر سنده ممنمله گله سن پئشمان اولمازسان . اودا عكس آپاراتين گؤتوروب منله يولادوشدو. ساعات سككيزده كيشي دوروبب، يويونوب اوتوروب، چاي چؤرك يئمزدن بيزي گوزله ييري. بيز اوراچاتان كيمي او پلله كانلاردا ايدي، درين سئوينجله بيزي قارشيلادي،چاي دئمده ايدي. من اؤزومله بيربسته چاي گؤتورموشدوم(باكيداحضورلو) ائوه باش ساغليغينا گئدنده معمولا چاي، قند وبئله شئيلرآپاريرلار. اوجوان قيز نوه سينه دئدي قيزيم بيزه محمدعلي نين گتيرديگي چايدان دمله! سونرادا اؤزو دوروب گاه مربا گتيريب دئيير محمدعلي بو او رحمتليگين دوزلتديگي مربادير هئچ اولماسا دادبير، گاه زيتونو گؤتوروب توتور ودئيير بوزيتونلاري رحمتليك ائله اؤزو يولوب. ومن دئينده كي معلم بيز قليان آلتي يئميشيك. بيرآز گيلئيله نن كيمي دئدي: ميه سيز بير ائوه گلميرديز. ائو يغيجام ايكي اوتاقلي ائولردن بيري. آمما هريئر قفسه، هريئركتاب. اومنيم باخيشيمي كتابلارا سئزينجه(سئچينجه) دئدي. كتابلاريمين هاميسيندان سنه گؤندرميشم. بيرجه كتابيمدان ساواي اونودا بوگون وئرجگم. سنين گؤندرديگين كتابلاري دا آلميشام. من يئري گلميشكن سوروشدو: معلم دئييرلر سن عمومي كتابخانا تك- تك عالملره حتي سيزين آكادمي دن چوخ كتاب گؤنده ريرسيز- دئييرلر دونيادا آذربايجانلا علاقه دار اولان هربير كتابخانايا بيلگين ده عباس زمانوفون هئچ اولمازسا بيركتابي وار. سيزبوكتابلاري هاردان اله ساليرسنيز، سيزين بو ايشدن ساري معين بودجه نيز وار، يوخسا نئجه؟! گولومسه دي ودئدي: يوخ بودجه فلان يوخدي. آمما بيليرسن من كتاب يولچوسويام. ائشيديرم بيركتاب ياييليب اونون مولفي يا مترجمي نين سراغينا گئديرم اونا وئريلن كتاب پاييندان بير، ايكي، اوچ جلد گاهدان داها چوخ. آداملارين ياكتابخانالارين آدينا آليب گؤنده ريرم. تبريزده سنين كتابخانانادا، يعني تربيت كتابخاناسينا دا بوبهمن حركاتيندان سونرا اوچ يوزجلده ياخين كتاب گؤندرميشم.
دئديم: بلي، اونلاري منه گؤسترديلر. سونرا حميد محمدزاده دن سوروشدوودئدي مني بورادا تك بوراخدي گئتدي وسونرا آرتيردي اوگئتمه يه حاقلي ايدي. اوسيزين دريادا داها ياخشي اوزه بيلر. دئديم كئفي ياخشيدير، بيراوغلو دوكتور اولوب اوبيريسي ده آل وئرچي، قيزي دا مترجم. سوروشدو: سيز اوعلي تبريزيني نييه يوللانديرميسينيز؟ دئديم واللاهعلي چاليشقان آدامدي. آمما توركلوكده بيرآزآشيريدير… سونرا سوروشدو يئر- يوردجهتيندن بوردا راحات سان؟ يول هاماشيمي (يول يولداشيمي) گوستريب دئديم: اونون بيردفتري وار، او، راحاتليقلي دير. اورادا قاليرام. هاماشيمدان تشكر ائديب دئدي: چوخ ساغ اول كي اوزون ايللردن سونرا محمدعليني بيزهگتيردين. چيخاندا دئدي: ممكونون اولسا، منه ايكي ده اوچ ده بيرتلفون آچ. صاباحدان بيريسي گوندن سني اونيورسيته لرده وآكادمي ده تريبون آرخاسينا چاغيراجاقلار. پلله كانلاردان كوچه يه دوشنده اكبر دئدي بوكيمدي؟ بودا آدامدي، ساكي منده آدامام؟! بوردا مريض حالدا اوتوروب تهراندا علي تبريزييه فيكيرله شير، من ميانادان گئچنده(اكبرميانانين(( دوز دوزدان)) ماحاليندان دير) دده باش چكمكدن آغريترام، دئييرم قالسين گلن يولا اومندن هاميدان اول دوكتور محمد زاده ني سؤروشدو ودئدي: حميد نئجه دي، گذرانني نئجه گئچير؟ اوردا چوخ سينسيميركي؟ مني بوآخساق واختيمدا تك قويدو گئتديي. آمما عجب ائله دي گئتدي، اوردا اؤز دوغما يورد يوواسيندا باش داش ياسديغا قويار.
حياتدا اؤزوندن چوخ دوستلاري، ياخينلاري وخصوصيله امكداشلاري نين هايينا قالان كيشي، آلديغي شينديرغاز معاشين ياريسيني كتابا واونلارين پست هزينه سينه وئرن وطنداش انسان، اؤز عزيزي،يعني حيات يولداشي نين قيرخ مراسمينده قوناخلاريني يالخي لوبيالي دويو ايله عزيزلرين آدام، بيلينميرم((ك.گ.ب)) ايله نه اورجاهي اولا بيلرميش؟!..
* * *
لاكين قالدي شاعرسهند وادبيات آراشديريجيسي حميد محمدزاده، گويا كي شرقشناس پروفئسوررستم علي يفين اشاره سيله شهرياريين جلدينه گيريب اونو يولدان چيخارماغا چاليشمالارينداموفق اولمورلارو شهريار بوتله يه دوشمور و ((علي اوغلوو آزاده لرين مردين مرادي)) اولدوغوندان تله ني چرتير وبو((ك.گ.ب)) چيلرين الي بوشا چيخير!..
بو افترا گولمه ليدن چوخ آغلامالي وآغلاماليدان چوخ گولمه ليدير. فارس ديلينده قوندارما ضرب المثل واركي دئيير: خسن وخسين هرسه دخترمعاويه بودند! بو ادعا اوقدر باسمه ايدي كي حتي اونو طرح ائلييه ن اؤزوده اونا اينانمايا. شرق شناس رستم علي يفين 47-1346 ايللرينده تاپيليب ايرانا گلمه سي، اول ابتدادن منيم گؤزومون قاباغيندا اولوب وبوگليش اساسا سهنده ياشهريارا باغلي اولمادان ايرانين رسمي اورغانلارينا وخصوصا سلطنتي كتابخانايا باغلانيردي. اوواختلار فردوسي شاهنامه سي موسقووانين شرق شناسليق انسستيتوسو طرفيندن نشر اولماقدا ايدي. رستم بوشاهنامه نين رداكسيياسيندا چالشانلاردان بيري ايدي.
او واختلار حتي سياسي فعاليتلرينه گؤره ايراندان چيخيب شوره وي ده مهاجر كيمي ياشايان نوشين ده همين رداكسييا دا چاليشيردي. بوندان علاوه، رستم او ايللرده سعدي نين بوستانيندان رداكتورلوق ائتديگي نسخه ني چاپا حاضيرلاماقدا ايدي.
او واختلار من گاهدان بير ايران وشوروي فرهنگي رابطه لرانجمني نه گئديب گلرديم. بودا اورادا گئچيريلن پروگراملاردان استفاده قصدايله يوخ، بلكه اورادا اولان كتابخانانين بيرپارا كتابلاريندان فايدالانماق خاطره اورايا گئديرديم.اورانين مسئولو شويتوف آدلي بير روس ايدي. شويتوف عين حالدا فولكلورچو ايدي ومنيم ده فلكلور ايله اوغراشديغيم اونونلا ايلكيلنمه يه يئرآچيردي. من كتاب وئريب، كتاب آلماغا گئدنده گاهدان اونونلا گوروشوردوم. شويتوف بوگون يئنه مني كتابخانا دا گؤروب دئدي: نه ياخشي كي سني گؤردوم. آذربايجاندان بيرمستشرق گليب، لاپ سن دئيه نلردن دير. صاباح بوردا اولاجاق، ايسترسن گل سني اونونلا گؤروشدوروم. تشكر ائديب، دئديم گليرم. آمما اگر ايسته ديم بيرامكداشيمي دا اؤزومله گتيريم زياني يوخدو كي؟ او دئدي: نه زياني اولاجاق. بورا ائله بوجور گؤروشمه لر اوچون تاسيس اولوب. قاييداندان سونرا شاعرسهنده زنگ ووروب دئديم: صاباح ناهاردان سونرا ساعات بئشده اوتايدان گلن بير ادبياتچي شرقشناسلا گؤروشه جاغام. سن ده گئتمك ايسته سن، ساعات4 ده گلرسن گئدريك.
او واختلي واختيندا گلدي. دئميشديم ((سازمين سؤزوندن)) ده اؤريله بير جلد گؤتورسون. اورا چاتاندا من شوتيوفو سراغلاشديم. بيزه آشاغاطبقه ده هيئت مديره اوتاغيني گؤسترديلر. شويتوف قارشيميزا چيخدي وگؤزو منه ساتاشينجا دئدي: ياخشي گلدينيز، هامي بورادا. سهند منه باخدي، من سهنده باخديم. بيزهامي ايله گؤروشماغا گلمه ميشديك ايسترديك اوتايدان گلن پروفئسور رستم آدلي بيريسيني گؤرك. سويتوف قاپيني آچدي ، بيز گيرديك وبيرلحظه اؤزوموزو((هامي)) ايله اوز به اوز گؤرونجه بيرلحظه چاشديق. سن دئمه شويتوفون منظورو هاميدان انجمنين هيئت مديره سي ايميش.من چوخ اهمالدان دئديم قاسپادين شوينوف! سيز مني قرارايدي رستم علي يفله گؤروشدوره سيز، آمما ايندي بيزسيزين هيئت مديره ز ايله اوز اوزه گلديك. او گولومسه ييب دئدي: بويورون ائله رستم ده بورادادير. سيز نه دن بئله چكينيرسيز؟ ميه هيئت مديره آدام ييه ن دير؟ سونرا دا ايلك دفعه گؤردوگوموز رستمله ال وئرديك و اوتوردوق. بيزيم انجمنين هيئت مديره سي ايله قارشي قارشييه گلديگيميزاونلارا دا بيزقدر گؤزله نيلمز ايدي. شويتوف بونوسئزه رك باشلادي مني(او سهندي بيرنجي دفعه گؤردوگو اوچون هله اونو آديله تانيميردي ويالنيز منيم ديليمدن اونا شاعر- دئيه تانيردي) اوراكيلارا و اورداكيلاري بير- بيرمنله تانيش ائتمگه. اونلا تهرانين ائتيكتلي آداملاريندان اولدوقلاري اوچون چهره لريندن اونلاري تانييرديم: سپهبد امان اله جهانباني، دوكتور متين دفتري، سعيد نفيسي، عبدالرضا يا غلامرضا انصاري وبيرآيريلاري كي ايندي آدلاري ياديمدان چيخيب آرالاريندا البته ائله بيل انجمنين اورگاني اولان پيام نور درگيسي نين يازيچيلارهئياتيندن نئچه سي و اونلارين آراسيندا معارف كتابخاناسي رئيسي محمود بياني، خانبابا بياني نين بؤيوك قارداشي وبيري ده رهي معيري ايدي. نه جوراولموشدوكي بيزدن قاباق رستم علي يفله قونوشاندا بيزي تبريزدن گلميش قوناقلار كيمي تانيتديرميشدي. اونا گؤره دا بياني مني گؤرجك كتف- احوالدان سونرا سوروشدو: كتابخانا نه حالدادي؟
اونون كتابخانادان منظورو تبريزين دولتي تربيت كتابخاناسي ايدي ومن ايللر اورادا كتابدار وسونرا كتابخانانين كفيلي اولموشدوم. او ايللرده بياني قارداشي خان بابا بياني تبريز دانشگاهيندا رئيس اولدوغوسيرادا تبريزه گلميشدي وتبريزكتابخاناسينا- دا بازرس عنوانيندا تانينديريلميشدي). من اونا جواب وئرمگه مجال تاپمادان دوكتور متين دفتري مني عينكي نين قالين شيشه آلتيندان سئزيب دئدي: من سيزي گؤرموشم آمما بيلميرم هارادا؟ بلكه دانشگاهدا؟ دئديم خيرسيزمني، داها دوغروسو من سيزي تبريززده زيارت ائتميشم.اوتاريخ سيز سناتور چيخماق اوچون تبريزه گلميشديز. دوكتور اهري نين قوناغي ايديز. من تبريز روزنامه سي آدينا سيزايله مصاحبه يه گلميشديم.
او دئدي ماشااله سيزده كي حافظه يه ايگيرمي ايل بوندان اولي ائله دانيشيرسان كي، ائله بيل دونن اولوب. سعيد نفيسي سؤزه قوشولدو ودئدي سيز ايله گلن آقاشاعر اولموش اولسا گرك نه ديلده شعر دئيير، هانسي اسلوبدا، كلاسيك شعردئيير، يوخسا آزاد شعر ,ن اشاره ائله ديم كي شاعر اؤزو سيزين سورغولاريزا جواب وئرير. سهند دئدي من اصلينده آنا ديليمده شعريازيرام. اجازه ايسترديم بير- ايكي اوخويوم تا اؤزوز منيم اسلوبوملا تانيش اولون. هرطرفدن بويورون سسي قالخدي. قينينا گيرميش رستم علي يف ديرچلديي،رهي معيري ده قولاخلارين شاخلاتدي.
سهند دئدي من نئچه ايل اولاركي آذربايجان ملي داستانلاريني نظمه چكمكله مشغولام. اون ايكي دستانين هاميسيني نظمه چكميشم آمما اونلاردان يالنيز آلتيسي چاپ اولوب. ايندي من هله چاپ اولوب ايشيق اوزوگؤرمه ميش شعرلردن بيريا ايكي پاراگراف سيزين اوچون اجازه نيزايله اوخويورام. بويورون، بويورون:
بالا نرگيز، بالا نرگيز،
قول بوينوما دولا نرگيز،
دوداقلارين خام شكردير،
ديلين باتيب بالا نرگيز
(خلق گرايلي لاريندان)
منيم آنا شهريمده،
خارابا بيرخياوان وار.
اويان- بويان، نالبند، عللاف،
پالان تيكن، دللك، باققال،
چايخانالار، بوياخانا،
قارين- قورساق توكانلاري،
دوه گئچر، آتلي اؤتر،
كاروانسارا قاپيلاري…
قنوولاردان آخيب گئچن
گندابلارين باش چاتدادان
قوخوسونا باخماياراق،
نئچه- نئچه چايخانادان
هرواخ، هرآن ساز بالابان
((عليشاه)) دان، ((كوراوغلو)) دان
((دده كرم))، ((عاشيق قريب))
هربيريندن صحبت آچان
عاشيقلارين، اوزانلارين،
قاققيلتيسي دينله نيلير.
((چكيبب بزيرگان سويدوغوم،
قافله لر بوش قويدوغوم،
پاشالار گؤزو اويدوغوم،
نگار، چنلي بئل بودور بو…
عاشيق حسين هرواخ،هرهاچان
سازين چاليب اوخودوقجان:
((بالانرگيز، بالانرگيز،
قول بوينوما دولا نرگيز،
دوداقلارين خام شكردير،
ديلين باتيب بالا نرگيز…))
شاختا، بوران، آجيليق، حرمان،
سولدوردوغو((نرگيز)) لرين
بوتالاري غنچالاردا،
اوره گينه اميد دولار
گونش پارلار،نور اله نر
اوشاق ايكن، كؤرپه ايكن،
من بو پوزوغون، ساري، سولغون
((نرگيز)) لرين بيري سي نين،
قوجاغيندا بوي لآتميشام.
بونغمه لر، زمزمه لر،
احساسيمين تاياسيدير،
شعريمين ده ماياسيدير.
اوره ييمين تئللريني،
ازل باشدان سيزيلدادان
الهام وئرن، بئشيك اولان
قوپاريدير، آناسيدير.
خاطريمه گله ر- گلمز،
الهاميمي بيلر بيلمزز.
ائللريمين ياراتديغي.
ياراداني ياد وئريلمز،
هئچ بيرشاعر، هئچ صنعتكار
نظيره سين يازا بيلمز
قوشمالاردان آلميشام من
گؤنول سازين، زورنالارين،
دهللرين گور سسيندن،
عاشيقلارين، اوزانلارين
گونول آچان نغمه سيندن
اؤيره نيبن چالميشام من…
سالون سكوتلاشدي. كيمسه نين جينقيريدا چيخميردي. شاعر ساكت اولونجا رهي معيري دئدي: بوشعردگيل، بو بيرسمفونو، بير ساز وسؤزبالاديدي وقالخيب سهندين الين سيخدي… من ده اليمده تازا چاپدان چيخميش ((آذربايجان ديلي گرامري نين اساسلاريني)) آپارميشديم بياني اونو مندن آلدي بير اويان بويانينا گؤز گزديردي. اوكتاب تانيماقدا چوخ جلدي ايدي، دئدي اولار بونو منه هديه ائده سيز؟ دئديم اونو رستمين آدينا يازميشام، سيزده بوگونلرده كتابخانايا گليب بويوك امتنانلا گتيره جاغام. دئدي آمما ايكي نسخه: بيرسيني كتابخانايا، بيريده منيم اؤزومه.بورادا رستم قالخدي ودئدي آي قارداش، بوقوناقلارمني گؤرمگه گليبلر سيز اونلاري ائله يوردوزكي دا منله قونوشماغا حاللاري قالمادي… خداحافظله شيب سالوندان چيخديق. رستم دئدي: من قاييتمالييام. بونلار مندن ساده بورا ييغيليبلار. صاباح سيزله گوروشك. من دئديم ائله بيل سن نادريهتلينده سن. بيز اورا چوخ ياخينيق، صاباح ناهاردان سونرا ساعاتآلتيدا هتله گله ريك. او دئدي: بس اوكتابلارينيزي وئرين من گئجه باخيمگتيرديگيميز كتابلاري دا وئريب، انجمندن چيخديق. سهند دئدي: دئيه سنبو ديري باشدي، سويو پوفلييه- پوفلييه ايچنلردن دگيل، آيريليب قاييتديق.
* * *
صاباح سحر ساعات سككيزده ايش يئرينه گلنده گؤردوم رستم اوردا قدم وورور. سوروشدوم رستم سن بوسحر تزدن بورادا نئينيرسن؟ دئدي: گئجه كتابلارياوخودوم. يوخوم قاچدي. سحر تزدن دوروب هتلدن چيخديم كي بلكه سني گؤرم آللاها شوكور گؤردوم . سيز بورادا نه ايشلر گؤرموشسوز؟ مني بوساعات شاعرله گوروشدور. دئديم ساعات اوندان تئز اؤز ايش يئرينه گلمز. باخيرسان بيزيمكيلرده هله گلمه ييبلر. سن قليان آلتي يئمه ميسن؟ دئدي يوخ. دئديم: بوياخيندا گئچك ققهوهخانايا سن اورادا چؤرك يه، چاي ايچبيزيمكيلر گلسين زنگ ائله ريك
يا شاعر گلير بورا، يادا بيزگئدريك اورا. بيزيمكيلر گلديلر، ايش يئريني آچديلار. دئديم: زنگ ائله يين گؤرون سهند ايش يئرينه گليب يايوخ – جاواب وئرديلركي اوساعات اوندان تئز گلمز. رستم دئدي: ياخشي، بو آياق گئدريك، اوردا گؤزله ريك گلسين. يول چوخ اوزاق دگيلدي، آستا- آستاقونوشا قونوشا گئتديك سهند ده گلميشدي، رستم كتابيندان ساري سهنده يئنه تبريك دئدي وتانيشليقلا بونونلا باشلادي. رستم رداكته ائتديگي سعدي نين بوستانيني چاپ ائتديريردي، بونا گؤره ده او هله قالمالي ايدي بوفاصله ده بيز اونو(( حيدربابا درنگينده)) وسونرادا سهندين، دوكتورجاويدين،دوكتوركاتبي نين ائوينده قوناقلاديق. او باكييا قاييداندا درنكده اولوبحاضرلانان شعردن، نثردن، حيدربابايا نظيره دن و((يادي ازحيدربابا)) كتابيندان اؤزيله آپاردي و بو گليشي ايله سونراكي ايل گله جاغي فاصله سينده باكيدا، راديودا، دانشگاه كرسي سينده و اورادا بورادا شهرياري ديله – ديشه سالدي.
سونراكي ايل قاييداندا منه گيليلندي كي سن يعني من نشر ائتديگيم ((شهريا وحيدربابا)) خاطره لر، مكتوبلاو نظيره لر كتابينه اوندان لايقينجه آد آپارماميشام. دئديم رستم سن يانيليرسان من اوردا ايلك دفعه رستم كؤرپوسو عنوانيله كتابين بيرصحيفه ليك باشلانيشيندا آد چكميشم. آمما سندن يازييا شعر اولسادا اليميزه چاتماديغيندان كتابدا فايدالانا بيلمه مشيك. اونون جاوابي: هن من اورادا شهريارين آدين يئردن گؤيه قالديرميشام. اونو كيمسه تانيميردي ايندي يئدي ياشيندا اوشاقدان يئتميش ياشينداقوجايا قدر هامي اونو تانير… دئديم بيليرسن بيريندن سوروشدولار آدين نه دي؟ دئدي: آقا جمال. دئديلر جمالين سن ده، آقاسين اجازه وئر بيز دئيه! چوندوكي هه دا سني ديلده باغلاماق اولماز! دئديم: رستم، بيليرسن سن شهرياري تانيتديرماقدا امك وغئيرت گوسترميسن بو ايشله ده بيزده هامي نين حؤرمتيني قازانميسان بوتام دوغرودور. آمما سندن چوخ قاباق دوكتورحميد محمدزاده و دوكتورغلامحسين بيگدلي شهريارين شعرلري اوستونده ايشله ميش، حميد محمدزاده حيدربابا منظومه سيني كريل الفباسي ورنگلي منياتورلارلا سوسله ييب وگؤزل بيچيمده چاپ ائتديريب، غلامحسين بيگدلي شهريارين فارسي شعرلريني باكيدا خليل رضا كيمي قدرتلي شاعرلرين همتيله آذري توركجه سينه ترجمه ائتديريب، محمد راحيم، سليمان رستم، بختياروهاب زاده، ابوالفضل حسيني (حسرت) و اونلارا شاعرلر شهرياروحيدربابا ايله ايلگيلي شعرلر ومكتوبلاريازميشلار بئله كي((شهرياروحيدربابا- مكتوبلار ونظيره لر)) مجموعه سي بوشعرلر ومنظوم مكتوبلارين بيرقسميني اؤزونده توپلاميشدير. اورادا حتي گوركملي اديب وآراشديريجي ميزه ابراهيموف دا بو ايشه قاتيلميشدير. اساسا غلامحسين بيگدلي نين فارسجا شعرلريندن توركجه يه ترجمه ائديلميش شعرلريندن بير دفترچه ترتيب وئريب كريل حرفلري ايله چاپ ائتديرديگيني سيزمنه تانيتديرديز وحتي بيگدلي نين سيزه هديه ائتديگي نسخه ني سيزده منه باغيشلادينيز ياديزدان چيخماييب!
بوراسي اؤزلوگونده دورسون اساسا پروفئسورعلي يفين سهندين شهريارا يازديغي منظومه مكتوبوندان وشهريارين اونا يازديغي ((سهندييه)) سيندن علي- يفين هئچ باباسي نين دا خبري يوخ ايدي. او اسلام مدنيتي ايران ادبياتيني دريندن منيمسه ميش، اسلام دونياسي ومدنيتي ايله ياخيندان تانيش اولدوغوحالدا، بير پارا ايشلري اؤز آدلارينا قورتارماغي سئورديلر. آمما رستم علي يفين بو اخلاقي هئچده اونون ((ك.گ.ب)) اولدوغونا دليل اولابيلمزدي. اساسا او بورادا شوروي نين امنيت تشكيلاتينا آغزينا گله ني دئئيه ردي وآذربايجانين كؤنلوللو( داوطلب) صورتده روسيه نين تركيبينه داخل اولما سيني ادعا ائدنلرين وئرسرديلر قانيني ايچرديي. شهريار رستم علي يفدن چوخ سوسياليست ايدي. شهريارين اوتايا بسله ديگي محبت بيرملي نيسگيل ومحبت ايدي .
همان شهريارآدينا تشكيل اولان دگرلمه اجلاسيندا بيري شهرياردان چوخلو شعرلردن اوخوياندان سونرا تريبوندان يئننده منه يؤنلدي: اوستاد ايندي سن ده اوشهريارا اسناد ائتديگين حسرت ونيسگيل شعرلريندن اوخو! دئديم منيم اوخوماغيما لزوم يوخدور محمد راحمين شهريارمنظوم مكتوبو و شهريارين محمد راحيمه يازديغي جاواب حسرت وهجران شعري نين جانلي نمونه سيدير، اونودا سن اوخودون منيم اوخوماغيما لزوم يوخدو.
* * *
وآمما رحمتليك حميد محمدزاده ني بئله قوندارما تهمتلرابله قارالاماق واونو روسوفيل بيرسيمادا گؤسترمگه چاليشماق و زورونان شوره ويه اينانانلار وگؤوه ننلر جرگه سينه ايته له مك حقاكه كيشي ليكدن وجوانمردليكدن چوخ اوزاق وچركين بير تهمت چيليگه بويون ايمك دئمكدير. دوكتورحميد محمدزاده منيم ايناميما گؤره وارليغي ايله اؤز خلقينه و اؤلكه سينه باغلي بيرانسان ايدي.
اونون روحو شاد وخاطره سي ابدي اولسون…
* بوكدرنامه ده طرح اولان ماجرالاردان داها گنيش معلومات اؤيرنمك ايسته ينلره ايللر اول وارليق درگيسينده چاپ اولموش ((حيدربابانين ايزي ايله)) مقاله سينه باش وورسونلار.
