ميرموسی هاشمی
ايللردن بری اوزاقدان- اوزاقا سنين نجيب آدين ائشيديب، تانيش اولسايديم دا، مهربان سسينيزی تلفون آرخاسيندا دفعه لرله دويسايديم دا، آنجاق هر زامان يوخوندان گؤروش آرزوسوندايديم.
بيرينجی خاطره: … ايل پاييز موسمی گليب چاتميشدير، طبيعتين قوينونداکی بوتون آغاجلارين ياشيل يارپاقلاری سارالييب، قيزاريب و خزان اولماقدا ايدی باشقا طرفدن ده پاييزين سويوق و سس کويلو يئللری آغاجلارين ساچينی يولموشدور. يئره توکولن خزللری، آمانسيز اسن يئل گؤيده فيريلداديردی، گونون، ايشيغينی افقلردن چکيليپ قاش قاراليب، آخشام چاغی ايدی.
… ائوده يازی و پوزی ايشلری ايله چاليشارکن تلفن سسلندی. بويورون …! جاوادام، سالام. نئجه سينيز آقای هاشمی؟ ايسترديم دييم کی، ان سئوديگيميز انسانلاردان بيری يعنی اوستاد مينائی بو گئجه قوناغيميزدير، دورون گلين بيزه. سئوينيب جاواد بئيدن تشکور ائده رک، دئديم باش اوسته، تئز گليريک.
ياريم ساعات چکمه دی، حيات يولداشيم سونا خانيم ايله بيرگه ياخينداکی گل ساتان توکاندان بير دسته گل(چيچک) آلييب منزل باشينا يوللانديق. فاصله ياريم کيلومتردن آرتيق اولماز ايدی، اؤنجه قيد ائتديگيم کيمی هوا نين سويوخلوغو و دهشتلی يئلين اسمه سی ائله جه داوام ائتمکده ايدی. پاپاغيمی باشيمدا اليمله ساخلاماق مجبوريتينده قالميشديم. آنجاق بو دوروما باخماياراق گلييب چاتديق و ميزبانين قاپيسی نين زنگينی باسديق. ميکروفونلا بيزه بير سس سسلندی:
– بويورون اوسته! منزل بيرقديمی بينادا دؤردونجو مرتبه ده يئرلشميشدی. آسانسور پله لردن جانيميزی قورتاردی، ايچری منزل قاپيسينا چاتيق، بو قاپی آچيق ايدی. اؤنجه جاواد بيگ و اونون حيات يولداشی شهناز خانيملا گؤروشدوک، سسيميز قاپی نين گيريش يئرينده اوجالارکن، ايچری سالوندان چيخيب بيزه دوغرو گلن اورتا بويلو، ساچلاری و بوغلاری آغارميش، باشيندا قارا پاپاق، خوش سيمالی و خوش تبسملی و نورانی بير اينسانی قارشيميزدا گؤردوک! دئمک، او دا بيزی قارشيلاماغا چيخميشدی. بو نجيب اينسان، قدرتلی رسام، عصريميزين مينياتور اوستادی و يورولماز قايغی کش نصراله اوغلو، اوستا مينائی تبريزلی ايدی! اؤنجه حيات يولداشيم سونا خانيم گؤروشوب، خوش گلدين دئدی و سونرا من سلاملاشيب اوستاد ايله قول بويون اولدوق.
قوناق اوتاغيندا اوستادين يانيندا اوتوردوم. اوستادين درين سئوينجينی گؤزلريندن، سيماسيندان و اوجا سسله شن دانيشيغيندان دويدوم. قدار زمانه نين کئچميش تاريخيندن سؤز آچارکن، من، رحمتليک ميزه نوراله خان يئکنلی نی سوردوم. اوستاد دئدی: بلی. او محترم مبارز شخصيتی ياخشی تانيرام و من رحمتليک ميرزه نوراله خان ايله چوخ صميمی ايديم. و حقيقتا او غيرتلی و جسارتلی کيشينی آذربايجانيميزين قهرمان و اونودولماز بير مباريزلريندن سانيريق. ميزره نوراله خان يئکنلی نين آدی تاريخيميزين پارلاق صحيفه لرينده درج اولونموشدور. من دئديم کی: او، منيم بی بيم طرفيندن قوهوم سانيلير. اوستاد سئوينه ره ک دئدی کی، سنين ده سيمان اونا چوخ اوخشايير. و…
اوستاد، آذربايجان دموکرات فرقه سيندن سؤز آچدی. دوغوردانداکی اولايلاری و حقيقت لری جانلی بيرتاريخ کيمی بيان ائديردی. ائله بيل، حادثه لر دونن باش وئرميشدی. ميرجعفرپيشه وری دن آذربايجان دموکرات فرقه سی نين قارتالی اولدوغونو قيد ائده ره ک، اونا، سونسوز حؤرمتی اولدوغونو بيلديردی. اوستاد ماجرالی حياتی نين انيش- يوققوشونا توخوناراق بئله دئدی: آذربايجان ميللی حکومت دؤوری من 20 ياشيندا ايديم و بو حکومت طرفيندن، باکی انيورستتينده تحصيل آلماق مقصديله، بيرعده آذربايجان گنجلری ايله، شمالی آذربايجانا گوندريلديم. تاسفله ميللی حکومتين عؤمورو بير ايلدن چوخ اولمادی و بو حکومت، تهران رژيمی طرفيندن قانلا بوغولارکن منيم ده طالعيم باشقا وطنداشلاريم کيمی چوخ آجی و کدرلی اولدو. زاواللی و مظلوم آنام [منظر خانيمين] گؤزلری عؤمور بؤيو اوغول يولوندا قالدی. بوگون ياريم عصردن آرتيق دير کی، دوغما، ائل- اوبادان و شانلی وطنيمدن اوزاقلاردا ياشاماق مجبوريتينده يم.
اوستاد سؤزلرين بئله دوام ائتدی:
– باکيدا مهندس ليکده فوق ديپلم آلييب و تحصيلاتيمين داواميندا دوقتورلوق الده ائتديم. دئمک اولار، باکی نين خاورشناسی انسيتتونون شرق ميللتلری فرهنگ و معمارليغی ساحه سينده باش آراشديريجی و آذربايجان رساملار اتحاديه سی نين عضوی و آزاد رسامليقدا اشتغال درجه سينه نايل اولدوم. آذربايجان فرشی، مينياتور تابلولار و خطاط ايشلرينده چاليشيرديم. «عبدالکريم قاسم» حرکتيندن سونرا «باغدادا» دعوت اولدوم و اورانين اينجه صنعت آکادمی سينده تدريس ائده ره ک و بير سيرا فرهنگی بينالار او جمله دن باغدادين ميللی اوپراسی، موزه، کتابخانالاری پلانلاشديرماقدا امک صرف ائتميشم.
– بير آز سکوت ائتديکدن سونرا صحبتی داوام ائتدی: ايران عراق محاربه سی باشلارکن، سياسی سببلره گؤره ايشدن قيراغا قويولوب و چيخيشيم بو اؤلکه دن ياساقلاندی. آنجاق تهليکلی دورومدا عراقی ترک ائتمگه موفق اولدوم. قديم شوروی نين ياراماز ايشلريندن آچيق و آشکار تنقيد ائتديگيمه گؤره اوردا خالق دشمنی تانينميشديم، بونا گؤره آلمانيادان سيغيناجاق آلديم. عراقدا اولارکن ايران خالق مجاهدلری دفعه لر مندن امکداشليق تمناسيندا اولدولار. آمما بو ايشه راضيليق وئرمه مه ييمه گؤره ترور تهليکه سيندن جان قورتارديم و حتی بو گروپلار طرفيندن آلمانيادا دا اوللر ترور تهليکه سينه معروض قالميشديم.
اوستادين دانيشيقلاری او قدر صميمی و شيرين ايدی کی، آيريلماق ايسته ميرديک، آمما ساعات 24 راده لرينده گئجه نيز خيره قالسين دييه ره ک، محض بو گوزل و خاطره لی گئجه ده اوستاددان و ميزبانلاردان آيريليب ائوه دوغرو يولا دوشدوک.
ايکينجی خاطره : من و دوستوم ياشار … بيگ طرفيندن وارليغين سسی درگی سينين مالمو شهرينده نشره باشلاماسيندان عبارت دير. اوستاد مينائی ايله بو ساحه ده بير گئجه تلفوندا دانيشارکن، اوستاد بو درگی نين آذربايجان نشرياتی سيرالاريندا يئر توتماسينا چوخ ماراق و راضيليق گؤستردی و سئوينه- سئوينه دئدی کی، بئله درگی لرين چوخالماسی خالقيميزين اويانيش مرحله سينده آرتيق يارارلاری اولاجاقدير. منده، چاليشاجاغام يازيلارمی داواملی شکيلده وارليغين سسی درگيسينه گؤندرميش اولام. تاسفله دئمه لييم کی، مادی جهتدن جيب لريمده هله کی «سيچان» گه زير. باغيشلايين. آمما فيرچاملا نئچه- نئچه آذربايجان آبيده لريندن کارت پوسترلر حاضيرلامالييام کی، اونونلارين گليری بوتون درگینی ماليه لشدير مکده يارديمجی اولسون. اوستادين بيرينجی يازیسی«سولغون خاطره يارپاقلاريندان» آدلی بير سامبالی مقاله و تبريز سنجاقی آديله قوشدوقو شعر درگيميزده نشر اولدوندو.
اوچونجو خاطره:
2000– جی ايلين بيرينجی ياريسندا، آلمانيا سفرينده اولدوغوم واخت، چاليشديم بو سفر ده اوستاد مينائی نی اؤز ائوينده يوخوندان زيارت ائديم. او زامان اوستادين آياقلاری اؤزرينده خسته خانادا عمليات آپاريلديقدان سونرا اؤز ائوينده استراحت ائتمک ده ايدی.
آلمانيادا ياشايان مشترک دوستوموز سيف الدين حاتملوئی جنابلاری ايله گؤروش حاققيندا اؤنجه دن قرار آلاراق، سيف الدين بيگ گوروشون زحمتينه قاتلانميشدی. نه ايسه،[دوسولدوف] شهريندن [بن] شهری نين ياخينليقلاريندا يئرلشن بير شهرجيک ده، سيف الدين بيگ گيله دوغرو يولا دوشدوم. سيف الدين بيگ و اونون حيات يولداشی شيدا خانيم ائوده ايديلر. ناهاری بو مدنی و قوناق پرور ميزبانلارين ائوينده کئچيرتديک. ناهاردان سونرا سيف الدين بيگ ايله بيرگه گؤروش اوچون اوستادين ائوينه يوللانديق. فرصت آز اولدوغونا گؤره بيلمه ديم بير دسته «چيچک» آلا بيلديک يا يوخ. آنجاق ماشينی هوندور بير بينانين ياخينليغيندا ساخلاديق و بينايا دوغرو گئديک هماشيم(يول يولداشيم) ائوين عنوانينی ياخشی تانييردی. پله لردن يوخاری گئديب قاپی نين زنگينی باسديقدان سونرا، اوستاد اؤزو قاپينی آچيب و سئوينجله حيات يولداشی گل نيسا خانيملا بيرگه، بيزی قارشيلاديلار. اوستاد آستا- آستا يول گئده ره ک بيزی سالونا دعوت ائتدی و آردينجا چای گلدی. ائوين دوشه نه جه گی نين ساده ليگی اينسانين اورگينه ياتيردی. اوستادين هنری اثرلری هر شئیدن چوخ ائوده گوزه چارپيردی. بئله تصور ائديرديم کی، آلمانيادا يوخ، بلکه ده قوجامان تبريزده، ان قايغی کش و مدنی بيری عايله نين ائوينده اوتورموشدوق. اوستاد نئچه دانا ال اثرلريندن گؤسته ره ره ک، اولو شاعريميز شهريارين حيدربابا اثری نين مينياتورو نين چکمه سيندن صحبت آچدی.
بونون آردينجا، ميللی شاعيريميز بختيار وهاب زاده نين يئنی چيخان گؤزل بير شعير کاستیين اوستادا تقديم ائتديم. اوستادين استراحتين نظره آلاراق بير ساعات ليق گؤروشدن سونرا، بيرداها اوستادی باغريميزا باسيب و اوردان آيريلديق.
دؤردونجو خاطره:
اوستاد منه بير مکتوب گؤنده ره رک، او مکتوبدا بئله يازيليردی: محترم هاشمی جنابلارينا! سلام! قوشمادا گؤندرديگيم بو متنين تکليف شکلينده ياييلماسينا نئجه باخيرسينيز؟
من دولت حسابينا باکی «داک»- نا دعوت اولونموشدوم. نقاهتيم ايله باغلی اولاراق گئده بيلمه ديم! بو يازينی پيغام صورتينده قورولتای اشتراکچيلارِی نين نظر و مذاکره سينه وئريلمه سينی سفيرليگه بيلديرديم. آلديغيم معلوماتا گؤره سفيرليک قورولتای آچيلماميشدان بيرگون اول، اونو تلگرافا باکييا گؤندرميشدير! آمما بئله معلوم اولور کی، جلسه ده اوخونولماميشدير.
يقين کی سيز Evrensel جريده سينده ياييلميش 2001-7- 8 تاريخلی مصاحبم ايله تانيش سينيز. باشليغی بئله دير: «قارداش معامله سينه احتياجيميز يوخدور!» بونونلا، داک- ايچون گؤندرديگيم مطلبی توتوشدورون و لطفا نظرينيزی بيزه بيلديرين!» حورمتله علی مينائی 2001-12-15
آلمانياداکی آذربايجان سفيريگينه گؤنده ريلن مکتوب بئله ايدی:
عزيز سروريم! ايلماز بيگ!
عالی مقام سفيرليگين بيزه گؤسترديگی ان نجيب-sentimental فرصتدن يارارلاناراق، ميللی مقدراتيميزين perspektiv حللی ايله ايلگيلی، توکنمز آرزی و تکليفلر سيلسيله سيندن بير نئچه مهم نمونه لرينی آشاغی قايدا دا نظری- دقتينيزه چاتديرير و صلاحيتينيزين امکانی دايره سينده اونلارين باکيدا کئچيريلن حورمتلی داک نماينده لرين مذاکره سينه وئريلمه سينی رجاء ائديرم!
اودلار يوردونون «دويوش شهری»- باکی نين يانار قلبی ايله، همدم اولان وقارلی داک- ين محترم ائلچی لرينه بير قاچ اوره ک نيسگيل لريم:
1- دومانلی تبريزی سالاملا اوردان «تئزه پيری داميندان» «قيز قالاسيندان»!
2- اومورام کیBMT نين اينسان حقوقلاريندان مدافعه جمعيتينين، دونيا تهليکه سيزليک تشکيلاتی و باشقا- باشقا دموکراتيک- هومانيتار ايجتماعيتين، «داشناکسيون» ايشغالچيليغينا قارشی واقتيله چيخارديقلاری قرار و خبردارليقلارا يئنی ده ن باخيلماسی، عنادلا طلب ائديلسين و بو اساسدا، آذربايجان رسپوبليکاسی نين، توخونولماز، سو وئره ن اراضی سينده، ارمنی تروريست لرين تؤره تديکلری سايسيز- حسابسيز، ان وحشی جنايتلرينی آچيقلايان کسکين، بين الخالق پروتست نمايشلرين تشکيلينده عمللی آدديملار گؤتورولسون! اينانين کی، آغلامايان اوشاقا سود وئرمزلر!
3- اومورام کی بؤيوک قونشوموز ترکيه جمهوريتی باشدا اولماقلا، آذربايجان رسپوبليکاسی و اورتا آسيانين تورک ديللی مستقيل رسپوبليکالاری آراسيندا هر هانسی تجاوزکارليغا قارشی قانونی مودافعه پاکتينين حاضيرلانماسی اوچون موافق تکليف لر ايره لی سورولسون! بو چوخدان اولسايدی ايندی پروبلملرين چوخو حل اولموشدور.
4- آييق- ساييق، بصيرتلی سويداشلارا معلوم اولدوغو کيمی، بو گونکو دونياميزين سياسی پانوراماسيندا (منظره سينده) نظره چارپان تروريزمه قارشی مبارزه ايده آسی آرتيق بير سيرا دؤولتلرين ده نظرينی جلب ائده ره ک تروريزمين قطعی ايمحاسی اوچون حربی سفر برليگه قالخميشلار… «گلوبال محاربه!!» طرزينده آسيانين اورتا شرق منطقه لرينه دوغرو يوروشه کئچن بو متفق «آنتی تروريست» قووه لرين باشليجا هدفی، آنجاق و آنجاق
«افغانستان دا» يووا سالميش «بير سورو قولدور و تخريباتچی نين 11 سپتامبر » فاجعه سينه گؤره سوچلانان قارا گوروپ تروريست عنصرلرين محو ائديلمه سينه يونلميشدير!!… چوخ طبيعی کی بونونلار ياشيل پلانيميزين صلح و صفالی منطقه لری نين، دونوم- دونگه لرينده، فتنه کار قووه سينی گيزله ين و آرا سيرا «11 سپتامبر فاجعه سيندن» داها آجيناجاقلی دهشت لر توره ده ن ترورچولاری بوتون سيرادان چيخمالارينی ادعا ائتمک اولماز! تروريزم ايله مبارزه يه قالخان اقتدار باشچيلاری، بو معنادا اگر «خزر- يانی اؤلکه لره ده بير قدر توجه ائتميش اولورلارسا، او زامان «دوده ن ده بؤيوک فيل وار!» تيمثاليندا اونلار، يقين شرق کونتينئنتين بو زوناسينا (بؤلگه) داها اونودولموش ترورچو گروپلارين عفونتلی مرکزينی تانيميش اولارلار! ايران، روسيه و ارمنی لوبيست لری نين مادی – معنوی يارديملاری ايله قيدالانديريلان ارمنی داشناکسيون سالديرقانلاری طرفيندن، آذربايجان جمهوريتينه قارشی يؤنه لن ساواش قايدا – قانونلارينا سيغماز، ان ايرنج قانلی معامله لرين، هابئله ميللی ظولمون بوغوجو قارا بولودلاری آلتيندا اينله يه ن گونئی يه قارشی، اسلام دونونا بورونموش قدار حاکيم، شوونيزمين چرکين داورانيشلاری نين عمومی فاجعه منظره سيندن آنتی تروريست مبارزه تشبوسکارلاری متاثر اولمايا بيلمزلر! زننيمجه آذربايجان دولتی نين BMT – Nato- Avr.B نين تانينميش عضوی اولموش اعتباری ايله، اونون تروريزمه قارشی بين الخالق مبارزه آخينينا قوشولماسينا و آنتی تروريست بؤيوک دؤولتلرين مثبت نظر و حمايه سينی، منطقه تروريزمينه قارشی مبارزه ده جلب ائتمه سينه قانونی حاقی واردير!…
5- مستقيل قوزئی آذربايجان، گونئی آذربايجاندا ميللی آزادليق حرکاتی نين ديرچه ليشينه ان مهم داياقدير. رسپوبليکانين ايقتصادی، ايجتماعی و سياسی قدرتی نين آرتيب، محکم لنمه سی گونئیده کی حرکاتا ايلک نؤوبه ده معنوی روح وئره جک عامل دير! بونا ائله بوگون باکيدا کئچيريلن داک قورولتاين باريز مثال گؤسترمک اولار. چونکی اينديه ده ک دونيانين مختليف يئرلرينده آذربايجانلی مهاجر درنکلرين قورولتايی سجييه لی توپلانتیلاری بوگون آرتيق دوغما يوردوموزون تام آزاد، مستقيل پارچاسيندا کئچيريلمک ده دير. ميللی مقدراتيميزين پروبلماتيک مسئله لری ايله سيخ ايلگی له نميش اوتورومون محض بئله مزييتينه، اونون اولدوقجا بؤيوک سياسی اهميته مالک اولماسی انکار ائديلمزدير! طبيعی کی بو وادی ده شانلی باکی قورولتايی، اؤزوندن اوولکی داکين فعاليتينی نظرده ن کئچيره ر کن دموکراتيک پرنسيپلره اساسلاناراق اونلارين خصوصا قوزئی و گونئی ايله قارشی قارشیليقلی همريليک علاقه لرين محکملنمه سی باخيميندان ايش پلاتفورمونا داير ائتديگی بير سيرا مسئله لرين عمل مرحله سينه کئچيب، ضرورتينی وورغولايان تدبيرلری اؤبيکتيو (اساسلی) اولاراق مثبت ده يرلنديره جک دير! قوی خصوصی سليقه لرده ن کنار، ميللی بيرليک وار اولسون!
6- اؤلکه نين داخل و خارج ده يايين لانان، ميللی- دموکراتيک مطبوعاتيميز قيزيل- قلم لری ايله به زه ين گورکملی عاليم، تاريخچی، سوسيولوق، شاعير و يازارلار سيراسيندا، کهنه ايجتماعی- سياسی حيات طرزيندن، آزاد قوزئی- ين دموکراتيک حياتينا گلن ان کئچميش دونيانين، ايستی – سويوغونو دادميش داها تجربه لی و زنگين دونيا گؤروشلو گونئیلی سويداشلاريميزدان اومورام کی، ميللی آزادليق حرکاتينی اؤبيکتيو اولاراق قيمت لنديرمک مقصدی ايله، نفسانی شجاعتلرينی سفربر ائديب، اؤزونو تنقيد اساسيندا يئنی نسله عبرت درسی اولسون دييه، کئچميشده بوراخيلان سحو و قصورلاردان دا صحبت آچسينلار!…
شانلی باکی داک – نين محترم ائلچی لری! ايزن وئرين بيرداها سيزی محترم اوتورومونوز مناسبتيله صميم قلبيمده ن تبريک ائديم و توکنمز اوغورلار ديله ييم!
درين سايقیلاريملا: 21 آذر انقلابی وترانی پروفئسور، دوقتور علی مينايی تبريزلی
دؤردونجو خاطره:
آذربايجان ميللی جبهه سی نين قورولماسی اوغروندا چاليشديغيميز ايلک آييلاردا، اوستادی دعوت ائتديگيميز بير مکتوب حاققيندا اوستادين يئنه ال يازيسی ايله عين مکتوبون بوردا درج ائتمه سين ديرلی اوخوجولارا يئرلی گؤردوم، او مکتوبون آنلامی بئله دير:
15-6-2000 خصوصی مالمو مجلسينه
فداکار سلاحداشيم س. حاتملوئی واسطه سيله:
عزيز قارداشلار! و باجيلار! عذرلی غيبتی مه گؤره يقين منی باغيشلارسينيز!…
ميللی آماجلا باغلی سفر زحمتينه قاتلاشان دوستلاريمين بو مجلسده اشتراکنی غنيمت بيليب آشاغيداکی«کونستروکتيو» تکليفيمه نظر ديقتی نيزی جلب ائدير و بو حقده ساغلام فکر قايناغی و ايش گزار تدبيرين ياراريلماسينی اومورام.
سئوملی وطنداشيميز م.م هاشمی نين 25- مای 2000- تاريخلی نامه سينده ميللی آرزو و مقدراتيميزلا باغلی توصيه لرين و واختی چاتميش بيلديريش لرين (چوخ تاخير ائتميشيک) حياته کئچيريلمه سی ايچون اينديه قدر اؤلکه دن خارج مهاجر جمعيت لرده «آدی وار- اؤزو يوخ!» سياسی- ايجتماعی بير بينوره نين ياراديلماسينا و آرزولارين «قووه دن- فعله» کئچمه سينين گرچک صورتده کوردينالاشديريلماسينا تاخيره سالينماز بير ضرورت واردير.
من ميللی حقانيت يولونون 60 ايله ياخين يولچوسو کيمی 1947- نجی ايل قانلی 21 آذر چاغلاريندان بری، خصوصيله انقلاب قارتاليميز پيشه وری نين شورويده مرموز اؤلوموندن بو واختا قدر ستارلار، علی مسيو، خيابانی و پيشه وری لر و آذربايجانين بابک عنادلی مجهول عسگرلری نين لياقتلی تاثيری و اوتوراجاغی اولان عنعنه وی «آذربايجان دموقرات فرقه سی»- نين برپا سی آرزوسيله ياشاييرام. او مقدس محرابی، ياريم عصر بويو اشغال ائتميش خبيث- آنتی دموکرات لاردان نئجه خلاص ائتمه يی دوشونوره م. آرتيق ابديته قووشان شاهين لريميزين بو خصوصدا وصيت لرين اؤرنک توتاراق آ. د . ف. نين فعاليت مرکزی نين شمالی آذربايجان داکی عطالت دن (ظولمدن) قورتاريلماسی و دموکراتيک غرب ناحيه لری نين بيرينده دوام ائتديريلمه سينی لازم بيليره م.
عزيز سويداشلار! باش سيز مهاجر جمعيت لريميزين«دياسپور»حرکتينی گوجلنديرمک و گوئنی ميللی مختاريت آماجينا دموکراتيک فکر و عملی تدبير الهامی آشيلاماق هدفيله، عنعنه وی فرقه ميزه وورولان بوياغی لکه لری يويوب تميزله مک، داغيلميش ائل- اوبالاريميزی اصل بو آزادليق گونشی نين محوری اطرافيندا مرکزلشديرمک برپا ائده جه گيميز « فرقه کعبه سينه» نماز قيلماق گونوموزون باش وظيفه سيدير.
ياشاسين ميللی مختاريت هدفيله ايراندا فدراسيون بايراغينی اوجا توتان آذربايجان دموکرات فرقه سی! درين سايغیلاريما سيزين علی مينائی تبريزلی
اوستاد مينائی 2001- نجی ايلين آگوست آييندا بيرنئچه نفر باکيدان و لندن ده ن گلن سويداشلاريميزلا مالمودا قوناغيميز اولدو. پروفئسور غلامرضا صبری تبريزی جنابلاری، اوستاد مينائی ده ن گورکملی عاليم ضياء بنياد اوف 2 حاققيندا سئواللار سورارکن، اوستاد مينائی بئله دئدی:«ضياء معلم آذربايجانين ان گورکملی عالملريندن بيریسی ساييليردی و منی بو کئچنلرده، اونون مرموز اؤلومو تعجبلنديردی، داها دوغروسو چوخ کدرلنديم. و بوساحه ده اوستادين جانلی دانيشيقلارين صبری تبريزی بيگ طرفيندن ويدئو فيلمينه چکيليردی.
سونرا اوستاد مينائی دئدی کی حيدربابا مينياتورونو نئچه ديلده حاضيرلانماقا باشلاميشيق، آنجاق انگليس ديلينه چئويرمک ده هله يارديمچی تاپماغا موفق اولماميشام. صبری تبريزی، ماراقلا بو ايشی بوينونا آلدی و اوستاد مينائی سئوينيب و اونا تشکور ائتدی. اوستاد بير نئچه ساعاتدان سونرا بيزدن آيرلدی.
بيرمثل وار دئيير :«سن سای، گؤر من سايان نه اولور!» 2002- نجی ايلين فورار آيی نين ايگيرميسی ايدی، گئجه تلفون سسلندی. بويورون. صبری تبريزی يم، لندن ده ن. هاشمی بيگ، سيزه بير آجی خبريم وار! «بيلديگينيز کيمی اوستاد مينائی منه وئره ن اوستاد شهريارين حيدر بابا پوئماسين بوتون اينگليسجه يه چئورميشديم. بو گئجه آلمانيايا تلفون آچديم و ايشين سونا چاتماسين اوستاد مينائی يه خبر وئرمک ايسته ديم، تلفون آرخاسيندا اوستادين قيزی آفاق خانيم منه دئدی کی، تاسفله آتام بوگون دونياسين دئييشدی.
صبری تبريزی جنابلاری نين بو گؤزله نيلمز آجی خبری دوغوردانداکی منيم اورگيمی سارسيتدی. و نئچه دقيقه اوتوردوغوم يئرده اللريمی باشيما قويوب کدرله نييب و سوسدوم. سونرا بو آجی خبری تلفون واسطه سيله ايسوچين يوتوبوری شهرينده ياشايان اوستاد مينائی نين قديم دوستو، اوستاد محمد علی فرزانه يه چاتيرديم. اودا چوخ کدرلندی.
اوستاد علی مينائی تبريزلی ماجرالی حياتا سون قوياراق، سسيز- سميرسيز آراميزدان کؤچدو. سايسيز- حسابسيز سئونلرينی بوتون دونيانين دؤرد بير يانيندا غم و کدره بوروموشدی، داها بو نجيب اينسانين گؤزل سيماسين گؤرمک و مهربان سسين ائشيدمک بيرداها بيزلره نصيب اولماياجاق. علی مينائی تبريزلی ، «بن» شهری نين مزارليغيندا غريبجه سينه تورپاغا تاپشيريلدی.
اوستاد مينائی تبريزلی، شرفلی حياتيندا اؤز خالقينا صادق قالدی، قلم و هنرجبهه سينده يوکسک باشاريلار قازاندی و اونون سانباللی اثرلری آذربايجان خالقينانين ايفتخاری دير. اوستاد مينائی تبريزلی هر زامان اؤرکلريميزده ياشايير، اونون اونودولماز خاطره لری ابدی اولسون ! اونون پاک روحونا رحمت لر و شفقت لر ديله ييريک!
***
ايسوچ- مالمو
آگوست 2007
