موسيقی

منوچهر عزيزی (هارای)

بئله تصور ائدين کی، سيز سينمادا سينيز. سينما، بير محاربه فيلمينی نمايشه قويوبدور. او فليمده، دوشمن منطقه سينده گيزله نن ايکی عسگر، منطقه نی يوخلاماقچين سنگرلريندن چيخيرلار. عسگرلر، دوشمنين هجوم تهلوکه سی نين گؤزله نيلمه سينه باخماياراق، بيری- بيريله ظارافاتلاشيرلار. سيزده اونلارين ظارافاتلاريندان ماراقلاناراق، گولورسونوز. سونرا، بيردن- بيره دقتينيز عسگرلردن کسيله ره ک، قورخولو بير هيجانلا گئجه نين قارانليغينا جلب اولونور. هئچ بير پرابلم گؤزله نيلمير. مئشه نين آغاجلاری نين بير يارپاغی دا بئله اسمير. لاکين سيز حيس ائديرسينيز و يوز فايئز امين سيز کی، دوشمن، او عسگرلرين ياخينليغيندا، گئجه نين سارسيديجی ساکيت ليگينده، آغاجلارين خول بوداقلاری آراسيندا گيزله نيب، هجوم ائتمه يه حاضيرلاشير. ياخشی… سيز دوشمنی گؤزونوزله گؤرمه دن، اونلارين هجوما حاضيرلانماسينی کيم سيزه خبر وئرميشدير؟! موسيقی…! لاکين بو موسيقی، دوشمنين حربی قووه سی نين جنگه واری مارش موسيقی سی دئييل. بلکه، فليمين بئله بير صحنه سی اوچون، فيلم موسيقی سی بسته کارين بسته له ديگی موسيقيده ائشيديلن اسکريپلارين «ويلون» لارين چوخ ياواش، عين زاماندا بير حادثه نين و تهلوکه نين گؤزله نيلمه سينی ترنوم ائده ن هيجانلی سسلری دير کی، تماشاچيلارين چوخونون دقت او موسيقيه جلب اولمادان، هيجانلانيرلار. چونکو اونلار موسيقی دينله مکچين سينمايا گلمه ميشديرلر. لاکين اؤزلرينده ن آسيلی اولمادان، اونو ائشيديبديرلر. و موسيقی، اونلاردا ائله تاثير يارادير کی، اونلاری هيجانلانديراراق، هرآن دوشمنين هجوما کئچمه سی نين گؤزله نيلمه سيندن قورخورلار.

بو ميثال، بير حقيقتی بيزه آيدين ائدير کی، هيچکی موسيقی نين قدرتيندن آماندا دئييل. چوخ نادر حاللاردا ممکندور کی بعضی آداملار موسيقينی سئومه سين. لاکين هئچ بير ائشيده ن انسان، ادعا ائده بيلمز کی، موسيقيدن تاثيرلنمير.(1)

ايلکين انسانلارين ديلی، موسيقيلی اولدوغو اوچون، و اونلارين واسطه سيله دويغولارينی بيری- برينه چاتديرديقلارينا گؤره، شبهه سيز کی اوندان يادگار قالان محض موسيقينی ده، دويغولاری ايفاده ائدن بير مهم عاميل کيمی قيمتلنديرمک اولار. ايلکين انسانلارين موسيقيلی ديلی، بو گونکو دانيشيغين کلمه لرينده اولان فيکرين و ذهنين مقصدلرينی و معنالارينی ايفاده ائده ن بير عاميل کيمی دئييل ايميش. بلکه عموميتله موسيقيلی ديل و بدن اعضاسی نين حرکتلری، دويغولارين مقصدلرينی چاتديرماقچين ايدی. داها دوغروسو، ايلکين انسانلارين موسيقيلی ديلی و حرکتلی دانيشيقلاری، اونلارين اجتماعی عملی حياتيندان يارانميشدير.

«مريام» «موسيقی نين خالق شناسليغی» کتابيندا يازير: «موسيقی، يالنيز قارشيقلی اجتماعی علاقه لر شرايطی اؤزرينده يارانير» دونيادا ان مهم و کيفيتلی موسيقی، ا موسيقدير کی، معين مقصدلر اؤزرينده يارانيب دير. مدنيت لرين موسيقی سی نين اکثری، عملی موسيقيدير. اگر مختليف رقص موسيقيلرينه و باشقا اصيل موسيقيلره دقت يئتيريليب و آراشديريلسا، اونلارين درين معنالاری نين درکی آيدين اولاجاقدير. بيزيم هر گونکو اجتماعی و خصوصی حياتيميزدا او قده ر ديلسيز علاقه لر واردير کی، اونلارين نئجه يارانماسيندان و اهميتيندن خبريميز يوخدور. بيز هله بيلميريک کی، بيزيم ان قيمتلی عملی علاقه لريميزين چوخو، عاجيز ديليميزين يارديمينا چاتان دويغولو اشاره لريميزدن، حرکتلريميزدن، باخيشلاريميزدان، گولوشلريميزدن، کدرلريميزدن محبت لريميزدن و سؤزله ديله گله بيلمه يه ن مين لر مختليف اينجه و بديعی دويغولاريميزدان يارانير و حياته کئچير. بيز بير موغامدان، ماهنی دان، عاشيق هاواسيندان و رقصلردن آلديغيميز تاثيرلری ديله و قلمه گتيره بيلريک می؟! موسيقی، ديله وقلمه گله بيلمه ين دويغولاريميزين تمثيل چيسی دير.

موسيقی، انسانلارين عملی حياتی نين اينجه دويغولارينی ايفاده ائده ن بير واسطه دير. موسيقی، هيجانلاری تحريک ائديب دويغو واسطه سيله تفکر يارادان بير ديلدير. لاکين بو هيجانلار، مبهم اولدوغو اوجون، هر دينله يی جی نين ذهنينده بير دونيا مختليف معنالی شکيل لر و تصورلر يارادير. هر خالقين موسيقی سی، او خالقين عملی حياتی نين تاريخيندن يارانان دويغولاری نين ترنومچوسودور. ديليميزده اولان آهنگ لر، ايلکين موسيقيلی ديليميزين يادگاری دير. بيز هرآن اؤزوموزودن آسيلی اولمادان، موسيقی ترنم ائديريک و موسيقی ائشيديريک. دويغولاريميزين مکمل چاتديريلماسی اوچون، حرکتلريميزله و باخيشلاريميزلا، هرآن رقص ائديب و رقصلره تماشا ائديريک. عملی حياتيميزدان عاييد اولان موسيقيلر و رقصلر، هميشه بديعی و يئنی دير. محض موسيقی و محض رقص، بيزيم عملی حياتيميزين چوخ مهم نائيليت لريندن دير.

موسيقی، انسان دويغولاری نين کلاسيک لشميش سسيدير. بيز ايلکين انسانلارين امک ريتملريندن ياراتديقلاری ايلکين موسيقی باره سينده بحث ائتميشيک. ايندی ايسه کلاسيک لشميش مستقل موسيقی نين يارانماسی باره ده بحث ائتمک ايسته ييريک.

ايضاح ائتميشيک کی، موسيقی نين خام ماتريالی سسدير. لاکين غير منتظم سس، معناسيز سس- صدادان باشقا بير شئی دئييل. فيزيک علمينده معين بير قانون واردير کی دئيير، موسيقی سسينی، يالنيز منتظم سسلر يارادا بيلر کی اونوندا يگانه عاميلی ريتمدير.(2) موسيقی واسطه سيله انسانلارين مختليف دويغولاری نين معناسينی و کيفيتينی معين لشديريب پلانلاشديران مهم عاميل ده، اونون ملودلارينی و هارمونيلرينی تعيين ائده ن، ريتملرين ترنومودور. لاکين بيز هله ده، موسيقی واسطه سيله دويغولاريميزين تحريک ائديلمه سی نين سببلری نين سيرينی، کشف ائده بيلمه ميشيک. چونکو هئچ بير شئی، موسيقی کيمی انسان دويغولاری نين طلباتی نين درين ليگينه تاثير ائده بيلمه ييب و اونلارين دويغولاری آراسيندا، مشترک علاقه لر يارادا بيلمه ميشدير. يعنی بعضا انسانلار، حيس ائتديکلری دويغولاری، سؤزله ايفاده ائده بيلميرلر. بو يالنيز موسيقيله ايفاده ائديله بيلر. (3) اصل معنادا موسيقی نين ان مهم وظيفه سی بوندان عبارتدير.

اوردا کی ديل- آغيز سؤزدن اوسانار

سوروشون مطلبی، تئللر سؤيله سين

دوداق دانيشارسا اود توتار يانار

گره کدير زخمه لر، اللر سؤيله سين4

موسيقی واسطه سيله دويغولارين ترنومونون هيجانلارينی شرح ائتمک و يا قلمه آلماق، عبث بير ايشدیر. حقيقتده موسيقی، سسلر واسطه سيله، دويغولاری، آرزو و ايستکلری ايفاده ائده ن بين الخالق بير ديلدير کی، هر خالقين اؤزونه مخصوص اولان فيکيرلرينه، مدنيت لرينه و عادت- عنعنه لرينه گؤره، مختليف خصوصيت لره و معنالارا ماليکدير.(5) خالقلارين ديللری مختلف آهنگ قانونلاری جهتدن، معين خصوصيتلره ماليک اولدوقلاری کيمی، موسيقی ده، خالقلارين مختليف خصوصيتلی دويغولارين ديلی کيمی، اساس فورمالارا ماليکدير کی، بو اساس فورمالار، مختليف حيصه لره بؤلونور. مثال اوچون بير منطقه نين و يا خود بيرکندين يا قبيله نين موسيقی فورماسی، و يا شخصی بير دويغونون معين موسيقی فورماسی و نهايت باشقا عنعنه وی نمايشلر، و باشقا مدنيت لردن قاريشان موسيقی فورمالاری کيمی.

دوزدور کی موسيقی ده ديل کيمی انسانلار آراسيندا علاقه لرين يارانماسی واسطه سيدير، لاکين موسيقی، دويغولارين ديلی اولدوغو اوچون، اونلار ساده دانيشيق ديلی کيمی مقصدلری چاتديرماق آسان دئييل. خصوصا کی، دانيشيق ديلی ايله معين سؤزلر، مقصدلر و ايستکلر چاتديريلير. آمما موسيقيله، دويغولارين درين و مرکب معنالاری ترنوم ائديلير.

موسيقی بير ديلدير کی، اوندا ترنوم ائديلن هر ملودی و هارمونی، مطلق معين بير معنا داشيمير. يعنی موسيقی بير لغتنامه دئييل کی اوندا ترنوم ائديلن دويغولارين هر ملودی سينين و هارمونوسونون و يا خودهرريتمی نين معين معناسينی تاپماق ممکن اولسون. عين زاماندا هر خالقين موسيقی سی، او خالقين هر آدامی نين دويغوسو ايله سيخ علاقه ياراتماقلا، هره اؤز احوال- روحيه سيله اونو باشا دوشور و اوندان تاثيرله نير. بوندا سببی، هرخالقين ديلی و مدنيتی، معين فورمالارين خصوصيتلرينه ماليک اولدوغو کيمی، اونون موسيقی سی ده تاريخ بويو خالقين دويغوسونون عکس صداسی اولاراق، هره سی معين فورمالار و خصوصيت لرله يارانيب و انکيشاف ائديبدير. عموميتله موسيقی نين درکی نين و آراشديريلماسی نين چتين اولدوغونون سببی اودور کی، موسيقی، انسان دويغولاری نين ديلی دير.

هر خالق اؤز موسيقی سی نين عمومی کيفيت لريندن تاثيرله نير و اونون داشيديغی عمومی دويغولارلا تانيشدير. لاکين اونون خئر داليقلارينی، هره اؤز احوال- روحيه سيله درک ائدير. اونوندا سببی بودور کی، حتی مشترک بير مدنيته ماليک اولان بير خالقين آداملاری نين دويغو مدنيت لری بير- بيريله چوخ ياخين اولدوغو بير زاماندا، يئنه ده عين وضعيتده و عين کيفيت ده اولا بيلمير. خالق موسيقی سی زامان اؤزرينده سينه دن- سينه يه کؤچمکله- ياناشی، اوندا دگيشيک ليکلر يارانير کی، بيز يالنيز اؤز زامانيميزين موسيقی دويغوسونو حيس ائده رکن اونلا علاقه ياراديريق. تدقيقاتچيلارين نظرلريجه، شبهه سيز کی، بوتون موسيقی مدنيت لری تاريخ اؤزرينده يارانارکن انکيشاف ائديبدير. بو نظريه لره اساسا، موسيقی مدنيت لری آراسيندا اولان فرقلرين سببی بوندان عبارتدير کی، مختليف مدنيت لرين مدنی يوکسک ليگی و تکامولو، مختليف سويه لرده ديرلر. حتی مشهور تدقيقاتچی، «کورت زاکس» «1962» اؤز اثرلرينده بو مسئله يه توخونارکن دئيير: مختليف مدنی سويه لره ماليک اولان خالقلارين موسيقيلری ده، هره سی معين فورمالارا ماليک اولماقلا ياناشی، مختليف سويه لر اؤزرينده دگيشيلير. اونون نظريجه، قديم موسيقی ساده اولاراق، زامان اؤزرينده تدريجله مرکب له شيبدير. البته بعضی مدنيت لرين موسيقيلری عکسينه اولاراق، مرکب ليکدن، ساده ليگه دوغرو يونه ليبدير. ميثال اوچون آوروپا موسيقی سی نين مدنيتی کی اون سگيزينجی عصيرده «کونتر پووان» نين مرکب قانونلاری اؤزرينده يارانيردی، ساده «هوموفونی» يا چئويريلدی.

موسيقی شناسلارين اکثری ده، بير قورولوشون مرکب ليگی ايله، مرکب موسيقی فورمالاری آراسيندا اولان علاقه لری قبول ائديبديرلر. لاکين هر خالقين موسيقی سی معين فورمالارا ماليکدير کی، اونون طبيعتدن آسيلی دير. (6)

1) مجله موسيقی: شماره7صص32-33

2) چگونه از موسيقی لذت ببريم: زيگمونداسپات: مترجم: پرويز منصوری

3) سئری در ديوان شمس: علی دشتی

4) سازيمين سؤزو: ب. ق .سهند

5) زيبا شناسی در هنر و طبيعت: علينقی وزيری: انتشارات هيرمند 1363

6) اتنوموزيکولوژی : برو نونتل: مترجم: مجتبی خوش ضمير: انتشارات کتاب آفرين 1365